Read Hatam YOSUA 6 Bible Online

YOSUA 6 - Hatam bible

YOSUA 6

¹Mpe dima lene timiei minu ndig Yerikho inggam mbou ei ngug tig nindig di bikrop ttai ide minu ba, igyai ngkiem ser nhyema mben Israel icoi bi. Bit bon tungwatu nya icoi kwei biyehei ug nyen leu minu dima kan bi.

²Lene TUHAN pai bak Yosua “Nogindini nicunti dem mem gima dikes minu ndig Yerikho kin nibou ndig kin nide tentara di ibrim ingkek nya yahagom ei andati.

³Ma nani kin ade tentara nya jibon nipui bijimbut bijikrop ttai minu dima njap gom mbigom lene nok gima ei njap muhwindagom bram yam.

⁴Lene ma imam nya ibou muhwindacan ibie tut Brua Gi Preu. Ma ittei ide pun mbrei gom-gom ba, ibikwop yok. Lene njap gi nimuhwindacan ma jibon nipui bijimbut bijikrop ttai minu dima mbimuhwindacan lo, imam nya imiep ide pun mbrei kikau igbit imbutti.

⁵Gima ngwig lene ma imam nya imiep ide pun mbrei sindem bibor mbigom ngat. Tirigi je di nindigsi jimiap nimbi bong lene ma pinai nya yahagom imbos-hi-mbos mbigom apino ngug tig di bikrop ttai minu dima hagom milus ug ei dihyeisi. Lene ma ade tentara yahagom icoi ug ei minu ndig Yerikho bigyati.”

⁶Lene Yosua hig imam pima yok kwei bipai biyok “Ma jikon Brua Gi Preu bijimbut tut lene ma jibou muhwindacan jittei jide pun mbrei nya bijibie tut.”

⁷Lene noni cuk nide tentara nya “Ma jikiju bijimbut ba, jibon nipui bijinjei bram yam bijikrop ttai minu ndig dima. Jikwas yam leu binhyepo bihi ibie tut Brua Gi Preu.”

⁸Lene imam ibou muhwindacan pima imbut ba, imiep ide pun mbrei bijo ninno bijo kikau leu api Brua Gi Preu abia kep yok.

⁹Ba, tentara nya bihi ibie tut imam di imiep ide pun mbrei leu api bihi igya abia kep Brua Gi Preu lo, pun mbrei nya nisu bong bijo ninno bijo kikau bit leu nok Yosua nicuk yokti.

¹⁰Lene Yosua pai ser nide tentara nhyema yahap iji au bibou noni ce tut gima yahagom imbos-hi-mbos ug e.

¹¹Gima rino nimpung pinai nindig bibor imbut tut Brua Gi Preu ba, ibikrop ttai minu dima nimbigom. Tirigi ikwei hanyen tu lene ibong kep inghuisi mem mmun ei prak meng yati.

¹²Lene Yosua kiju mem ha yausi leu api imam nya ikon Brua Gi Preu hanyen.

¹³Lene imbut tut bibibit tentara di ibie mem gima ibon nipui bimbut bikrop ttai minu ndig Yerikho nimbican bit leu nok gi imbut annani tu pima. Tentara nya bihi ibie lene imam ibou muhwindacan di imiep ide pun mbrei igya abia kep yok bu lene imam di imbut tut Brua Gi Preu igya abia kep yok bu lene tentara nya bihi igya abia kep yok bu lo, pun mbrei nisu bong kikau.

¹⁴Yahagom ibon nipui bimbut bikrop ttai minu dima mbigom he mem njap gi nican dini lene ingkwei hanyen ei prak meng yati. Lene igyai kep igyai kepti dima kikau mem njap nitindur muhwindagom.

¹⁵Lene ikiju mem njap bigyokti ei njap gi nimuhwindacan leu api ibon nipui bimbut bikrop ttai minu ndig Yerikho bit leu nok igyai kepti pima nimbimuhwindacan bu. Ibon nipui bimbut bikrop ttai minu dima mbimuhwindacan bu mem njap gom ngat dima he.

