Read Hatam IBRANI 13 Bible Online

IBRANI 13 - Hatam bible

IBRANI 13

¹Ma jingon ngakei yam kikau bit leu nok yo di Kresten di ikinjoi bat yam.

² Ma jiba jikou bicigit ngkiai nya kui ig au. Tug hon nisinati dima lene bihi iba ningon di hukti bi bicigit malaikati nya kui ig tu.

³Ma jiyok ngon kep yo di isima ei ig bui nsi tereu nok jisima bit yok. Ma jiyok ngon kep yo di igyai ninghuisi wei tereu nok jiyai ninghuisi wei bit yok.

⁴Suar tungwatu nya yahagom iba ingon bisrip huk bipia niwak yamti ne mun di kei bibor ri. Gima rino ma nijjep-nitnem nya ingon gom tut yam. Lewo Allah mikes hukum ei yo di icut tut yam kin yo di ipigau ijjep bat-itnem bat nya dip.

⁵ Suar jimbres jenti leu sisar niba noho rok mitieisi. Ma jingon cut hon jimati di jo bije tu. Lewo Allah pai “Dimbres Da leu jeni bidikes je ei bi sren.”

⁶ Gima rino ma jikwei bibrim ingkek bipai “Tuhan ne No di mpu sa rin ba, sittin tut mun-mun hi bi. Tungwatu nya mibon ndei sa i?”

⁷Ma jiyok ngon kep jide nibou timiei nya di itri tut Allah nihyet bije. Ma jikan-kan nyen tut igyai munti nya kin imaisi bijiyai bram ide niba ningon com Allahti.

⁸Yesus Kristus luei ningonti kan bi ei nijam gi nipou kin nijam di nogindini kin nijam di nidipti di jo kikau bi sren.

⁹Ma jisindui sut ba, nihyet di nitrowai nya bindei bijisrawir au. Gi bon ninyeng rino jiyai nisindemti tug hon Allah de nisingat tut jeti lene tug hon nidimig sutti di bitut njita di mipror yon bi. Nidimig sutti dima ngat ningat di kei hi mem yo di ibit nya bi.

¹⁰Nyeni ibon nimbar hum dok mem ide midut nibikos ser sisarti ei Allah Noho bei. Noro dem mem gima imam nya di igyai midyai ei Tuhan De Ig igyem kep mun di jo ei nimbar hum dokti dima bi.

¹¹ Mben Yahudi ide Imam Nibou Ndig kon mindhe ninggrom ug ei Ninsi Di Kwes-Kwau mem midut nibikos ser sisarti. Noro indig mindhe dima ningut kep hum ei minu ndig nisai ma kwei.

¹²Gima rino Yesus cem ug mai ei minu ndig nisai ma kwei leu binhyepo ba ninggrom bipiap Nide limwa nya leu ide sisar.

¹³Ma jikwei ba, yuug ya kin Noni ei minu ndig nisai ma kwei bitug ndei nipai nye kineisi bit Noni.

¹⁴Lewo nyeni iwin minu ndig di jo kikau ei dihyeisi dini bi. Noro igyok ingon mem minu ndig di mittau kwei ei nidipti bu.

¹⁵Gima rino ma inggei sut Allah tereu nok midut nibikos ser sisarti tug hon Yesus. Iba midut dima binggei sut Allah tirigi ipai jit bipia Noni ne ide Tuhan ri.

¹⁶Ma jingon prion ser nituti mem jahati tut yam kin jingon dut yam au. Lewo jiyai munti dima tereu nok midut nibui mindheti di bindei ba, Allah joi sut je.

¹⁷Ma jibit jide nibou nya ide nicuk jeti nya ba, jibou cut biyok. Yoni inyohou jingonti bikwop mmun-njap lewo suar ibuhup hanyen bak Allah drek dip igyai munti nya. Gino jibit ighyet lene yoni miba ingon di llei biyai midyai nya. Gi bi lene iba ingon di buhun binyohou jingonti apino gima bindei bijiyai mun di kei nya hi bi.

¹⁸Ma jingat nadi tindei nye kikau. Nikan mungkun bipia ningon mien kwes lewo nita nibou ei niyai mun di igbitti bikwop njap ngwa hagom.

¹⁹Ditigtai je leu binhyepo jingat nadi tindei da leu binhyepo jei bi lene Allah pinak da hanyen hwou ndam je.

²⁰Allah ne nibousi mem ningon jo nyahanti rin ba, Noni win Yesus hanyen leu nimai eisi bikon Noni nok Gembala Di Kei Bibor mem Nide domba nya tug hon ninggrom di tak buk kep Nide nipreu eisi habiei ei nimbie him bijo kikau buug hon nohonti bi.

²¹Handei kon ba, Noni njei mun nyeng di kei hagom di jisuar mem gima jibibit Nonti ningon kanti bak jeni. Handei kon ba, Noni yai Nide midyai di joi sut ei ingonti tug hon Yesus Kristus di ya hacan mem nye. Ma inggei sut Kristus kikau buug hon nohonti bi! Igbit ri.

²²Disut bat jen, ditigtai je leu binhyepo tirigi jikwop srat bokti tut mun di dipingok jingonti tut dini ne ma joom jingon tut lewo srat dini jei bi.

²³Dipai bije bijikan tut bipia nibou pemerinta kes isut Timotius leu ig bui nsi ba, niyati kwes tu. Gino noni kwei hatap da lene midibuwak noni bidihwou sut ei mpe di dihwou cem kep je.

²⁴Nipigo jide nibou nya kin Allah de limwa nya jahagom. Yo di inggre kin mbusyamei ei Italia cem ipigo je.

²⁵Handei kon ba, Allah singat tut jahagom.