Read Hatam YOSUA 17 Bible Online

YOSUA 17 - Hatam bible

YOSUA 17

¹Lene Yosua kwas dihyei hanjop nsi ei Minyei Yordan nite bei mpia nicutti ndia hi tut keret Manasye ninsi de nya gom-gom di intun keret Manasye him nikenti nya. Manasye ne Yusuf nipmot mighumbou ri. Lene Manasye nipmot mighumbou ninyeng rino Makhir ba, noni ne Gilead nicig ri. Makhir ne tentara di kon pran igkei ri. Gima rino Yosua kwas minu ndig Gilead kin minu Basan ei Minyei Yordan nite bei mpia nipriti tut noni.

²Lene Yosua kwas dihyei hanjop nsi ei Minyei Yordan nite bei mpia nicutti tut keret Manasye ninsi de nya gom-gom di intun Manasye him di bram yam nindigsi nya. Yo di inok nibou mem keret Manasye ninsi de gom-gom dima yok inyeng rino Abiezer kin Helek kin Asriel kin Sekhem kin Hefer kin Semida ba, yahagom intun Yusuf nipmot Manasye him.

³Gilead nipmot Hefer yai nipmot Zelafehad. (Gilead ne Makhir nipmot lene Manasye nignyon.) Ba, Zelafehad yai nipmot bat nya hi bi noro bon nipmisop bat nya he ba, nipmisop bat dima yok inyeng rino Makhla kin Noa kin Hogla kin Milka kin Tirza.

⁴ Munggwom sop ningkom dini yok yuug ngat Imam Eleazar kin Yosua kin nibou nindigsi nya bipai biyok “TUHAN pai bak Musa bipia suar nyeni cem nitug ndei dihyei hanjop nsi noyam kin pinai nya di imbier kim nye.” Lene nibou dima yok ikwas dihyei hanjop nsi hi tut Zelafehad nipmisop bat nya ba, itug ndei noyam kin pinai di imbier kim yok ba, gima dem igbit TUHAN nicukti.

⁵Gima rino pinai nya di intun keret Manasye him he rino itug ndei dihyei hanjop nsi bi. Noro sop di intun keret Manasye him cem. Apino keret Manasye itug ndei dihyei hanjop nsi simnai. Ba, gima ter leu dihyei Gilead kin minu Basan ei Minyei Yordan nite bei mpia nipriti. Gima rino Yosua nya ikwas dihyei Gilead tut keret Manasye ide nintun him yamti di bram yam nya di ibong nite bei mpia nicutti.

⁷Keret Manasye de dihyei hanjop nsi nibresti bon minu niya kwas yamti di pek keret Asyer de dihyei hanjop nsi kikau bipek kin minu ndig Mikhmetat simin Sikhem ei nite bei mpia nipriti. Lene minu niya kwas yamti dima kiek ei sirima bijuk bei mpia nibiho kikau bipek kin mben En-Tapuah ide hanjop.

⁸Apino keret Manasye inyeng tak kep dihyei hanjop nsi di gahai dima kou noro keret Efraim ide nintun him yamti di bram yam nya rino inyeng tak kep minu ndig Tapuah ei minu niya kwas yamti pima.

⁹Keret Manasye de minu niya kwas yamti bei mpia nibiho sir minyei mien Kana di biam bei mpia nicutti bicom Muk Hacan. Keret Manasye de dihyei hanjop nsi nititnon jo ei minyei Kana nijjai. Mbro nok gino minu ndig gom-gom jo ei minyei dima nibiho ei hanjop nsi di keret Manasye ninyeng tak kepti lo, minu ndig gom-gom pima ne keret Efraim de ri. Nite bei mpia nicutti nyahan lene keret Asyer de dihyei hanjop nsi jo bikkin keret Manasye de dihyei hanjop nsi pima. Ei nite bei mpia nipriti nyahan lene keret Isakhar de dihyei hanjop nsi jo bikkin.

¹¹Keret Manasye itug ndei mben Kanaan ide minu ndig Bet-Sean kin Yibleam kin Dor (ei les him) kin En-Dor kin Taanakh kin Megido bitut minu mien di jo ttai nya cem ba, hagom jo ei keret Isakhar kin Asyer ide minu ninyeng tak kepti ninsi.

¹²Noro bit bon keret Manasye igijji timiei minu ndig dima yok leu kan bi. Gima rino mben Kanaan ibong ei mpia dima yo.

¹³Mbro nok gino mben Israel ikum ei ide nisindemti ei nidipti bu lo, igijji timiei minu Kanaan yahagom leu minu dima yok bi. Noro yuubon yok bigyai midyai nok ide awak nya.

¹⁴Mpe dima lene Yusuf de nintun him yamti di bram yam nya ipai bak Yosua “Nggon rino nima dihyei hanjop nsi gom ngat he i? Lewo TUHAN yai gi kei binye bibindei ba, nidigek kep mpia tu.”

¹⁵Lene Yosua buhup “Gino jimang bibor ba, nungug him ei hanjop keret Efraim cem kom bibor bibon nibresti mem je bi lene ma jikieng kep dihyei hanjop nsi di mben Feris kin mben Refaim ibong eisi nipou su ba, jiwin jide minu ndig nijep nya ei baham tindurti dima.”

¹⁶Lene yo di intun Yusuf him dima ibuhup “Nungug him dima dem mem nyeni bi. Mben Kanaan di ibong ei mbang briep nya iba kroba pran di iba ngkimom nitu bibon bikon pran. Yo dima ne timiei Bet-Sean kin minu mien di jo ttai nya kin timiei Mbang Briep Yizreel cem.”

¹⁷Lene Yosua pai biyok “Igbit ri. Jeni ne jimang bibor leu api jisindem cem. Nna ba jitug ndei dihyei hanjop nsi hi kin bu lewo jide dihyei hanjop nsi gom ngat dima dem mem je bi.

¹⁸Dice tut ba, jitug ndei nungug him dima cem. Mbro nok gino nungug him dima wer baham tindurti lo, dem mem gima jiwimti ba, jibong ei hanjop dima nisurti-nipekti. Lene tut mben Kanaan dima ne mbro nok gino isindem bibor ba, iba ngkimom nitu bibon ide kroba pran nya cem lo, jidem mem gima jijji yok.”