Read Hatam TIMOTIUS GI NIGOM 4 Bible Online

TIMOTIUS GI NIGOM 4 - Hatam bible

TIMOTIUS GI NIGOM 4

¹Allah Ninnei ndo brei binye bipia ei nidipti bu tungwatu nya mikes ide niba ningon com Kristusti ei leu api iba ibou coi mem ninnei di kinei di ibindei srawir yok kin ninnei rom ide ningginausi.

²Ningginausi dini tibim kwei leu niris kep mun cig yuhui him ba, yo dini ingon mien ndok ser tu.

³Yoni isrin ser tungwatu nya bipai bipia ma iwak yam au. Ma igyem njita di ipigig ser au. Noro Allah pai tes njita dima hagom mem nye di ingon jo kep tu nya leu binhyepo ijem sigyo kep leu api igyem hak ug. Lewo ikan tut ningginausi di nijit di kwei leu Noni tu.

⁴Lewo mun di Allah pai tes nya hagom kei bibor kei. Harin dima ipigig ser njita ninyeng gom a. Gino ijem sigyo bak Noni tut njita hagom tu lene nnaba igyem hak ug.

⁵Lewo Allah di njei mun di kei eisi kin ide nijem sigyo kepti bindei ba, map kui njita dimati bi.

⁶Gino angginau mun di dicuk na tut dini bak yo di ingon jo kep nya lene gini bindo bipia nani ne Kristus Yesus de awak di joi bibor ri. Gino ayem njita leu Allah nihyet di yahagom ingon jo kep kin nihyet di nijit di abit kikau kwei bipek ammani kep cem lene gima bindo brei bipia amahan tu.

⁷Ma ambres nanti leu mumpui di bon ninyeng bi nya. Ma abingon-ngon nyen ba, abiyai hamem angonti di kwes leu binhyepo ayai mun bit leu Allah ningon kanti mem na.

⁸Gino abingon-ngon nyen ba, abiyai hamem anghuisi ne gini bon ninyeng lai-laide. Noro gino abingon-ngon nyen ba, abiyai hamem mun di bitut annei ne gini bon ninyeng mem ayai munti nya hagom lewo bon nide nipreu eisi mem gima ibiyai mun di kei mem nijam di igyaijo dini kin niyaijo ei nidipti bu.

⁹Mun di isimbot dat dima jit-jau. Gima rino ma tungwatu nya ice tut ba, ingon jo kep hak ug.

¹⁰Nyeni igyai midyai sindem bibor ba, ita ibou eisi lewo iba ingon com[3] Allah di niyaijo di joi sut tungwatu nya yahagom igyai niteu leu sisarti kin niyaijo nijep. Noni teu yo di ingon jo kep nya leu sisar biyai niyaijo nijep biyok tu.

¹¹Ma angginau yo di ingon jo kep nya tut mun dini yok ba, acuk yok leu binhyepo yahagom ibit.

¹²Ma asindui sut ba, hi ningwes om kep na drek dip gino anok pinjoi pilei au. Noro ma ando bindo di kei bak yo di ingon jo kep nya tug hon mun di tibim ei ahui him kin ayai munti nya cem ba, tug hon angon ngakei tungwatu nyati kin ade niba ningon com Kristusti kin angon kwesti.

¹³Ei nijam di dihwou ngat na bigyo dini lene ma ata abou ei nikwop kep Allah nihyetti brei bak yo di ingon jo kep nya lene arok kik yok ba, angginau yok cem.

¹⁴Ma anyohou nisindemti di Allah Ninnei yai bina nipou su tirigi nabi nya itri tut nihyet ba, nibou mbusyamei ikes inda ei abou nggram him.

¹⁵Ma abingon-ngon nyen mun dima yok mungkun kei. Abita abou eisi leu binhyepo tungwatu nya yahagom ingat gino abindei mbut ade midyai nya bou igyai him.

¹⁶Ma asok kep nanti tut ayai munti nya kin ade ningginau tungwatu nyati. Leu gino aba angon di gom biyai gima yok hagom kikau ne abiteu nanti bitut yo di intu kep ahyet cem ba, jahagom jingwes ngun.