Read Hatam TITUS 3 Bible Online

TITUS 3 - Hatam bible

TITUS 3

¹Ma apingok yo di ingon jo kep nya ingonti leu binhyepo ikuk yok bak nibou ndig nya kin yo di igya kui yok bibit ighyet ba, itin ei mem gima yahati tut igyai munti di kei bibor nya.

²Ma asok kep yok ser nhyema yuhum tungwatu nya insi biliriem yok au. Noro ma isingat tut yok ba, ingon nggriu sut yahagom.

³Lewo nipou ne nyeni cem ingon tindur cem israwir cem ibit nihyet bi cem ba, inok awak mem ingut kanti nya kin mun di ingat ingwes eisi nya. Igyai munti nya sibut bibor cem ingon kinei sut yam cem ingon mpo tut tungwatu nya yahagom ba, yahagom ingon mpo tut nye.

⁴Noro Allah di nok Nibou Ndig teu nye leu sisar biyai niyaijo nijep binye lene ndo nisingat tut tungwatu nyati kin ningon ngakei yokti brei binye.

⁵Noni teu nye leu sisar biyai niyaijo nijep binye drek dip igyai munti di kei bibor nya bi. Noro drek dip Nide ningondut nyeti. Allah ba Nonti Ninnei de nisindemti bipiap nye ba, srek tut nye nok nijep bu cem apino igyai niteu leu sisarti kin niyaijo nijep.

⁶Allah pinak Nonti Ninnei ei ingonti tug hon Nibou Ndig Yesus Kristus di teu nye leu sisar biyai niyaijo nijep binye.

⁷Noni yai ingon di kwes kin Allah tug hon Nide nisingat tut nyeti leu api igyai niyaijo nijep di jo kikau di igyok ingon mem.

⁸Nihyet dima ne nihyet di nijit ri. Dijoi sut ma asum ahyet ei mun di dipas kep dima hagomti bak yo di ingon jo kep Allah nya leu binhyepo ibrim ingkek mem igyai munti di kei bibor nya. Ba, igyai munti dima bon ninyeng mem gima ibimpu tungwatu nya yahagom.

⁹Noro ma ambres nanti leu yo di iba ighyet dahat yam tut mun di bon ninyeng bi kin yo di itig pung bijo ninno kin yo di iliriem yam kin yo di ihwen yam drek dip Puig Yahudi niggai serti nya cem lewo mun dima yok hagom bon ninyeng bi.

¹⁰Mem no di bindei ba, yo di mbusyamei ikwas yam drek dip ingon di srep tut yam ne ma asok kep noni ngkiem ser mbigom mbican. Gino ningkek ndok ahyet ne ma acom noni leu yo di inggre kin mbusyamei ikieti hak ug.

¹¹Akan tut bipia no dima krau tunggwei puig di nijit ba, nide sisar ndo brei bipia ningon mui su.

¹² Tirigi dipinak Artemas kin Tikhikus igom bihwou ngat na lene ma abrim amig ba, akwei ngat da ei Nikopolis lewo dikos tut bipia dibong ei minu ndig dima bibou bed di biang hou ntus leu ug e.

¹³ Ma abrim angkek mem gima ampu Zenas di mbrap gau tungwatu nya ei nikei noho bei kin Apolos yoni leu binhyepo mun di isuar nya midem mem imbutti.

¹⁴Ma yo di ingon jo kep nya di inggre kin nye ita ibou ei ide midyai di kei biborti nya leu binhyepo iba mun di ibon bou inda him bahati tut yo di yuhui mbum nya. Ma ibong biei nda dip kep ig au.

¹⁵Yo di ingat rin bit da yahagom ipigo na. Dipigo sisut bat di dingon kieti nya di iba ingon com Yesus noyam kin sani ei na dip. Handei kon ba, Allah singat tut jahagom. Nipigo leu dani, Paulus