Read Hatam IBRANI 12 Bible Online

IBRANI 12 - Hatam bible

IBRANI 12

¹Tut nyeni lene imang bibor di ikrau kep ide niba ningon comti igwam ttai nye bigyok igyai kep nye. Gima rino jikwei ba, ikes mun di ngot kep nye kin sisar di srou nye ei leu api iba ijoi bibor bidor sindem kak puig di Allah ndo binye tu.

²Ma, itou kep Yesus nggilun. Noni ta niba ningon comti habiei ei ingonti binyohou nye kikau ug bipek nohonti. Ningon cut leu Nide midyai drek dip biei salib bimmai sut nimai ei biei salibti bi. Lewo Noni yok ningon mem gima yai ningon llei biborti ei nidipti bu. Nogindini Noni gwam kui Allah ninda com binok nibou ndig bit Noni.

³Ma jibisrip tut Yesus di yai ninghuisi wei bibor leu tungwatu nya di imbuk tut Noni bibor ug e. Leu binhyepo jingon nghen leu bicut leu au.

⁴Lewo jibrim jingkek bijisrep tut sisar ninno tu noro jinggrom siber drek dip bigyo.

⁵ Jingon prion ser Allah nihyet di biwin kep jingonti tu e? Nihyet dima pingok je di jinok nipmot bat nya “He dipmot na e, ma ayok ngon kep mun di Allah sok kep na. Mpe dino Noni sok kep na lene ma angon nghen leu au.

⁶Lewo Tuhan ttem bikwop no di Noni ningon ngakei. Noni mbas bikwop yo di Noni sindui sut di inok nipmot bat nya.”

⁷Ma jiba jibou coi mem Allah nimbas jeti tereu nok jicig di ttem je. Jikan tut mot di nicig ttem noni bi sren hi e?

⁸Gino Allah ttem je noyam kin gi Noni ttem nipmot bat nindigsi nya bi lene jinok nipmot bat nijit nya bi noro jinok munggwom tirimpoi he.

⁹Ibon icig bat nya di ittem nye leu api ikuk nye bak yoni drek dip. Suar ikuk nye bak Icig ei gwamti nindig bibor dor njiriek bu leu binhyepo igyai niyaijo nijep di jo kikau.

¹⁰Icig bat dihyeisi dini ittem kep nye bit leu ingon kanti mem nijam di imahan bigyo. Noro ma isindui sut Allah bittem nye bipingok kep ingonti lewo gima kei mem nyenti leu binhyepo ingon kwes-kwau noyam kin Noni.

¹¹Mpe dino icig bat nya ittem kep nye lene ingon kei sut bi noro ingon buhun drek dip. Noro ei nidipti bu lene nittem nye dima bindei ba, igyaijo bit leu Allah ningon kanti mem nye leu api ningon di jo nyahan ntun him.

¹² Gima rino ma jibindei ba, jinda di sindem bi nya yai nisindemti ba, jibiau di dut nya cem yai nisindemti.

¹³ Ma jikak puig di sur yam kei leu binhyepo jimig di lit kruwok bu bi noro yai nisindemti bikei hanyen.

¹⁴Ma jita jibou ei ningon kwes kin tungwatu yahagomti kin jide niyaijo kwes-kwausi kin Tuhanti. Leu gino tungwatu nya ikwes-kwau bi ne bit bon ingat Tuhan bou igyai him kan bi.

¹⁵ Ma jisok kep yam leu binhyepo hi ngkwei hanyen leu Allah nisingat tut nyeti au. Ma jisok kep yam leu binhyepo jiwer krisieu nikioi di hei ei jikieti di pu imang bibor bibindei ba, sisar srou yok au.

¹⁶ Ma jisok kep yam leu binhyepo jicut tut yam ba, jingkek ndok tut Allah Ninnei nipingok jeti noyam kin Esau au. Lewo noni kes ninyeng mot mighumbou ei bitri bak nikinjoi bipek njita den gom ngat he.

¹⁷ Jikan tut bipia niabiati bu lene Esau luei ningonti bijoi sut nicig ngat nadi tindei mun di kei hi bak noni cem noro nicig ce tut bi. Mbro nok gino Esau ba niyai nggwei di kibor bahara nicig lo, bit bon noni nggek tut nide nitunggweisi[6] pima kan bi ba, nituti mem gima hi bu bi.

¹⁸ Jikwei ya hon mun di noyam kin mben Israel igya hon nipou pima bi. Yoni igya hon mun di bon isu inda bingget. Mun dima ne Nungug Sinai kin hum di cig-cai kin nidinditi di dindi-kai kin hou di nimig ten bibor,

¹⁹kin pun mbrei di tibim kin Allah nihyet nibimbiti ri. Tirigi imiap Allah nihyet dima rino idigit tut ba, yahara ser leu binhyepo tibim kwei ei itingou nsi bu bi.

²⁰ Idem mem nicukti di tibim ei itingou nsi bi. Nicukti dima sok kep yok ngkiem ser “Ma jiba tig bihwen bikwop mun di ngget nungug dima bitut mindhe-ndhe kin tungwatu nya bimai hak ug.”

²¹ Mun di ingat bou igyai him dima bindei ba, idigit tut bibor apino Musa pai “Didigit tut bidittin bibor.”

²²Noro tut jeni ne jikwei ya hon nungug Sion kin Allah Di Niyaijo De minu ndig di Yerusalem nijep ei gwamti bitut malaikati nya ibou sribu-ribu tu.

²³Jikwei ya hon Allah nimunggwom mighumbou nya di iba ingon di llei bibor binduk yam kwei ba, inyeng tibim kin Allah de daptar ei gwamti. Jikwei ya hon Allah ba, Noni ne nikei di mbus tungwatu nya yahagom ingonti ri. Ba, jikwei ya hon tungwatu di ingon sren di imai su di Allah bindei bikei-kau.

²⁴ Jikwei ya hon Yesus di nyohou dimig gi preu nijep. Ninggrom di silipti biei salib preu ei mem nye tut mun di kei bibor dor njiriek mun di Habel ninggrom ndo tut.

²⁵ Gima rino ma jisok kep jenti ser nhyema jingkek ndok tut No di mbrap au. Yo di ingkek ndok tut No di tri tut Allah nihyet ei dihyeisi ingwes ngun bi. Gino ingkek ndok tut No di mbrap kwei leu gwamti ne notou ingwes ngun i?

²⁶ Nipou ne nihyet di tibim bindei dihyeisi dini ugwa-kwei. Noro tini bu ne Noni preu ei mem nye “Mbigom kin bu ne dibindei dihyeisi dini he ugwa-kwei bi noro bitut mpia-bbed him cem.”

²⁷Srat bokti di pai “mbigom kin bu” ndo binye bipia Allah nipai testi nya mugwa-kwei leu api son leu nijoti leu binhyepo mun di bit bon ugwa-kwei kan bi nya jo nijoti.

²⁸Gima rino ma ipai sigyo bak Allah lewo Noni bindei ba, iba nyekep ninyeng tak kepti di bit bon ugwa-kwei kan bi. Ma inggei sut bittin tut Noni bipai sigyo biNoni tug hon nisinati di bindei ba, joi sut nye.

²⁹ Lewo ide Allah dem kep hum di cig-cai di bindei timek mun nyeng hagom.