Read Hatam YOSUA 23 Bible Online

YOSUA 23 - Hatam bible

YOSUA 23

¹Tirigi TUHAN bindei ba, mben Israel ibong kei igwam kei wer mimbrek ngan tu ba, siceu nya ihwen bit yok bu bi lene mpe dima Yosua wer andig-ndau su.

²Apino noni hig limwa mben Israel bitut ide andigpoi di inyeng jei nya kin nibou nya kin nikei nya kin nibou tentara nya yahagom kwei bipai biyok “Nogindini diwer andig-ndau su.

³Jide TUHAN Allah mpu je bikon pran bit jide siceu nya lene jingat notou Noni bibon yok bou jiyai him tu.

⁴Dikwas dihyei dini nisurti-nipekti tut jide keret nya tu. Dihyei dini bon nohon keti bei mpia nipriti ei Minyei Yordan nyai kikau bipek kin nohon keti bei mpia nicutti ei Muk Hacan nintig dip. Mbro nok gino dibindei timek mben imang bibor bingwig su lo, bihi di igya ser ide minu ndig nya ei minu dini bingkiem yo rinaha.

⁵Jide TUHAN Allah mibindei ba, mben dima yok misu jou binang leu jeni mpe di jinjei siceu mem gima jihwen yok. Mijipos ide minu dima ba, jima nok jide bu bit leu nok jide TUHAN Allah preu ei mem je tu.

⁶Gima rino ma jingon sok kep jenti leu binhyepo jiyai igbit TUHAN Niggai Serti Nya di Musa pas kep ei nide sratti hagom. Ma jitunggwei niggai serti dima ninyeng gom cem au.

⁷Gino jiyai igbit ditde nipingok jeti dima lene mijiket ei mben nya di igya ngkiem ei jikieti pimati bijingat nadi tug hon ide kwar nya inyeng bijeheng bitug hon kwar dima inyeng mijikuk je bak bijinggei sut ide kwar dima yok cem bi.

⁸Noro ma jibit TUHAN kin jingon di gom kikau noyam kin gi jibon kep nipou kwei bipek ammani kep.

⁹Tirigi jinjei siceu bijikon pran lene TUHAN mibindei ba, mben di nindig bibor di isindem bibor cem minang leu itimieisi dini ei joho bei. Bit bon jide siceu dima hi ya ngkiem bahau mem gima bindei timek je kan bi.

¹⁰ Dem mem gima jide tentara gom ngat sindem mem gima bindei timek jide siceu nya ibou sribu gom. Lewo jide TUHAN Allah hati tut jeni bikon pran bit yok bit leu Nide nipreu kep jeti.

¹¹Gima rino ma jiyok ngon kep jide TUHAN Allah ba, jingon ngakei Noni.

¹²Gino jingon gom tut Noni bu bi ba, jiket ei mben di ibong ei jikieti nya bijiwak ide sop nya kin pinai nya,

¹³lene jo nibreisi bipia tirigi jinjei siceu bijikon pran lene jide TUHAN mijji mben pima yok leu itimieisi dini ei joho bei bu bi. Noro yoni mibindei ba, juum mun di nggruk bibor di noyam kin bon di jibiam kin biap tindak di ibibui jinghim tou kin ndia nggwen di ibidat jiyai njep cem. Mijuum mun di nggruk bibor dima kikau bibou jigom ngat migwam ei minu di kei di TUHAN Allah yai bije dini bi ug e.

¹⁴Son dideu ditde njap ningwig honti tu bidimai ug ri. Jo nibreisi mem jahagom tu bipia jide TUHAN Allah njei mun nyeng di kei di Noni preu sut ei mem je hagom bak jeni tu. Ba, jikan tut gima mungkun kei. TUHAN yai mun bipek kep Nide nipreu eisi nya hagom mem je tu. Hi cut hacan bi sren.

¹⁵Noro jo nibreisi bipia Noni mikes mun di nggruk bibor di Noni sok kep ser je tut nya hagom ei jeni dip noyam kin gi Noni yai mun di kei bije bipek kep Nide nipreu eisi nya pima hagom,

¹⁶gino jitunggwei gi preu di jide TUHAN Allah yai bije. Gino jibit bi lo, jikuk je bijinggei sut nung di ngkiai nya ikuk yok bak lene TUHAN migga jeni bikes hukum ei jeni dip leu api jigom ngat migwam ei minu di kei di Noni yai bije dini bu bi.”