Read Hatam IBRANI 7 Bible Online

IBRANI 7 - Hatam bible

IBRANI 7

¹ Melkisedek ne nibou ndig ei minu ndig Salem rin ba, yai midyai nok imam mem Allah Di Ninyeng Jei Bibor. Tirigi Abraham ngkwei hanyen leu nikon pran bitot nibou ndig nya bingwigsi dima lene Melkisedek kwei um noni bingat nadi tindei mun di kei mem noni.

²Leu api Abraham kwas mun di pos leu nibou ndig nya gom leu ningot gom lene nok tut Melkisedek. (Ninyeng Melkisedek nibimbiti pai “Nibou Ndig di ninyeng tak kep Ningon Srenti” rin ba, ninyeng hi bu rino “Nibou Ndig di ninyeng tak kep Ningon Jo Nyahanti” lewo noni ne nibou ndig ei minu ndig Salem ri.)

³Hi kan tut no dini nicig kin nipmem kin nide pung di ntun him nya bi ba, nikwei leusi kin nimaisi jo daptarti di ipas kep tu nya cem bi. Noni yai ninyeng nok imam kikau noyam kin Allah Nipmot.

⁴Gima rino gini ndo binye bipia ninyeng jei bibor lewo Abraham di nok pung di nyeni intun him kwas mun di noni pos leu nibou ndig nya ei nikon pranti gom leu ningot gom lene nok tut noni.

⁵ Mbro nok gino ide bat nya cem intun Abraham him lo, Puig Yahudi niggai serti pai bipia suar imam di intun Lewi him imbus gom leu ningot gom lene nok leu ide bat di mben Yahudi imati nya.

⁶Melkisedek ntun Lewi him bi noro noni ma ndigban di Abraham pos gom leu ningot gom lene nok leu api ngat nadi tindei mun di kei mem Abraham di Allah preu ei mem tu.

⁷Bit bon hi srep tut bipia no di ngat nadi tindei mun di kei mem hiter ninyeng jei dor njiriek no di ma mun di kei leu kan bi.

⁸Imam di intun Lewi him ne yo di igyaijo kikau bi noro imbus mben Yahudi imati gom leu ningot gom lene nok leu yok. Noro bit leu nok gi ipas ei Allah nihyetti Melkisedek di mai bi ma gom leu ningot gom lene nok leu Abraham.

⁹Tini bu ne yo di intun Lewi him igyai gom leu ningot gom lene nok leu ide limwa nya. Ipai bipia tirigi Abraham kwas gom leu ningot gom lene nok tut Melkisedek ne Lewi cem kwas gom leu ningot gom tut noni.

¹⁰Mbro nok gino Lewi srek bigyo lo, ipai hak bipia ningat rin ei nidigup Abraham ningat him tirigi Melkisedek kwei um noni.

¹¹Mbro nok gino Puig Yahudi niggai serti pai bipia suar idimig imam nya leu yo di intun Lewi him lo, bit bon imam dima yok ibindei ba, ide limwa nya ikei-kau kan bi. Gima rino suar imam nijep di noyam kin Melkisedek ba, ntun Harun him bi ya luei imam yohoti bu!

¹²Gino nidimig sutti mem ibidimig imam nggek ne suar Puig Yahudi niggai serti cem nggek sindam.

¹³Mun dini yok hagom ndo tut ide Tuhan. Pung di Noni ntun him ne pung hiter rin ba, yo di intun pung dima him hi yai midyai nok imam bi sren.

¹⁴Tungwatu nya yahagom ikan tut bipia ide Tuhan ntun keret Yehuda him. Lo, no di nggre kin keret Yehuda hi yai midyai nok imam bi sren.

¹⁵Mun di nyeni nitri tut jo nibreisi bibor tug hon imam nijep di noyam kin Melkisedek pima nittau kweisi.

¹⁶No dini yai ninyeng imam tug hon nidimig sutti di ndo igbit tut keret di suar imam nya intun him bi. Noro No dini yai ninyeng imam tug hon niyaijo di jo kikau buug hon nohonti bi nisindemti.

¹⁷ Bit leu nok gi ipas ei Allah nihyetti “Nani ne Imam kikau buug hon nohonti bi noyam kin Imam Melkisedek.”

¹⁸Gima rino nidimig sutti timiei cut lewo sindem ba, bon ninyeng bu bi.

¹⁹Lewo Puig Yahudi niggai serti sindem mem gima bindei mun nyeng hi bikei-kau-kei bi. Noro tini bu ne Allah bindei ba, igyok ingon mem puig di kei bibor di bon nikwesti mem gima ikuk nye ei Noho bei.

²⁰Bitut gima cem Allah ba neheng bipreu ei. Nipou yo ne iba neheng bita yo di intun Lewi him nok imam nya bi.

²¹ Noro Yesus ba neheng biyai ninyeng imam tirigi Allah pai biNoni “Tuhan ba neheng bipreu ei ba, miluei ningonti tut bi drek dip nipaisi dini ‘Nani ne imam kikau buug hon nohonti bi.’ ”

²²Neheng dima bindei Yesus nok imam gi titer. Noni ngot nimig mem nye ei gi preu nijepti di kei bibor dor njiriek bu.

²³Niter leu yamti gom kin bu rinok gini. Imam hi ter pima yok imang bibor lewo hi mai leu lene hi ya luei nohoti bu apino bit bon igyai midyai kikau bi.

²⁴Noro Yesus yai midyai nok imam kikau lewo niyaijo kikau buug hon nohonti bi ba, hiter ya luei nohoti bi.

²⁵Gima rino Noni sindem mem gima teu tungwatu nya di ikwei kuk yok bak Allah tug hon Noni leu ide sisar biyai niyaijo nijep biyok bijo ninno-bijo kikau lewo Noni niyaijo kikau biya hacan mem yok ei Allah Noho bei.

²⁶Yesus dem mem gima yai midyai nok Imam Nibou Ndig biya hacan mem nye lewo ningon kwes-kwau cem yai mun tunggwei bibon sisar hi bi cem ba, kes dihyei di kinei dini ei leu api Allah kon Noni bikui njiriek mpia-bbed him.

²⁷ Noni noyam kin imam nibou ndig nindigsi nya di ibon midut nibikos ser sisarti mem ide sisar nipou ug e leu api mem ide limwa nya ide sisar bikwop njap-njap bi. Noni bon midut nibikos ser sisarti mbigom ngat he lene bijo kikau tirigi kes Nonti ei mem ide sisar pima.

²⁸Puig Yahudi niggai serti kon tungwatu nya ba, inok imam nibou ndig. Noro niabiati Allah yai niggai serti bak Musa lene Noni ba neheng bipreu ei lene nipreu eisi dima kon Nipmot nok Imam Nibou Ndig di kei-kau-kei kikau buug hon nohonti bi.