Read Hatam YOSUA 7 Bible Online

YOSUA 7 - Hatam bible

YOSUA 7

¹TUHAN pai bak mben Israel tu bipia suar ibindei sar ndigban hagom ei minu ndig Yerikho bihigom lene ma igyai mun nyeng gom mem yonti au. Noro ibit nicukti dima bi. Apino TUHAN gga limwa mben Israel bibor drek dip pinai gom di ninyeng Akhan bon mun tunggwei nicukti dima. (Akhan nicig ninyeng rino Karmi ba, nignyon ninyeng rino Zabdi leu Zerah ninsi de ei keret Yehuda.)

²Tirigi mben Israel ibong dideu minu ndig Yerikho di timek lene Yosua pinak tentara nya ibou poi biyuug ei minu ndig Ai ei minu ndig Betel nite bei mpia nipriti dideu Bet-Awen. Yosua cuk yo dima “Juug yok jiyai kep minu ndig Ai kin minu di gahai nya.” Tirigi yuug yok igyai kep minu dima leu su,

³lene ingkwei hanyen bipai bak Yosua “Ma apinak nok ibou sribu can sribu ningai he mem gima yuug kon pran bit mben Ai lewo dem mem gima nyeni yahagom injei siceu bikon pran bit yok bi. Minu dima ne minu mien he. Gima rino ma apinak tentara nya yahagom ug ei sirima mem gima ikon pran bit yo dima au.”

⁴Gima rino ibou sribu ningai he injei ba, ihwen minu ndig mien dima. Noro timiei minu ndig mien Ai dima ihwen yok apino tentara Israel ingkwei kep inghim dip binang hanyen.

⁵Lene timiei minu ndig Ai nya ikiju ba, yuhuk yok leu dimbou pmem ei minu ndig Ai nuhui kikau ug ei tig bata nibousi gom. Tentara Israel inang bijuk kwei leu minu ndig Ai lene timiei minu ndig Ai igyai nimai bak ibou ningot ningai ba, muhwindagom. Apino mben Israel ingon mbut-mbut nyen ba, idigit tut cem.

⁶Lene Yosua kin nibou Israel nindigsi nya ingon ngguk bibor apino irik ide sinsun rok yo him drek dip leu api ikuk yok biba ingwak bikik dihyei ei bei TUHAN De Brua Gi Preu nuhui him mem njap jei dima kikau bimmun kep ba, ikam atriem bigimahap ei ibousi nok bindo tut ingon di ngguk cem.

⁷Lene Yosua pai bak TUHAN “Ditde TUHAN Allah e? Abuwak nye kwei ei Minyei Yordan nite dini mem mindei i? Mem gima akes nye ei mben Amori indati leu binhyepo igyai nimai binyeni e? Gino nibong hak ei Minyei Yordan nite dinu hak ug lene mun di buhun dini micut igkep nye bi.

⁸Ayo TUHAN o! Siceu nya yuhuk tentara Israel bingkwei kep inghim dip hanyen tu. Nogindini gimbun dibuhup hanyen biNa kan bi.

⁹Mben Kanaan kin yo di nindigsi nya ei minu dini mimiap tut nyeni ninghapti leu api migyon ttai nye bigyai nimai bak nahagom hak ug! Leu api abon mindei mem gima abicuon Anyeng Di Jei i?”

¹⁰Lene TUHAN buhup “Akiju ba, aya hak ug! Anggon rino akuk na ba, aba angwak bikik dihyei nok gima i?

¹¹Mben Israel ibon sisar tu! Dicuk yok leu binhyepo ibit gi preu di yoni kin Dani nipreu ei biyam tu noro igyai mun tunggwei sut! Lewo ipos ndigban di suar ibindei sar pima hi nyahan ba, inggimang lene iku nyahan ei ndigban nggreti di ide nya leu binhyepo hi kan tut bi.

¹²Gima rino bit bon yahau mem gima ikon pran bit siceu nya kan bi a. Siceu yuhuk yok binang lewo dikes hukum ei mben Israel dip leu binhyepo itug ndei nimai. Gino jibindei sar ndigban po jinggimang pima bi lene midingat rin bit jeni bu bi.

¹³Yosua e? Akiju ba, aya hak ug! Lene ma abindei kwes limwa mben Israel yahagom leu binhyepo itin ei mem gima ikwei ya ei Doho bei. Acuk yok bipia suar itin ei mem njap di hyep lewo Da di dinok ide TUHAN midipai biyok ‘Mben Israel jen! Ndigban po dicuk je bipia suar jibindei sar pima hi no jo bit je yo. Gino jicom ndigban dima yok bi lene bit bon jahau mem gima jikon pran bit siceu nya cem kan bi!’

