Read Hatam YOSUA 9 Bible Online

YOSUA 9 - Hatam bible

YOSUA 9

¹Nibimbiti tut mben Israel di ibindei timek ide siceu nya tibim kikau ug ei nibou ndig di ingat rin ei Minyei Yordan nite bei mpia nicutti itingou nsi. Nibimbiti tibim bidem nungug him kin nungug nimig him kin les him ndam Muk Hacan nipimat kikau bipek kin Nungug Libanon nite bei mpia nijjai cem hagom. Yo dini ne nibou ndig mben Het kin nibou ndig mben Amori kin nibou ndig mben Kanaan kin nibou ndig mben Feris kin nibou ndig mben Hewi kin nibou ndig mben Yebus yahagom ri.

²Nibou ndig dima yok yahagom igyok ingon gom ba, ibicom yam mem gima ikon pran bit Yosua kin mben Israel.

³Noro nibimbiti tut Yosua di bindei timek minu ndig Yerikho kin Ai tibim ei timiei minu ndig Gibeon di imbier kim mben Hewi itingou nsi.

⁴Apino igyok ingon gom mem gima iris mun bak Yosua. Gima rino injei kron puug nya kin aigmui mindhe ngkek mem ba anggur ngei di kinei-kinau nya cem kui ide keledai nya. Lene itin ei ide roti di ngak-cai ba, ta ntun him cem nok njita di yoni migyem kak puig sinon.

⁵Lene ijuk sinsun di rik-ta kin srop puug nya di inap-nap nyen kin yam cem.

⁶Iba ide ninggok puigsi dini biyuug ngat Yosua ei nide prak meng yati ei Gilgal. Leu api ibipai binoni kin nibou mben Israel “Andigpoi jen e, nijo leu minu ting bibor ba, nijoi sut jeni kin nyeni ibon gi preu bit yam.”

⁷ Noro nibou mben Israel ibuhup “Nibon gi preu bit jeni mem mindei i? Mpaba jide minu dideu dini kou e?”

⁸Noro mben Gibeon nya ipai biyok “Andigpoi jen, nibon nyenti nok jide awak nya hak ug.” Lene Yosua hig ser yok “Je tou i? Jikwei leu minu di tou i?”

⁹Lene ibuhup “Andigpoi e, nikwei leu minu ting bibor. Lewo nimiap tut TUHAN Allah di na di Andigpoi jeni jikuk je bak tu. Nimiap jinghapti tut mindur hagom di Noni bibon bak mben Mesir drek dip je,

¹⁰ bitut mun di Noni bibon bak nibou ndig mben Amori cin di ibong ei Yordan nite bei mpia nipriti cem tu. Yo dima ne nibou ndig cin di Sihon di nok nibou ndig Hesybon kin Og di nok nibou ndig minu Basan di bong ei minu ndig Asytarot ri.

¹¹Nibou nya kin timiei nya ei nyende minu ndig yahagom icuk nye ba, nitin ei njita mem gima niyem kak puig sinon leu binhyepo nikwei ya um je di Andigpoi nya. Lene nibipai brei bije bipia ninok awak mem je di Andigpoi nya. Gima rino nahara mem je di Andigpoi leu binhyepo jisingat tut nye ba, jibon gi preu bit nye.

¹²Andigpoi jen e, ma jingig jiyai kep roti di nipwoi biniyem kak puig sinon dini. Tirigi nikiju binimbut lene roti dini dut yo. Noro jingig jiyai kep roti dini! Lewo nogindini hagom ngak-cai ba, ta ntun him tu.

¹³Lene aigmui mindhe ngkek di nuhug ba anggur ngei eisi dini nijep yo. Noro nogindini ne jingat i! Hagom tun-ta tu. Sinsun nyende kin srop nyende cem rik-ta tu. Lewo nimbut kak puig jei di ting bibor dini.”

¹⁴Leu api nibou mben Israel igyem mben Gibeon ide njita poi mien bit yok noro igihig ser TUHAN tut bi.

¹⁵Lene Yosua bon gi preu bit yok leu binhyepo ingon kwes kin yam leu api sindui sut yok bigyaijo hak ug. Lene nibou mben Israel cem yeheng tut bipia yoni cem yahati tut gi preu dima.

¹⁶Noro ningat lene njap ningai ser gi ipreu mun biyam dima leu api mben Israel imbut biyuug krau minu ndig Gibea kin Kefira kin Beerot kin Kiryat-Yearim ei mben Gibeon pima ide hanjop nsi leu api ikan tut bipia yo dima ibong ting bibor leu Gilgal bi.

¹⁸Noro dem tut gima mben Israel igyai nimai biyok drek dip bi lewo nibou nya yeheng biyok gau TUHAN Allah ninyeng tu. Gima rino yahagom inso-nso nyen tut mun dima bak ide nibou nya.

¹⁹Noro nibou nya ibuhup biyok “Mibon ndei nitou! Neheng biyok tug hon nye di mben Israel ide TUHAN Allah ninyeng tu. Dem mem gima igyai mun kinei sut yok nogindini bi.

²⁰Ma igyai nimai biyok au. Lewo ipreu ei mem yok tu. Ba, gino injiriek gi preu dima lene Allah mikes hukum ei nyeni dip.

²¹Gima rino ma jisindui sut yok ba, igyaijo hak ug. Noro ma yahagom igyai kep midyai nipes kep biei kin nitau kep minyei mem nyeni.” Lene nibou Israel itri tut nihyet dima bak ide limwa nya.

²²Leu api Yosua jem mben Gibeon dima kwei bipai biyok “Nggon rino jiris mun binye ba, jipai binye bipia jide minu ting bibor lo, jide minu dideu ndini i?

²³Jibon mun nok gima apino Allah mikes hukum ei jeni dip a. Ba, jeni kin yo di intun jeni him mijinok awak lene mijirop kep biei ba, mijitau kep minyei cem mem ditde Allah De Ig bijo ninno bijo kikau.”

²⁴Lene mben Gibeon ibuhup “Andigpoi e, nimiap tut bipia TUHAN Allah di jikuk je bak cuk Nide awak Musa mem gima yai minu dini titut yam bina di Andigpoi a. Lene suar jiyai nimai bak yo di ibong ei minu ndig dini yahagom mpe dino jiyai minu ndig dini ba, jiyati. Nyeni nittin tut jeni nindig bibor. Leu mijiyai nimai bak nyeni cem. Gima rino niris mun bije tug hon niyai munti pima yok.

²⁵Nogindini ma abibon bak nyeni bit leu na di Andigpoi ade nisindemti. Ma aba nyeni biyai mun dem igbit akos tutti hak ug.”

²⁶Gima rino Yosua ngkiem ser yo dima ba, sindui sut yok mem gima mben Israel igyai nimai biyok bi.

²⁷Noro yuubon yok nok awak ba, iba yok biyai kep midyai nipes kep biei kin nitau kep minyei mem mben Israel kin TUHAN de nimbar hum dok cem. No igyai kep midyai dima kikau kwei bipek ammani kep ei mpia di TUHAN ndo ei mem ikuk yok biNoni eisi.