Read Hatam YAKOBUS 1 Bible Online

YAKOBUS 1 - Hatam bible

YAKOBUS 1

¹ Srat dini leu da di Yakobus. Dani ne awak mem Allah kin Tuhan Yesus Kristus ri. Ba, srat dini mem Allah de limwa nya di intek gimahap ug ei dihyei nisurti-nipekti hagom. Dipigo jahagom.

²Disut bat jen, gino mun di buhun di ter leu yam hi gom hi gom cut igkep je lene ma jingon llei sut,

³lewo jikan tut bipia gino jiba jingon com Allah mem mpe dino mun di buhun cut igkep je lene ningon nddongti ntun him.

⁴Ma jinyohou jide ningon nddongti kikau ba, ningat ntun him leu binhyepo jimahan ei Kristusti ba, mun di jisuar nya hagom midem mem je.

⁵Gino jigom ningon ki haigtu bi lene ma hara Allah tut leu api Noni miyai ningon di ki bak noni. Lewo Allah singat tut nye biyai ningat di kei ninyeng hagom bak tungwatu nya yahagom tug hon ningondut nyeti.

⁶Noro gino jahara Allah lene ma jiba jingon com Noni tut lene ma jingon can tut au. Lewo no di ba ningon can bahara dima dem kep nok muk ngwa dip di roi ug roi kwei tug hon hou di bong ningwa dip.

⁷No di nok gima lene ma yok ningon mem gima Allah birop hanyen binoni au.

⁸Lewo ningon di nddong bi biyai ningon di nggek-nggek nyen tut niyai munti nya hagom.

⁹Ma no di Kresten di nuhwap mbum ningon llei gino Allah bindei ba, ninyeng jei.

¹⁰ Lene ma no di Kresten di nyeng tut ndigban ningon llei gino Allah bindei ba, nyeng tut mun nyeng hi bu bi. Lewo yo di inyeng mimai noyam kin mitou di jo susti nimui hanyenti.

¹¹Mpe dino mpia pri ba, wam bibor leu api mitou millet bimui hak leu lene hi mingat nisieng bu bi. Nok gima cem tut no di nyeng. Noni misar tirigi ninda jo kep nide midyai nya.

¹²Tungwa tou rino ningon nddong mpe dino mun di buhun cut igkep noni ne no dima ningon nggei-hi-nggei. Lewo niabiati noni ba ningon di cut leu bi buug bipek nipekti leu api noni miyai niyaijo nijep di jo kikau di Allah preu ei mem yo di ingon ngakei Noni.

¹³Gino mun di buhun di nok gima cut igkep tungwagom lene ma kan bipia mun di bingon noni kwei leu Allah au. Lewo bit bon sisar brim Allah ningon kan bi. Noni sindui sut ba, sisar nibingon tungwatu nyati cut igkep yok bi.

¹⁴Mun di bindei dino tungwagom cut ei sisarti rino ningon pri kep mun di ngat ningwes eisi di srou noni.

¹⁵Gino noni nyohou ningon pri kep mun di ngat ningwes eisi dima lene sisar ntun him. Gino sisar dima mahan tu lene nimai ntun him sindam.

¹⁶Disut bat di dingon kieti jen, ma jisindui sut ba, hi ris je au.

¹⁷Mun di kei kin mun di dia-diau nya hagom ntun Allah him bisrek kwei leu Noni. Noni pai tes nipigati nya hagom ei mpia-bbed him. Noni luei ningonti bibindei ba, nidinditi nggai kep tungwatu nya bi.

¹⁸Noni yai niyaijo nijep binye bit leu Nonti ningon kanti tug hon nihyet di nijit. Niyai munti dima bindei ba, nye di tungwatu igya bibie mem Nide nipai testi nya hagom.

¹⁹He disut bat di dingon kieti jen, ma jiyok ngon kep dihyet bipia suar bikwop tungwagom-gom bipbur ba, nitingou dile noro nyohou yai sut nimbrapti. Ma ningon sibui sut tungwatu nya au.

²⁰No di ningon sibui sut tungwatu nya dem mem bon mun di kei bi ba, pwoi Allah ningon bi.

²¹Gima rino ma jicom mun di biyai jingon rom kin mun di kinei di rap je nya. Ma jiba jibou coi sut Allah kin nihyet di Noni ndim ei jingonti lewo nihyet dima sindem mem gima teu je leu sisar biyai niyaijo nijep bije.

²²Suar jibit Allah nicuk jeti lene ma jimiap kep nicuk jeti he au. Leu gi nok lene jiris jenti hak ug.

²³Tungwa tou rino miap kep nicukti nya he bibit bi ne no dima noyam kin no di ngat ningwes ei kisinati.

²⁴Noni tou kep ningwes nggilun leu api kes kisina ei bimbut leu lene ningon prion ser ningwes hanyen bu.

²⁵Allah niggai serti nya kei-kau-kei bisindem mem bindei kwek tungwatu nya leu sisar. No di ngig niyai kep niggai serti dima cem ba ningon gom biyok ngon kep cem yai midyai di bicim tindei niggai serti dima cem miyai munkwas di kei bibor leu Allah tug hon nide midyai nya hagom.

²⁶Gino hi kan bipia noni bit Allah ningon kanti lo, om kep nidweb bi lene no dima ris nonti ba, nikuk no bak Allahti bon ninyeng bi.

²⁷Allah kan tut yo di ibit Nonti ningon kanti mem yok nya rinok gini. Inyohou moibihi nya kin sop kibom di ihwap mbum nya cem ba, ingon hek tut yonti ser nhyema mun di suwok ei dihyeisi dini rap yok bi.