Read Hatam YOSUA 5 Bible Online

YOSUA 5 - Hatam bible

YOSUA 5

¹Lene nibou ndig mben Amori yahagom di ibong ei Minyei Yordan nite bei mpia nikimbasti kin nibou ndig mben Kanaan yahagom di ibong Muk Hacan nintig dip imiap tut notou TUHAN bindei ba, Minyei Yordan bon nipingge leusi kikau bibou mben Israel yahagom isigon ug e. Apino yahagom ingon digit bibor ba, ittin tut mben Israel.

²Lene TUHAN pai bak Yosua “Ma mben Israel ibon tig binggwen nok singau leu binhyepo ibon midut sunat mem ide bat di igyai nibon midut dini bigyo yahagom.”

³Gima rino Yosua yai hagom bit leu nok TUHAN nicuk noti. Noni bindei dino mben Israel igyai nibon midut dini leu api ijem mpia ttou nsi dima ninyeng Nipieti Nibon Midut Sunat.

⁴Mben Israel ibon midut dima lewo pinai pinjoi ndig di ikon pran kan di ingwes ngun leu minu Mesir yahagom imai bingwig ei iggum ndigsi tu.

⁵Mbro nok gino pinai di ingwes ngun leu minu Mesir yahagom igyai nibon midut sunat tu lo, imam nya ibon midut sunat hi mem munggwom pinai ningwoi-ngwoi nya tirigi mben Israel imbut-mbut nyen ei iggum ndigsi niabiati ingwes ngun leu minu Mesir pima bi.

⁶ Mben Israel imbut-mbut nyen ei iggum ndigsi mem ari bingwam ningot bitai bibou pinai nya di ikon pran kan di ingwes ngun leu minu Mesir yahagom imai bingwig ug e. Imai bingwig drek dip gi po ibit TUHAN nihyet pima bi. Gima rino Noni pai tug hon neheng bipia yo dima micoi ug ei minu di bon ninnumti di Noni preu ei mem idigup bat-idigai bat nya bi sren.

⁷Yo di imai bingwig pima ipmot bat nya igyai nibon midut sunat bigyo. Gima rino mpe dima lene Yosua bindei ba, yahagom igyai nibon midut sunat.

⁸Tirigi pinai pima yok yahagom igyai nibon midut sunat tu lene mben Israel yahagom ibong ei ide prak meng nsi bibou pinai nya ibokti jut ba, ikei hanyen ug e.

⁹Lene TUHAN pai bak Yosua “Gi po jinok awak ei minu Mesir pima ne noyam kin map di kui je ri. Noro dicug map dima leu je njap di ammani tu.” Lene tungwatu ijem mpia ttou nsi dima ninyeng Gilgal kikau kwei bipek ammani kep.

¹⁰ Tirigi yahagom ibong ei ide prak meng nsi ei briep bou him Gilgal dideu minu ndig Yerikho lene ikinyon ei nibon midut Njap Ndig Paskah ei njap gi nisimnaibrimigtai mem mmunti.

¹¹Njap di hyep bu lene sindi igyem njita di hei ei beisi ei minu Kanaan. Nok ikang gandum kin roti di ninjep srigsi bi bigyem.

¹² Hon kep njap dima kui lene manna hi cut kwei leu mpia-bbed him mem mben Israel bi ba, igyem njita dima bu bi. Hon kep njap dima kui lene yoni igyem njita di hei ei beisi ei minu Kanaan.

¹³Mpe dima lene Yosua ya nyen dideu minu ndig Yerikho bingat lo, tungwagom tt au kros biya ei Yosua noho bei ba, krau simeda gom. Lene Yosua dideu noni bihig ser “Atti kin nyeni e, he atti kin nyende siceu nya e?”

¹⁴Lene no dima buhup “Ditti kin je bi jide siceu nya cem bi. Dikwei ya diyati dini ba, dinok nibou ndig mem TUHAN de tentara.” Lene Yosua ba ningwak bikik dihyei ei no dima nimig him bipai binoni “Andigpoi e, dani ne ade awak rin ba, midiyai hagom bit leu nok acuk dati.”

¹⁵Lene nibou ndig mem TUHAN de tentara cuk noni “Akwek ade srop leu amig jou lewo mpia di ayati dima kwes-kwau. Lene Yosua yai mun bit leu nok no dima nicuk noti.”