Read Hatam YOSUA 4 Bible Online

YOSUA 4 - Hatam bible

YOSUA 4

¹Niabiati mben Israel yahagom yuug dihip ei nite hi tu lene TUHAN pai bak Yosua,

²“Ma adimig pinai nya ibou simnaibrimigcan ba, imangti dima tungwagom bikwop leu jide keret nya hagom.

³Lene acuk yok mem gima ibei tig nindak simnaibrimigcan ei Yordan nyai hammi mpia po imam nya igyati ei minyei nipingge leusi ei minyei ninggimau pima ba, ikon tig dima biyuug sut ug ei mpia ttou nsi di ariman mmun mijohok jide prak meng yati eisi. Lene ma idingug tig ei sirima.”

⁴Lene Yosua nduk pinai nya ibou simnaibrimigcan di noni dimig ei su kwei.

⁵Bicuk yok “Ma jikinyon ei Yordan nyai bibie mem TUHAN di nok jide Allah Nide Brua Gi Preu. Lene ma tungwagom-gom bei tig nindak gom ei sirima bikon ei ninghat dip. Tig nindak gom ba, jibikwop jide keret gom-gom.

⁶Tig dima ne tig nibiyok ngon kep mindur di TUHAN bon mem je ei mpia dini ri. Tirigi jimunggwom bat nya ihig ser je ei nidipti bu tut tig nibiyok ngon kep di jidingug dini lene,

⁷ma jipingok ingonti bijipai Minyei Yordan tun leu yam ei mpe di po imam nya ikon TUHAN de Brua Gi Preu ba, ibisigon pima. Tig dini ne tig nibiyok ngon kep mem mben Israel rin leu binhyepo igyok ngon kep mun di pek kep mem yok ei mpia dini.”

⁸Lene pinai dima yok ibit Yosua nicuk yokti. Ibei tig nindak simnaibrimigcan ei Yordan nyai ba, ikon ei inghat dip ug ei prak meng yati bidingug hagom ei mpia dima. Tig nindak gom ba, ibikwop ide keret gom-gom lene nok bit leu nok TUHAN nicuk Yosuati.

⁹Lene Yosua dingug tig nindak simnaibrimigcan hi kin bu ei Yordan ninggimau hammi mpia di imam nya igya tut Brua Gi Preu eisi. (Tig simnaibrimigcan dima jo nijoti kikau kwei bipek ammani kep.)

¹⁰Lene imam pima yok igya igyati ei Yordan ninggimau kikau bibou mun di TUHAN sok ei Yosua dip bak nide limwa nya hagom put ug e. Gini bit leu nok Musa nicuk yokti nya. Lene mben Israel ibipbur ba, isigon minyei Yordan.

¹¹Tirigi yahagom yuug dihip ei nite hi tu lene imam nya di ikon TUHAN de Brua Gi Preu ibie tut mben Israel.

¹²Pinai nya di ikrau minggwen bikon pran kan di intun keret Ruben kin Gad kin Manasye niken him isigon minyei bibie nindigsi nya yoho bit leu nok Musa nicuk yokti.

¹³Yo dini imangti ibou sribu ningot bitai. Yahagom injei siceu bou TUHAN niyai him ba, yuug dihip ei nite dima ug ei briep bou him dideu minu ndig Yerikho.

¹⁴Mun di TUHAN bibon mem yok njap dima bindei ba, mben Israel ikon Yosua ninyeng bijei. Lene ikon ninyeng kikau ug bipek niyaijo ningwig honti kep dem kep nok ikon Musa ninyeng ei nipou pima.

¹⁵Lene TUHAN pai bak Yosua,

¹⁶“Ma acuk imam nya di ikon Brua Gi Preu leu binhyepo ipri kwei leu Yordan nyai.”

¹⁷Lene Yosua yai igbit TUHAN nicuk noti.

¹⁸Tirigi imam nya ipri ug ei mam bei tu lene Minyei Yordan biam hanyen bisu nindig bibor nok nimbie him pima.

¹⁹Lene mben Israel isigon Yordan mem njap gi nisimnai ei bed gi nigom leu api yohok ide prak meng nya ei Gilgal dideu minu ndig Yerikho nite bei mpia nipriti.

²⁰Lene Yosua dingug tig nindak simnaibrimigcan di pinai nya ikon kwei leu Yordan nyai pima ei mpia ttou nsi dima.

²¹Lene noni tri tut nihyet bak nide limwa nya bipai “Tirigi jimunggwom bat nya ihig ser je ei nidipti bu tut tig dini lene,

²²ma jipui biyok tut mpe di po je di mben Israel jisigon Minyei Yordan bijimbut kak nipingge leusi.

²³Ma jipui sut notou TUHAN di nok jide Allah bindei ba, Minyei Yordan bon nipingge leusi kikau bibou jahagom jisigon ba, juug dihip ei nite hi bu ug e bit leu nok Noni bindei ba, Muk Lipig bon nipingge leusi mem nye nipou pima.

²⁴Leu binhyepo tungwatu dihyeisi dini hagom mikan tut bipia TUHAN sindem bibor. Tug hon nisinati dima lene mijibinggei sut Noni ninyeng bijo ninno bijo kikau.”