Read Hatam YOSUA 22 Bible Online

YOSUA 22 - Hatam bible

YOSUA 22

¹Lene Yosua jem keret Ruben kin Gad kin Manasye nite hi di ibong Minyei Yordan nite bei mpia nipriti kwei,

² bipai biyok “Jahati tut mun nyeng di TUHAN de awak di Musa cuk je tut ba, jibit dicuk jeti nya cem hagom bidem tu.

³Kwei bipek ammani kep lene jisindui sut jide bat mben Israel nindigsi nya ba, ikon pran biyonti bi. Jahagom jibit jide TUHAN Allah nicuk jeti nya hagom mungkun kei tu.

⁴Apino TUHAN yai bipek kep nipreu kepti ba, jide bat mben Israel nindigsi nya ibong kei igwam kei tu. Gima rino njap dem mem gima jingkwei hanyen ug ei jide hanjop di jinyeng tak kep ei Minyei Yordan nite dima ug po Musa kwas tut je nipou su pima hak ug.

⁵Ma jisok kep jenti ser nhyema jibit nicukti nya di Musa tri tut bije. Ma jingon ngakei jide TUHAN Allah ba, jibit ningon kanti cem jibit nicuk jeti nya ba, jingon gom tut Noni cem lene ma jiba jingon titut kin jinnei titut yam bikuk je bak ba, jinok Nide awak nya.”

⁶Leu api Yosua ngat nadi bahara TUHAN Allah mem gima Noni njei mun di kei bak yoni. Leu api noni kes yok bingkwei hanyen ug ei ide hanjop di inyeng tak kepti hanyen. Noni bisok kep yok “Nogindini jinyeng bibor ba, jingkwei hanyen tut mindhe-ndhe nihyen kep nya kin perak kin mas kin ngkimom-tembaga kin ngkimom nitu kin sinsun mang bibor. Ma jikwas mun di jipos dima bihi tut yo di imbier kim je nindigsi nya.” Tirigi Yosua kes nihyet hon leu api keret Ruben kin Gad kin Manasye di ibong Minyei Yordan nite dima ug ikes mben Israel nindigsi nya ei ide hanjop nsi. Ikiju bimbut leu Silo ei minu Kanaan leu lene imbut ug ei yonti ide hanjop nsi ei Gilead. TUHAN cuk yoni ibong ser hanjop nsi dima bit leu nicukti di tug hon Musa. (Keret Manasye nite hi itug ndei dihyei hanjop nsi leu Musa ei Minyei Yordan nite hi tu. Noro keret Manasye nite hi itug ndei dihyei hanjop nsi leu Yosua ei Minyei Yordan nite bei mpia nicutti bit keret mben Israel nindigsi nya.)

⁷

⁸

⁹

¹⁰Tirigi keret Ruben kin Gad kin Manasye di ibong ei Minyei Yordan nite bei mpia nipriti yuug krau hanjop Gelilot ei Minyei Yordan nite bei mpia nicutti yo lene iwin nimbar hum dok di nindig krop di kei-kau-kei gom ei minyei nintig dip.

¹¹Lo, mben Israel imiap nibimbiti tut keret Ruben kin Gad kin Manasye pima di iwin nimbar hum dok gom ei Gelilot ei Minyei Yordan nite dini kwei[7] tu. Tirigi imiap nibimbiti dima lene yahagom idem yam ei Silo ba, injei siceu mem gima ikon pran bit keret gi hi di ibong ei Minyei Yordan nite bei mpia nipriti.

¹²

¹³Leu api mben Israel ipinak Pinehas di Imam Eleazar nipmot ba, noni ug ngat keret Ruben kin Gad kin Manasye di ibong ei Gilead ei Minyei Yordan nite bei mpia nipriti.