¹⁶Tirigi imbut mbimuhwindacan tu ba, imam itin ei mem gima imiep ide pun mbrei nya lene Yosua cuk nide tentara bipia yahagom imbos-hi-mbos. Lene binut nicuk yokti bu bipai “TUHAN kes minu ndig dima ei jindati tu!

¹⁷Ma jinggek minu ndig titut yam bingwig ba, jiyai nimai bak timiei nya yahagom nok mun di jibinggei sut TUHAN. Noro ma jingget sop sundal Rahab kin nide bat nya au. Lewo noni nyohou ibou can po igyok itta kep minu ndig Yerikho pima biku yok nyahan.

¹⁸Noro suar jinggek ndigban hagom di jo ei minu ndig dima bingwig ug ba, ma jiyai mun nyeng gom mem jenti au. Gino jiyai mun nyeng gom ngat lene gima mibindei ba, mun di buhun bibor micut igkep nye di mben Israel yahagom.

¹⁹Gino jingat mun di iba perak kin mas kin ngkimom-tembaga kin ngkimom nitu bibon lene ma jipigig sut ei mem TUHAN ba, jikon hagom kwei bijinju ei Nide Prak Mengti.”

²⁰ Gima rino imam nya imiep ide pun mbrei. Tirigi tentara nya imiap nisu bong lene yahagom imbos-hi-mbos apino ngug tig di bikrop ttai minu ndig Yerikho titut yam lus ug ei dihyeisi. Lene tentara yahagom ikui ug ei minu dima bigya kep bihwen timiei minu ndig Yerikho bidem nisurti-nipekti hagom.

²¹Lene iba ide simeda bitot timiei minu ndig Yerikho nya nok pinai nya kin sop nya kin munggwom nya kin andigpoi nya yahagom imai bingwig. Lene ibui sapi nya kin domba nya kin keledai nya hagom bingwig.

²²Lene Yosua pai bak yo cin po igyok itta kep minu ndig Yerikho pima “Ma juug ei sop sundal de ig bei ba, jibuwak noni kin nide bat nya yahagom kwei bit leu nok jipreu ei mem noniti tu.”

²³Gima rino yoni yuug ba, ibuwak Rahab kin nicig nipmem nya kin nikijam bat nya kin nide bat nindigsi nya yahagom kwei ba, ingwes ngun bitut ide awak nya cem leu api yahagom igwam ter dideu mben Israel ide prak meng yati.

²⁴Lene tentara nya indig minu ndig Yerikho titut yam bitut mun di joti nya hagom kep hum bitimek bingwig. Noro indig mas kin perak kin ngkimom-tembaga kin ngkimom nitu hagom kep hum bi. Yoni ikon mun dima yok hagom kwei binju ei TUHAN de Prak Mengti.

²⁵ Yosua sindui sut sop sundal Rahab kin nide bat nya yahagom ba, igyaijo lewo Rahab nyohou yo cin di igyok itta kep minu ndig Yerikho bit leu nok Yosua nicuk yokti biku yok nyahan. (Rahab de nintun him yamti di bram yam nya ibong bit mben Israel kikau kwei bipek ammani kep.)

²⁶ Mpe dima lene Yosua sok kep tungwatu nya yahagom bipai “Tungwa tou rino kinyon ei gima win minu ndig Yerikho hanyen mitug ndei TUHAN de nisigion noti. Tungwa tou rino tig cou nipmem lene nipmot mighumbou mimai drek dip. Tungwa tou rino kinding dimbou di itu ei ngug tig lene nipmot nipumiap mimai drek dip.”

²⁷Gima rino TUHAN ningat rin bit Yosua leu api tungwatu nya ei minu dima hagom inga leu tut nide midyai nya.