Read Hatam YOSUA 2 Bible Online

YOSUA 2 - Hatam bible

YOSUA 2

¹ Tirigi mben Israel yohok ide prak meng yati ei Sitim lene Yosua cuk ibou can leu binhyepo yuug yok itta kep minu Kanaan nisurti-nipekti lo, suar igyok itta kep minu ndig Yerikho nipou ug e. Tirigi yoni yuug krau minu ndig Yerikho mem mmun lene Rahab di sop sundal gom cigit yok kui nide ig.

²Noro hi mbot kep tut yo cin dima ikweisi bak nibou ndig Yerikho bipia mben Israel ibou can imbris nyahan kwei mem mmun ba, igyok itta kep minu dima tu.

³Lene noni sok nihyet bak Rahab bipai binoni “Ma abindei hei yo cin po acigit yok kui ade ig pima kwei lewo ikwei yok itta kep minu ndig Yerikho dini.”

⁴Noro Rahab buwak yo cin pima biku yok nyahan tu. Gima rino buhup “Igbit ri. Dicigit yok kui ditde ig tu noro dikan tut ikwei leusi bi.

⁵Hammi tirigi jam dem mem jinggam mbou ngug tig mem mmun rino yo cin dima yehei leu ig bei noro dikan tut imbut ug eisi bi. Ma juhuk bram yok leu api mijahatap yok.”

⁶Pai nok noro noni buwak yo cin pima ba, ikui ug ei ig bou ninjek hu kwei leu api noni ku yo cin dima nyahan srig njita rami nintam di noni nyohou dimig keyam ei sirima nipou su.

⁷Lene tentara po nibou ndig cuk yok kwei pima yuug leu minu ndig Yerikho leu api yo di igya ser nya inggam dimbou ngug tig ei inghim dip. Tentara pima yok yuhuk yo cin di igyok itta kep minu ndig Yerikho pima kikau ug bipek kin Yordan nyai tirigi isigon kepti.

⁸Lene nipou tirigi yo cin pima ibong mai bigyo lene Rahab kui ug ei ig bou ninjek dip,

⁹bipai biyok “Dikan tut bipia TUHAN yai minu dini hagom bije. Lewo timiei minu dini yahagom ittin tut je di mben Israel.

¹⁰ Nimiap tut gi po TUHAN bindei ba, Muk Lipig bon ninggati ei joho bei tirigi po jingwes ngun leu minu Mesir pima. Nimiap tut gi po jiyai nimai bak nibou ndig cin di mben Amori di inyeng Sihon kin Og pima ei Minyei Yordan nite dima ug bei mpia nipriti cem tu.

¹¹Tirigi jinghapti tibim kwei ei nyeni nitingou nsi lene nittin tut je bibor. Jibindei ba, mimbri cut leu nyende mben nya. TUHAN di nok jide Allah ne Allah Di Sindem Bibor ei mpia-bbed him kin dihyeisi dini cem ri.

¹²Nogindini ma jeheng bitug hon Noni ninyeng bipia mijiba jingon di nggriu bibon dide bat nya bit leu nok gi dibon bije dini. Lene suar jiyai mun nyeng gom nok bindo bida di mibindei ba, diba dingon com je.

¹³Ma jipreu ei bida bipia mijinyohou dicig-dipmem yoni kin dikijam bat nya kin dikindig bat-dikinjoi bat nya bitut ide bat nya yahagom ba, ingwes ngun. Suar jibit leu nok dahara jeti leu binhyepo jide tentara migya kep bihwen yok bi.”

¹⁴Lene yo cin pima ibuhup “Nipreu ei mem na bipia tirigi TUHAN yai minu dini binye lene minibibon je nok gi kei gino ambot kep tut nyeni nikweisi dini bak hiter bi. Ne gino nibit nipreu ei mem nati dini bi lene ma TUHAN sigion nye hak ug.”

¹⁵Rahab de ig ntun ngug tig di bikrop ttai minu dima him ba, jo anai. Gima rino noni huk kuk tut yo cin pima ei kendera mihyeti ug ei dihyeisi mu,

¹⁶bisok kep yok “Ma jiku jenti nyahan mem njap ningai ei nungug him bibou nibou ndig de tentara ingkwei hanyen ug e. Leu binhyepo yoni mikat je ei puig sinon bi. Gima ngwig lene ma jingkwei hanyen ug.”

¹⁷Lene yo cin pima ibuhup “Miniyok ngon kep nipreu ei mem nati pima bit leu nok gi ahara nyeti pima.

¹⁸Noro ma ayai nok gini. Tirigi nye di mben Israel nikwei krau ade minu lene ma aba kuk ningwoi bikri ade kendera mihyeti hammi tirigi ahuk kuk tut nyeti pima bindun. Ma abuwak acig-apmem kin akijam bat nya kin acig nide ig bei nsi nya yahagom kwei bigwam nyahan ei ade ig dini.

¹⁹Gino jigom hei ug ei nisai bitug midut lene suar noni biang niyai munti nibuhunti leu api nyeni ningon mui drek dip ningut bi. Ne gino hi mitug midut tirigi noni gwam ei ade ig dini lene nyeni ningon mui drek dip ningut.

²⁰Noro gino ambot kep tut nyeni nikweisi bak hiter lene miniyok ngon kep nipreu ei mem nati bit leu nok ahara nye tut pima bi.”

²¹Lene Rahab ce bikes yok bimbut. Leu lene noni ba kuk ningwoi pima bikri nide kendera mihyeti bindun.

²²Leu api yo cin di igyok itta kep minu dima yuug ei nungug him biku yo nyahan. Lene tentara po nibou ndig cuk yok pima inggok ser yok mem njap ningai noro ingat yok bi. Gima rino ingkwei hanyen kwei ei minu ndig Yerikho.

²³Lene yo cin dima ijuk kwei leu nungug him ba, isigon minyei bingkwei hanyen leu api yuug bigya ei Yosua noho bei bipui kep mun di pek kep mem yok hagom bak.

²⁴Bipai ighyet ningwigsi nok gini “Jo nibreisi mem nye bipia TUHAN miyai minu dima nisurti-nipekti hagom binye ug ri. Lewo timiei nya yahagom ittin tut nye.”