¹⁴Nibou Israel ibou simnai cem ikiju ba, ibit Pinehas ba, nibou dima yok tungwagom leu keret gom tungwagom leu keret gom ba, bidem keret di ibong ei Minyei Yordan nite bei mpia nicutti nya hagom. Ba, bikwop nibou dima yok ne nibou ig bei nsi nya bidem yo dima ide bat nya ri.

¹⁵Tirigi yoni yuug krau keret Ruben kin Gad kin Manasye nite hi di ibong ei Gilead idim,

¹⁶ lene ipai biyok gau TUHAN de limwa di mben Israel inyeng “Nggon rino jibon mun di kinei tut Allah Israel dini i? Jikiek ba, jaham jimbuk kep TUHAN tug hon nimbar hum dok di jiwin dima tu. Ba, jibit nicuk jeti nya bu bi su.

¹⁷ Apo jiyok ngon kep ide sisar po ibon ei Peor pima bi e? Mpe dima lene mbro nok gino nyeni ne TUHAN de limwa nya rin lo, Noni ba nsuwer ajar bikes hukum ei nye dip. Lene ninghuisi wei di ntun him no buhun tak nye kwei bipek ammani kep yo. Apo ninghuisi wei dima dem mem nye bigyo e?

¹⁸Nogindini mijiba jinghim bak TUHAN bu e? Gino njap di ammani jikiek ba, jaham jimbuk kep TUHAN lene njap di hyep bu Noni migga mben Israel yahagom ttei yam drek dip.

¹⁹Gino jibindei ba, map kui jide minu ndigti ba, dem tut gima jiwin gumihyep mem gima jibikuk je bak TUHAN ei niti bi. Lene ma jipri hak kwei ei TUHAN de minu di Nide Prak Meng ya niti dini. Ma jikiek ba, jaham jimbuk kep TUHAN ba, jaham jimbuk kep nyeni cem tug hon gi jiwin nimbar hum dok hi kin bu au. Lewo TUHAN de nimbar hum dok jo mem nye tu.

²⁰ Ma jiyok ngon kep Akhan di Zerah nipmot po kou sut gi bit TUHAN nicukti tut ndigban di suar ibindei sar hagom pima apino ningat mindei rintun him i? TUHAN kes hukum ei mben Israel dip ttei yam drek dip. Akhan nongkom ngat he rino bon sisar noro nongkom ngat he rino tug ndei nimai drek dip bi.”

²¹Leu api keret Ruben kin Gad kin Manasye dima ibuhup,

²²“TUHAN he rino Allah Di Ninyeng Jei a! TUHAN he rino Allah Di Ninyeng Jei a! Noni kan tut nyeni ningon kanti tut mun di nibon dini lene handei kon ba, jeni cem jikan tut ningon kanti dima. Gino nikiek ba, naham nimbuk kep TUHAN ba, ningon gom tut Noni cem bi lene nna ba jiyai nimai binye nogindini hak ug!

²³Gino nitin ei mem nikiek ba, naham nimbuk kep TUHAN biniwin nimbar hum dok mem nyenti leu binhyepo nibon midut nindig mindhe titut ei dip kin nibon midut njita nibipai sigyo bak Allahti kin nibon midut nibiyai ningon kwes kin Allahti cem ei dip lene nna ba ma TUHAN kes hukum ei nye dip hak ug.

²⁴Nisut bat jen, nyeni ningon kanti nok gima bi sren. Noro niwin nimbar hum dok dima lewo nikrau ningon tut bipia leu ma ei nidipti bu lene jide nintun him yamti di bram yam nya mipai kep yo di intun nyeni him nya ‘Jeni ne jimbier kim TUHAN Allah Israel bi bibor.

²⁵Jingat i! TUHAN kes Minyei Yordan dini bibiam ei nyeni ikieti mem bikwas nyeni leu je di keret Ruben kin Gad. Jo nibreisi bipia jimbier kim TUHAN bi sren.’ Gi jitri tut jihyet di nok gima lene jide nintun him yamti di bram yam nya mibindei ba, yo di intun nyeni him mingon ngkwei leu gi ikuk yok bak TUHAN.

