Read Hatam TIMOTIUS GI NIGOM 5 Bible Online

TIMOTIUS GI NIGOM 5 - Hatam bible

TIMOTIUS GI NIGOM 5

¹Ma ahyet hwen bit andig-ndau nya ingonti au. Noro ma ambus ingonti dem kep nok ambus acig ningonti. Ma abibon pinjoi pilei nya dem kep nok akinjoi bat nya.

²Ma abibon sindig nya cem dem kep nok apmem lene aba angon di gom bibon sop gwam nitta pilei nya dem kep nok akwohop.

³Ma aba angon di gom binyohou sop kibom di iwer kibom nijit nya.

⁴Lene gino sop kibom hi bon nimunggwom bat nya kin nidrot bat nya lene ma yo dima igyai mun di igbit ba, inyohou ide sop kibom bit leu nok Allah nihyet nicuk nyeti. Tug hon nisinati dima lene ma ibirop mun di igbit bak ide andigpoi nya hanyen. Gini bindei ba, Allah joi sut yok.

⁵Sop kibom di nijit rino sop kibom di bon nide bat nya hi di inyohou noni bi. Noni ba ningon com Allah ba, huk nadi bak Noni tut mun di suar bikwop mmun-njap.

⁶Sop kibom di ba noho rok mun di ngat ningwes eisi lene mbro nok gino niyaijo yo lo, mai su.

⁷Disok ei nani dip tut mun di dicuk yok tut dini ba, apai sut bak sop kibom kin ide bat nya leu binhyepo bit bon hi pai yo kinei kan bi.

⁸Ne gino tungwagom nyohou ninsi de nya bi bitut nide ig bei nsi nya bibie ug e bi ne no dima dem kep no di bikep ser ningon jo kepti ba, sibut bibor dor njiriek no di ningon jo kep bi.

⁹Ma asindui sut sop kibom dino nide njap ug ei ari bingwam ningot muhwindagom bigyo ninyeng tibim kin kibom nindigsi di akwop inyeng dima au. Tut kibom di akwop ninyeng ne suar noni nggre kin sop nya di iwak ijjep gom ngat he[4]

¹⁰ba, tungwatu nya yahagom ikan tut bipia noni ne sop di niyai munti nya kei bibor tug hon gi miep nimunggwom bat nya ingon nok mungkun kei cem cigit tungwatu nya kui ig cem ba nibou coi mem yo di ingon jo kep nya cem ngondut yo di yuhui mbum nya cem. Nirop ninda ndigsi tut rino noni ndo nijoi biborti tug hon niyai midyai di kei biborti nya.

¹¹Noro tut sop kibom di pilei nya lene ma akwop inyeng kin kibom nindigsi nya au. Leu gino ibit leu ingut kanti ne ijoi sut gima iwak ijjep bat nya bu. Gima dem kep nok ikes Kristus ei ba,

¹²ingon ngkwei leu mun di ipreu ei mem Noni lene gima biyai ingon mui.

¹³Tut gima cem inda jo kep ide midyai nya bi. Noro ihwou ningnai cem isuglai biyam cem ikwek dat mun nyeng hi cem isimbot kep biyam tut mun di igbit bi cem.

¹⁴Gima rino dijoi sut bipia kibom di pilei nya iwak ijjep bat nya hi bu leu binhyepo igyai imunggwom ba, inyohou ide ig bei nsi nya. Gino igyai nok gima lene mibon nituti mem ide siceu nya irom ighyet kui nye bi.

¹⁵Lewo sop kibom nya ibou poi israwir bitti kin Bilis tu.

¹⁶Ne gino sop di ningon jo kep bon nide bat sop kibom nya lene ma nyohou nide kibom nya hak ug. Ma noni hara yo di mbusyamei mem gima inyohou yok au. Lewo yo di mbusyamei inyohou sop kibom di nijit nya he.

¹⁷Tut nibou di ibie tut ide mbusyamei mungkun kei lene ma jibirop imuhup hanyen biyok mbican bram yam. Gini bon ninyeng mem yo di ita ibou ei nitri nihyetti kin ningginau tungwatu nyati.

¹⁸ Bit leu nok gi ipas ei Allah nihyetti “Ma jingot kep sapi di co kep gandum di cig nisina bai leu ningan dima nuhui ser au.” Lene gi ipas bu “Tungwa tou rino yai midyai lene nimuhup mittau binoni hak ug.”

¹⁹ Gino hi pai kep nibou mbusyamei gom lene ma amiap kep nihyet au bibou ibou can ibou ningai ighyet tot kep yam hyet tut ug e.

²⁰Bikwop nibou di ingon mui nya ne ma asok kep yok ngkiem ser ei yo di mbusyamei yahagom igyai him leu binhyepo nindigsi nya ittin ser.

²¹Disok kep na ei Allah kin Kristus Yesus kin malaikati di dia-diau nya yoho bei bipia abit mun di dicuk na tut dini hagom. Ma amig mbus tungwatu nya ba, aba angon kan-kan wai au.

²²Ma abisau sut gino ata hi nok nibou mbusyamei au. Leu gino noni dem mem midyai dima bigyo lo, ata noni sisrau ne gima dem kep nok apriet kin nide sisar. Ma angon sok kep nanti ser nhyema angon kwes kei.

²³Ma adut minyei he au. Noro ma adut ba anggur ngei poi mien cem ser anghop di dut lewo anggwen-nggwen nyen.

²⁴Bihi ide sisar jo nibreisi bindei dino itug ndei hukum. Noro hiter ide sisar jo nding ba, mipiet ei nidipti bu.

²⁵Nok gima cem bihi ide niyai munti di kei nya jo nibreisi lene gi jo nding bibor ne bit bon jo nding kikau kan bi.