Read Hatam YOSUA 24 Bible Online

YOSUA 24 - Hatam bible

YOSUA 24

¹Lene Yosua nduk keret mben Israel yahagom kwei ei Sikhem. Tirigi yahagom idem yam tu lene noni hig andigpoi di inyeng jei nya kin nibou keret nya kin nikei nya kin nibou nya yahagom kwei ba, igya kui Allah De Prak Meng.

² Lene noni pai biyok “TUHAN di nok mben Israel ide Allah sok nihyet ei da dip bak jeni bipai bije ‘Habiei ei nimbie him lene jide pung nya ibong kei igwam kei ei itimieisi di jo ei Minyei Efrat nite dima ug ba, ikuk yok bak ide kwar nya ei sirima. Terah di jide pung yai nipmot bat cin di inyeng Abraham kin Nahor.

³ Lene dihig jide pung Abraham dima kwei leu nitimieisi ei Minyei Efrat nite dima ug ba, dibuwak noni kwei ei minu Kanaan leu api noni ya bidem nisurti-nipekti hagom. Lene dibindei ba, nide nintun him yamti di bram yam nya imang bibor. Lene dibindei bu ba, noni yai nipmot Ishak.

⁴ Lene dibindei ba, Ishak yai nipmot bat cin di Yakub kin Esau. Leu api dipek hanjop ei nungug him ei minu Edom bak Esau nok nide minu. Noro Yakub po jide pung pima buwak nimunggwom bat nya ba, yahagom yuug ei minu Mesir.

⁵ Ei niabiati bu lene dicuk Musa kin Harun yuug ngat jide pung nya ei minu Mesir. Lene dibindei ba, mun di buhun mang bibor cut igkep mben Mesir leu api dibuwak je bijingwes ngun leu minu dima.

⁶ Dibuwak jidigup bat-jidigai bat nya kwei leu minu Mesir noro tentara Mesir ibri kroba pran kin kuda pran ba, yuhuk yok. Tirigi jidigup bat-jidigai bat nya yuug krau Muk Lipig,

⁷lene yahara Dani leu binhyepo dimpu yok. Leu api dibindei ba, nidinditi di dindi-kai bikkin ser yoni kin tentara Mesir ikieti. Lene dibindei ba, minyei biam hanyen kwei ba, sur yam ser tentara Mesir nya apino minyei kot yok bingwig. Jahagom jikan tut mun di dibindei di cut igkep mben Mesir hagom tu. Lene jibong-bong nyen ei iggum ndigsi bijo ninno.

⁸ Lene dibuwak jeni kwei ei mben Amori ide minu di jo ei Minyei Yordan nite dima ug bei mpia nipriti. Yoni ihwen je noro dibindei ba, yahagom icut bije tu. Tirigi jiyai ide minu bijiyati lene dihwen yok bingwig ei joho bei sindam leu binhyepo jidigek kep ide minu.

⁹Lene Balak di nok nibou ndig mem mben Moab di nicig ninyeng Zipor hwen je. Lo bi lene noni sok nihyet bak Bileam di Beor nipmot leu binhyepo noni mikwei sigion je di mben Israel.

¹⁰Noro disindui sut Bileam ningon kanti dima bi. Gima rino noni ngat nadi tindei mun di kei mem je. Tug hon nisinati dima ne diteu je bijingwes ngun leu Balak ninda nsi.

¹¹ Ei niabiati bu lene jisigon Minyei Yordan ba, jimbut ug ei minu ndig Yerikho. Lene tentara Yerikho kin mben Amori kin mben Feris kin mben Kanaan kin mben Het kin mben Girgasi kin mben Hewi kin mben Yebus yahagom ihwen je noro dibindei ba, yoni cem icut bak jeni leu api jihwen yok bingwig.

¹² Tirigi jikieng kep ide minu dini sindam lene dibindei ba, yahagom ingon tai-tai bou apino nibou ndig mben Amori ibou can inang leu je. Yoni icut bije tug hon jide simeda nya kin jide hampiap nya bi.

¹³ Dibindei ba, jibong kei jigwam kei ei minu di jiyai miai eisi ba, jiwin minu bi sren. Nogindini jibong ei minu dima ba, mbro nok gino jita ba anggur nikioi hi eisi bigyo lo, jipuk ningat hi bijiyem tu. Mbro nok gino jita biei zaitun nikioi hi eisi bigyo lo, jipuk ningat hi bijiyem tu.’ ”

¹⁴Lene Yosua binut nihyet bu bipai biyok “Gima rino ma jikon TUHAN ninyeng nogindini. Ma jibindei ba, jingon sren ba, jingon gom cem. Ma jicom nung di jikuk je bak nya po jidigup bat-jidigai bat nya ikuk yok bak ei minu Mesopotamia kin Mesir pima hagom. Leu binhyepo jikuk je bak TUHAN Nongkom.

¹⁵Gino jikou sut gi jikuk je bak Noni lene ma njap di ammani jikos tut no di jikuk je bak. Mijikuk je bak nung nya di jidigup bat-jidigai bat nya ikuk yok bak ei Mesopotamia pima e, he jikuk je bak nung di timiei mben Amori ei minu di jibong eisi dini ikuk yok bak nya e? Noro tut dani kin dide bat nya nahagom minikuk nye bak TUHAN Nongkom.”