²⁶Gima rino niwin nimbar hum dok dima mem nibibon midut nindig mindhe titut ei dip bi ba, mem mun di nittei mem nibikuk nye bak TUHAN ei dip cem bi.

²⁷Noro niwin nimbar nibiyok ngon kep mem nimpung jeni ei nite jeni kin nimpung nyeni ei nite nyeni ba, mem yo di intun nyeni him di bram yam nya cem leu binhyepo jo nibreisi mem yok bipia nye di Minyei Yordan nite dini cem nittei mun di mem nibibon midut nindig mindhe titut kep hum kin mun di mem nibibon midut nibiyai ningon kwes kin TUHANti kin nibon midut nindigsi nya ba, nibikuk nye bak TUHAN ei Nide Prak Meng di Nonti Ningat rin eisi. Tug hon nisinati dima lene gi mbun yo di intun jeni him di bram yam nya mipai kep yo di intun nyeni him di bram yam nya yoni mipai nok gima bi jimbier kim TUHAN bi sren.

²⁸Gima rino nyeni ningon kanti leu binhyepo gino yo di intun jeni him di bram yam nya ipai kep yok nok gima lene yo di intun nyeni him di bram yam nya mibuhup ‘Jingat nimbar hum dok dima i! Nidigup bat-nidigai bat nya iwin nimbar hum dok gom di noyam kin TUHAN de nimbar hum dok. Nimbar hum dok dini mem nibon midut nindig mindhe titut kep humti eisi kin nibon midut nindigsi nya cem eisi bi. Noro nimbar hum dok dini nok mun nibiyok ngon kep mem jeni kin nyeni.’

²⁹Ma jiyok ngon kep bipia naham nimbuk kep TUHAN bi. Nikes hon gi nikuk nye bak Noni tug hon gi nibikum ei nimbar hum dok hiter bu binibon midut nindig mindhe titut kep hum eisi ba, nibon midut njita nibipai sigyo bak Allahti kin nibon midut nindigsi nya ei niti cem bi. Lewo ide TUHAN Allah de nimbar hum dok jo ei Nide Prak Mengti di Ningat rin eisi nuhui tu.”

³⁰Lene mun nyeng hagom di keret Ruben kin Gad kin Manasye nite hi ibuhupti dima jo nibreisi mem Imam Pinehas kin nibou nya ibou simnai di inok nibou mem Israel de ig bei di ibong nite bei mpia nicutti pima tu lene ingon cut hon.

³¹Leu api Pinehas di Imam Eleazar nipmot pai bak keret Ruben kin Gad kin Manasye di ibong bei mpia nipriti “Nogindini nikan tut bipia TUHAN Allah ningat rin bit nyeni yahagom. Lewo jikiek ba, jaham jimbuk kep Noni bi. Lene tug hon nisinati dima jiteu mben Israel ba, ingwes ngun leu hukum di TUHAN mikes ei yok dip.”

³²Lene Pinehas kes nihyet leu lene ya tut nibou mben Israel pima ba, imbut bikes keret Ruben kin Gad pima ei Gilead bingkwei hanyen ug ei minu Kanaan. Tirigi yuug krau su lene itri tut munhyet dima bak mben Israel.

³³Leu api mben Israel cem imiap tut ba, ingon cut hon apino inggei sut Allah. Lene ibohom ndat gi itin ei ingon kanti mem gima ikon pran bit keret Ruben kin Gad ba, ibohom ndat gima ibindei sar ide hanjop nya cem bu bi.

³⁴Lene keret Ruben kin Gad ipai biyam “Nimbar hum dok dini ne nimbar hum ndok nibiyok ngon kep di ingat bou igyai him rin di biki nyeni yahagom ingon bipia TUHAN ne Allah ri.” Lene ijem nimbar hum dok dima ninyeng “Nimbar Hum Ndok Ningat Bou Niyai Him.”