¹⁴Gima rino Yosua e, ma apai biyok bipia njap tekti di hyep lene midiyok diyai kep yoni ide keret gom-gom sindam. Gino dindo keret gom lene ma tungwatu nya di intun keret dima him ikiju bigya tut insi de nya gom-gom sindam ba, yahagom igya bibie leu api midiyok diyai kep yok. Ba, gino dindo hi ninsi de gom lene ma no dima ya tut ninsi de dima bikwop ig bei nsi gom-gom ikiju bigya bibie leu api midiyok diyai kep ig bei nsi gom-gom sindam. Ba, gino dindo ig bei nsi gom lene ma yo di ig bei nsi gom dima tungwagom-gom kiju biya bibie ba, midiyok diyai kep tungwagom-gom sindam.

¹⁵Leu api mijo nibreisi bipia no di dindo rino nggimang mun po suar jibindei sar pima hi tu a. Suar jindig no dima kin nide ig bei nsi nya kin nide ndigban di nyeng tut nya hagom kep hum bingwig hak. Lewo noni rino yai mun tunggwei sut gi preu pima tug hon sisar di kinei bibor di noni bon ei mben Israel ikieti.”

¹⁶Njap di hyep bu mem gwam ntuisi lene Yosua cuk limwa mben Israel bigya bibie ba, keret gom-gom sindam lene TUHAN ndo keret Yehuda nok keret di ningon mui.

¹⁷Leu api Yosua cuk keret Yehuda ba, ikiju bigya bibie lene tungwatu di intun keret dima hi kiju tut ninsi de hi kiju tut ninsi de sindam ba, igya bibie lene TUHAN ndo Zerah ninsi de nok ninsi de di ningon mui. Leu lene Yosua cuk Zerah biya tut ninsi de nya ba, bikwop ig bei nsi gom-gom ikiju bigya bibie sindam lene TUHAN ndo Zabdi de ig bei nsi nya nok ig bei nsi di ningon mui.

¹⁸Gima leu lene Yosua cuk Zabdi de ig bei nsi nya bikiju bigya bibie ba, bikwop tungwagom-gom kiju biya bibie sindam lene TUHAN ndo Akhan di Karmi nipmot ba, Zabdi nignyon pima nok no di ningon mui.

¹⁹Lene Yosua pai bak Akhan “Apai jit-jit mun di abon tunggwei sut pima ei mpia dini ei Israel ide TUHAN Allah Noho bei. Apai sut gini brei bida lene ma aku mun nyeng hi au.”

²⁰Lene Akhan buhup “Gima nijit. Dibon sisar tut Israel ide TUHAN Allah ba, diyai nok gini.

²¹Dingat sinsun ndok di jei di kei bibor kei gom di mben Babilonia ibon bou inda him ba, mitiei perak di dem kilo can biniken cem mas nindak gom di dem kilo niken binjiriek di jo srig ndigban di nyeni nipos pima. Dingon pri kep ndigban dima yok bibor leu api dimbus ei mem danti bidiku hagom nyahan ei dihyei jou ei ditde prak meng nsi lo, mitiei perak pima jo nijou ngat.”

²²Lene Yosua pinak ibou poi haninyai ug ei Akhan de prak meng nsi ba, ingat lo, jo nibreisi bipia ndigban di suar ibindei sar pima hagom no jo ei dihyei jou ei prak meng nsi di Akhan de ba, mitiei perak jo nijou ngat.

²³Lene ikon ndigban dima yok bittei kwei bak Yosua kin mben Israel yahagom leu api ikes hagom ei TUHAN Noho bei.

²⁴Lene Yosua ya tut limwa Israel yahagom bikat Akhan lene ikri noni ug ei Mbang Briep Nuum Ningon Buhun bitut nimunggwom bat nya yahagom kin nide sapi nya kin keledai nya kin domba nya kin nide prak meng titut yam kin mun di nyeng tut nya hagom kin mitiei perak kin sinsun ndok di jei kin mas di nggimang pima.

²⁵Leu api Yosua pai bak Akhan “Nggon rino abindei di mun di buhun cut igkep nye i? Nogindini TUHAN mibindei ba, mun di buhun micut igkep nani!” Pai nok leu api mben Israel iba tig bibihwen Akhan kin nide ig bei nsi nya ba, imai bingwig. Lene indig ndigban di nyeng tut nya hagom kin ndigban di nggimang pima yok cem hagom kep hum ningwig a.

²⁶Gima leu api ittei tig mang bibor binju bijo-jo yam dip ei mpia dima ba, tig dima no jo kikau kwei bipek ammani kep. Gima rino ijem mpia dima ninyeng Mbang Briep Nuum Ningon Buhun. Lene TUHAN kes hon ba, gga yok bu bi.