¹⁶Lene mben Israel yahagom ibuhup “Nyeni minikes TUHAN leu ba, nikuk nye bak nung nya bi sren!

¹⁷TUHAN di nok nyeni ide Allah teu idigup bat-idigai bat nya kin nyeni ba, ingwes ngun leu mben Mesir di yuubon nye nok awak. Ningat TUHAN de mindur nya di Noni bibon ei sirima bou nyeni niyai him tu. Noni nyohou nye ba, ya srak ko hagau nye kak puig sinon kikau nyeni nimbutti nya tirigi nimbut ei ngkiai nya ikieti tu.

¹⁸Tirigi po nyeni nikieng kep minu dini sindam pima lene TUHAN jji mben Amori bingwig leu itimieisi dini. Gima rino minikuk nye biNoni lewo Noni ne TUHAN ba, nyende Allah ri.”

¹⁹Lene Yosua pai biyok “Krop kei mem jikuk je bak Noni bi. Suar jiba jingon titut bibit nihyet lewo Noni ningon sren-srau. Bit bon Noni kos ser jide sisar dino,

²⁰jikes Noni leu ba, jikuk je bak nung nya dima kan bi. Mbro nok gino Noni yai gi kei bije nipou su lo, Noni mikou sut je bikes hukum ei je dip kikau bibou jahagom jimai bijingwig ug e.”

²¹Lene nide limwa nya ibuhup “E bi! Nikou sut nung di yo dima ikuk yok bak nya. Minikuk nye bak TUHAN Nongkom.”

²²Gima rino Yosua pai biyok “Mun di jisimbot dat dima tibim ei jitingou nsi tu. Jikos tut bipia mijikuk je bak TUHAN Nongkom tu e?” Lene ibuhup “Igbit ri. Nyende nikos tutti tibim ei nyeni nitingou nsi tu.”

²³Lene Yosua sok kep yok bipai “Gi nok lene ma jicom nung di jikuk je bak nya di jo srig jide ndigbanti po jipos leu ngkiai nya pima leu api ma jipreu ei mem TUHAN di nok jide Allah bipia mijingon gom tut Noni.”

²⁴Lene nide limwa nya ibuhup “Minikuk nye bak TUHAN di nok nyeni ide Allah ba, minibit Nide nicuk nyeti.”

²⁵Gima rino Yosua ya hacan mem nide limwa nya kin Allah mem njap dima ba, ipreu ei bit yam. Lene noni ngginau yok tut Allah niggai serti kin nimbrap tutti nya ei Sikhem leu binhyepo ice tut ba, ibit.

²⁶Lene noni pas kep nipingok yokti nya pima hagom ei Allah De Srat Nicukti. Gima ngwig lene noni bindei ba, nide awak nya ikon tig di jei bibor bita pijum ei biei nindig bibor gom nitriti simiak TUHAN De Prak Meng niyati.

²⁷Lene noni pai bak nide limwa nya yahagom “Ma jiyok jiyai kep tig jei dini lewo tig dini ngig nitingou mem TUHAN nicuk nyeti hagom tu. Gima rino tig dini mingat jiyai munti nya bou niyai him ba, miwin kep jingonti leu binhyepo jikiek ba, jaham jimbuk kep jide Allah bu bi.”

²⁸Lene noni kes tungwatu nya bimbut leu api yahagom ingkwei hanyen ug ei ide hanjop nsi nya.

²⁹Gima ngwig lene TUHAN de awak di Yosua po nicig ninyeng Nun pima nide njap ug ei ari bingwam sratus gom simnai leu api mai.

³⁰ Lene itig ningut ei nide hanjop nsi ei Timnat-Serah ei nungug him dideu Nungug Gaas bei mpia nijjai ba, gini ne hanjop nsi keret Efraim ide ri.

³¹Mben Israel ikuk yok bak TUHAN bibit nihyet kikau mem nijam di Yosua niyaijo. Niabiati bu lene igyai nok gima bu kikau mem nijam di nibou nindigsi nya cem igyaijo. Lewo nibou nindigsi nya ingat mindur po TUHAN bibon mem mben Israel bou igyai him pima tu.

³² Gi nipou mimbrek ngan tu ne ide pung Yakub ba mitiei perak ningat sratus gom bipek mpia ttou nsi gom leu yo di intun Hemor him. Hemor dima ne Sikhem nicig ri. Tirigi po mben Israel ingwes ngun leu minu Mesir pima lene ikon brua gom di ide pung di Yusuf ningut joti bimbut tut kak imbutti nya kikau kwei bipek njap dini kep. Leu api itig brua dima tut Yusuf ningut di joti ei mpia ttou nsi di Yakub pek ei Sikhem tu lewo Yusuf de nintun him yamti di bram yam nya iba yokep mpia ttou nsi dima tu.

³³Mpe dima cem Eleazar di Harun nipmot mai ba, itig ei Gibea ei nungug him ei keret Efraim de hanjop nsi. Pinehas di Eleazar nipmot ba nokep Gibea nipou su.