Read Hatam TITUS 2 Bible Online

TITUS 2 - Hatam bible

TITUS 2

¹Noro tut na di Titus e, suar ade ningginausi bicim tindei nihyet di nijit.

²Ma apingok andig-ndau nya ingonti leu binhyepo yoom kep ingon ba, ingon nddong cem isingat cem. Ma ikrau kep ide niba ningon com Kristusti kin ide ningon ngakei yamti kin ide ningon nddongti.

³Nok gima cem ma apingok sindig-ndau nya ingonti leu binhyepo igyai munti nya dem kep nok sop di ingon kwes kin Allah. Ma ikkin kep tungwatu nya inghapti bikuk yok bak mun di pu yok au. Noro ma iba ningginausi di nijit,

⁴bipingok sop wak cam nya ingonti tut gima ingon ngakei ijjep bat nya kin imunggwom bat nya ba,

⁵ingon nddong cem ingon kwes cem inyohou ide ig bei nsi nya cem ikuk yok bak ijjep bat nya cem leu binhyepo tungwatu nya irom ighyet kui Allah nihyet bi.

⁶Nok gima cem ma asok kep pinai wak cam nya leu binhyepo ingon nddong.

⁷Ma aba ayai munti nya hagom bindo bindo di kei bibor. Suar aba ningon di gom kin ningon di nddong bingginau tungwatu nya.

⁸Suar ningginausi di atri tut dima com nigau ei angon di kiti leu binhyepo bit bon ade siceu nya irom ighyet kui na kan bi. Apino immai sut yonti lewo bit bon ipai kep nye di mbusyamei kan bi.

⁹Ma awak di ingon jo kep nya ikuk yok bak iceu bat nya bipwoi ingon tut mun nyeng hagom. Lene ma itte tut yok ba,

¹⁰inda ngwa-ngwa wai kep mun di iceu bat nya inyeng tut au. Noro ma isingat tut iceu bat nya ba, ingon gom tut yok kikau. Leu binhyepo iba igyai munti nya hagom bahati tut Nihyet Di Kei tut Allah di teu nye leu sisar biyai niyaijo nijep binye.

¹¹Lewo Allah ndo nisingat tut tungwatu nyati leu binhyepo teu yahagom leu sisar biyai niyaijo nijep biyok.

¹²Nisingat tut nyeti dima pingok ingonti leu binhyepo ikes hon ba, isrep tut Allah ningon kanti bibit ingut kanti di igbit bi nya bu au. Nipingok nyeti dima bindei ba, tirigi ingat rin ei dihyeisi dini ne yoom kep ingon cem ingon sren cem ingon gom tut Allah cem,

¹³lewo igyok ingon mem Njap ninggei-hi-nggei nitausi. Nogindini imem kep ser Njap dima di igyok ingon mem. Mpe dima yo di dihyeisi dini hagom mingat Yesus Kristus nikei-kau-keisi bou igyai him mem Njap dima lewo Noni ne nyeni ide Allah di Ninyeng Jei kin Nibou Ndig di teu tungwatu nya leu sisar biyai niyaijo nijep biyok cem ri.[2]

¹⁴ Noni kes niyaisi ei mem nye biteu nye leu sisar ninyeng hagom leu api biyai ingon di kwes kin Noni cem inok Nide limwa di ijem iceu bit Nongkom he cem ba, ibrim ingkek mem igyai munti di kei bibor nya.

¹⁵Suar aba anyeng di tak kep yok bitri tut mun dini yok hagom. Abiwin kep yo di ingon jo kep nya ingonti ba, asok kep yok ngkiem cem. Ma asindui sut ba, tungwa hi ningwes om kep nani au.