Read Hatam 2 TIMOTIUS GI NICAN 4 Bible Online

2 TIMOTIUS GI NICAN 4 - Hatam bible

2 TIMOTIUS GI NICAN 4

¹Kristus Yesus mikwei hanyen ei dihyeisi dini leu binhyepo gwam nok nikei di mbus yo di igyaijo kin yo di imai su nya yahagom ingonti. Noni mikwei nok Nibou Ndig cem. Gima rino disok kep na ei Allah kin Kristus Yesus igyai him bipia,

²ma atri tut Allah nihyet ba, abidip huk yok leu binhyepo intu kep ahyet mem mpe di ijoi sut e, he ijoi sut bi e, cem. Aba angon di jo nyahan binyohou ngginau yok leu binhyepo abiyai bingon nddong. Ma ando itunggweisi biyok ba, abiwin kep ingonti cem.

³Lewo ei nidipti bu ne tungwatu nya mijoi sut ningginausi di nijit di tibim ei itingou nsi bu bi. Noro yuhuk bram yonti ingon kanti nya binduk guru nya imang-mang di ingginau yok tut mun di itingou dile mem.

⁴Apino itingou ndok ser nihyet di nijit lo, itingou dile mem mumpui hyet he.

⁵Mbro nok gima lo, suar angon nddong tut mun di pek kep mem na hagom. Ma aba abou coi sut ninghuisi di wei. Atri tut Nihyet Di Kei ba, abindei mbut ade midyai nya hagom dem kep nok Allah de awak di kei.

⁶Tut dani ne tto bou dem mem gima diyai nimai dem kep nok mindhe di ibui bibam ei nimbar hum dokti tu ba, ngon bou dem mem gima dikes dihyeisi dini ei biduug leu tu.

⁷Didor sindem bibor kak nipuig kikau ba, duug pek nipekti tu. Ba, dingon gom tut Kristus[2] kikau kwei bipek ammani kep.

⁸Nogindini Allah tin ei munkwas hi mem da lewo didor bipek nipekti tu. Tuhan Yesus Kristus di nok Nikei di ningon sren miyai munkwas dima bida ei Njap Ningwig Honti lewo diba dingon di kwes kin Allah biyai ditde niyai munti nya. Noni tin ei munkwas dima mem dangkom he bi noro mem yo di icem kep puig ser nikwei hanyenti nya yahagom.

⁹Ma abrim amig ba, akwei ngat da haninyai,

¹⁰ lewo Demas kes da buug ei minu ndig Tesalonika leu da tu drek dip gi noni ba noho rok dihyeisi dini. Kreskes cem kes da buug ei hanjop Galatia leu da ba, Titus cem kes da buug ei hanjop Dalmatia leu da tu.

¹¹ Lukas nongkom he ningat rin bit da. Ma aug buwak Markus kwei leu binhyepo mpu da tut ditde midyai nya.

¹² Apo dipinak Tikhikus buug ei minu ndig Efesus tu.

¹³ Mpe dino akwei ngat da ne suar attei ban dut di dikes ei Karpus de ig bei ei minu ndig Troas. Apwoi srat nya cem kwei bitut gi hi di iba mindhe ngkek bibon di bon ninyeng mem da.

¹⁴ Apo Aleksander di tukan ngkimom-tembaga mbuk tut da bibor noro Tuhan mibirop binoni hanyen drek dip niyai munti di kinei nya.

¹⁵Ma angon sok kep nanti drek dip noni lewo noni srep tut nihyet di sitri tut nindig bibor.

¹⁶Tirigi dimbrap gau danti ei nikei noho bei nipou ngig-ngat lene hi ya kui da bi noro yahagom ikes da binang leu da. Handei kon ba, ma Allah birop hanyen biyok drek dip igyai munti dima au!

¹⁷Noro Tuhan ya kui da bisindem tut da leu binhyepo ditri tut Nihyet Di Kei titut yam ba, ngkiai nya yahagom imiap Nihyet Di Kei dima tu. Ba, Allah teu da bidingwes ngun leu yo di itin ei mem igyai nimai bida nya indati.

¹⁸Jo nibreisi bipia Tuhan Yesus Kristus miteu da bidingwes ngun leu yo di itin ei mem ikos da yahagom inda nsi. Noni minyohou buwak da ba, dicoi bit Ninyeng Tak Kepti ei gwamti. Gima rino suar yahagom inggei sut Noni bijo ninno bijo kikau! Igbit ri.

¹⁹ Dipigo Priskila kin Akwila kin Onesiforus de ig bei nsi nya.

²⁰ Erastus gwam ei minu ndig Korintus bidikes Trofimus ei minu ndig Miletus lewo noni nggwen ser.

²¹Ma abrim amig ba, akwei ngat da nipou tirigi bed di biang hou ttau bigyo. Ebulus kin Pudes kin Linus kin Klaudia kin yo di ingon jo kep nindigsi nya yahagom ipigo na.

²²Handei kon ba, Tuhan Yesus Kristus ningat rin bit na. Handei kon ba, Allah singat tut jahagom! Nipigo leu dani, Paulus