Read Hatam IBRANI 2 Bible Online

IBRANI 2 - Hatam bible

IBRANI 2

¹Gima rino suar ikrau kep nihyet di nijit-jau di imiap tu leu binhyepo ingkwei leu ba, israwir au.

²Jo nibreisi bipia nicukti nya di malaikati nya isok ei idigup bat-idigai bat nya dip ne nihyet di nijit-jau ri. Yo di ibit bi nya yahagom itug ndei hukum bibiang ide sisar nibuhunti.

³Notou mem nye i? Gino ingon nyei ndam niteu leu sisarti kin niyaijo nijep di mindur dor njiriek nicukti dima bi ne notou ingwes ngun leu hukum i? Tuhan Nonti tri tut niteu leu sisarti kin niyaijo nijep nipou ngig-ngat leu api yo di imiap ipai brei binye bipia nihyet dima ne nijit-jau ri.

⁴Mpe dima lene Allah sindem tut nihyet di tibim ei yo dima yuhui him ba, bon bindo kin mindur leu api kwas nisindemti nya di kwei leu Nonti Ninnei tut tungwatu nya bit leu ningon kanti.

⁵Allah yai nisindemti bak malaikati nya leu binhyepo inyeng tak kep dihyei di nijep di nyeni imbrap tut ei srat diniti bi.

⁶ Noro bit leu nok gi ipas ei Allah nihyetti “Allah e, Nggon rino aba angon bisrip huk tungwatu nya ba, angondut yok i? Nggon rino anyohou nye di tungwatu dihyeisi dini di nisindem bi i?

⁷Abindei ba, noni wer ei bijehei leu malaikati nya mem nijam di jei bi dini leu api ayai ninyeng di jei kin nikei-kau-keisi binoni.[3]

⁸Abindei ba, ninyeng tak kep apai testi nya hagom.” Nihyet dima pai “Allah kon tungwatu nya binok nibou di ninyeng tak kep mun nyeng hagom.” Mbro nok gino Allah nihyet pai nok lo, jo nibreisi bipia tungwatu nya igyai nisindemti mem gima inyeng tak kep mun nyeng hagom bigyo.

⁹Noro ikan tut Yesus kin Nide nisindemti tu! Allah om Yesus wer ei bijehei leu malaikati nya mem nijam di jei bi leu binhyepo Noni mai mem tungwatu dihyeisi dini hagom tug hon Allah de nisingat tut nyeti. Nogindini ikan tut bipia Noni yai Nide nikei-kau-keisi kin ninyeng di jei lewo tug ndei ninghuisi wei kin nimai tu.

¹⁰Dem mem gima Allah di pai tes binyohou mun nyeng hagom bindei ba, No di brim ningkek biteu tungwatu nya leu sisar biput kei tug hon gi tug ndei ninghuisi wei. Tug hon nisinati dima lene Allah cigit tungwatu nya bibindei ba, imang bibor ipriet kin Nide nikei-kau-keisi noyam kin Yesus. Lewo Yesus ritin puig mem gima igyai niteu leu sisarti kin niyaijo nijep.

¹¹Yesus piap tungwatu nya leu ide sisar leu binhyepo ingon kwes kin Noni. No di piap yok kin yo di igyai ingon di kwes nya yahagom ibon Icig gom ngat. Gima rino Yesus mmai sut gi jem yok nikinjoi bat nya bi.

¹² Noni ba mun di ipas ei Allah nihyetti bipai bak Allah “Miditri tut Na bak dikinjoi bat nya bidinggei sut Na ei yo di mbusyamei di idem yam ei nya yoho bei.”

¹³ Yesus pai bu “Midiba dingon com Allah” bipai bu “Dingat rin ba, munggwom di Allah yai biDa nya yo rinaha bit Da.”

¹⁴Yo di Noni simbot dat bipia munggwom nya ne tungwatu di itug ndei nimai rin. Gima rino Yesus luei nitta binok tungwatu bibon Nonti nok timiei dihyeisi dini. Noni yai nok gima leu binhyepo ba nimaisi binggek tut Bilis di ninyeng tak kep minu nimai nya ide.

¹⁵Tug hon nisinati dima lene Noni kwek yo di inok awak mem nijam di igyaisi jo drek dip ide nittin tut nimaisi.

¹⁶Jo nibreisi bipia Noni mpu malaikati nya bi. Noro mpu yo di intun Abraham him.

¹⁷Gima rino jo nibreisi mem nye bipia suar Noni luei nitta bibon Nonti noyam kin nikinjoi bat nya haigtu leu binhyepo yai midyai nok ide Imam Nibou Ndig di ningon gom ba, ningon nggriu cem ei Allah Noho bei. Tug hon nisinati dima lene Noni bindei ba, tungwatu nya igyai nikos ser sisarti.

¹⁸Noni yai ninghuisi di wei tug hon mun di bingon Noni. Gima rino Noni sindem mem gima hati tut yo di icut ei mun di bingon yokti kin ninghuisi weiti.