Read Hatam YAKOBUS 4 Bible Online

YAKOBUS 4 - Hatam bible

YAKOBUS 4

¹Ningon sibui sut yamti kin niliriem yamti di srig jikieti ntun mindei him i? Ningon di pri kep mun di ingat ingwes eisiti rinok nitriti mem mun dima yok.

²Jingon pri kep mun di jiba joho rok lo, bit bon jiyai kan bi apino jihwen mun. Jibrim jingkek mem noro bit bon jiyai kan bi apino jiliriem yam ba, jiba nitok biyam. Bit bon jiyai mun di jibrim jingkek mem kan bi lewo jahara Allah tug hon nadi bi.

³Gino jahara Noni lene jiyai mun nyeng hi leu Noni bi lewo jingon kanti sren bi ba, jahara mem mun di jingat jingwes eisi he.

⁴Mei! Jingon gom tut Allah bi. Jikan tut bipia yo di inggre kin mun di pror yon ei dihyeisi dini iba nitok bak Allah bi e? Tungwa tou rino nggre kin mun di pror yon ei dihyeisi dini lene noni ba nitok bak Allah.

⁵Jikan tut bipia Allah nihyet di nijit pai “Allah Ninnei di Noni hi bikes ei nyeni ingonti ne joi sut biboudut tut.”[1]

⁶ Mbro nok gima lo, nisingat tutti di Allah yai binye sindem bibor dor njiriek bu. Bit leu nok gi ipas ei Allah nihyetti “Allah timbe tut yo di ingon jei noro singat tut yo di iba ibou coi mem yam.”

⁷Gima rino ma jiba jibou coi mem Allah lene ma jihwen bit Bilis leu api noni minang leu je.

⁸Ma jidideu Allah leu api Noni dideu je. Je di jingon rom e, suar jipiap jinda leu ba, je di jingon mang e, suar jipindi jingon bikwes.

⁹Suar jingon ngguk cem jiyai nggwei kibor cem jipim kui jei cem tut jide sisar. Ma jipa tut mun nyeng hi bu au noro ma jipim kui jei sut. Ma jiyai nillei bu au noro suar jingon buhun tut.

¹⁰Suar jiba jibou coi mem Allah leu api Noni mikon jinyeng.

¹¹He disut bat jen, ma jipai yam kinei ba, jibon jenti nok nikei mem hiter au. Tungwa tou rino pai nisut no di Kresten hi kinei bigwam nok nikei mem noni ningon mui lewo gima tereu nok noni gwam nok nikei mem Allah niggai serti. Gino agwam nok nikei mem Allah niggai serti lene gima dem kep nok agibit niggai serti dima bi noro agwam nok nikei mem.

¹²Allah Nongkom dem mem gima kes hukum ei nye dip ba, Nongkom nok nikei mem nye. Nongkom teu tungwatu nya leu sisar biyai niyaijo nijep bak bihi lene com bihi ug ei nikineisi. Gima rino jidem mem gima jigwam nok nikei di pai jisut yo di Kresten hi kinei bi.

¹³ Nogindini ma jingig jitingou mem ditde nipingok jeti tut yo di irai pri tut ingon kanti bisimbot dat “Itou kep ammani e, he njap di hyep e, leu api nuug ei minu nitto nsi hi ba, nitri mun binibipek mitiei kikau mem ari bingwam gom leu api nipwoi mitiei nindig bibor biningkwei sut ri.”

¹⁴Mei! Jikan tut mun di mipek kep mem je hak ei njap di hyep bi! Jiyaisi dem kep nok hum bre di ingat jei bi lene pren hanyen.

¹⁵Suar jisimbot dat “Gino Allah joi sut nye biniyai jo lene miniyai midyai hi-hi bu.”

¹⁶Noro jingon jei bijirai pri tut jenti jingon kanti. Gino jirai pri tut jenti jingon kanti nok gima ne jibon mun tunggwei.

¹⁷Gima rino no di kan tut midyai di kei bibor di suar noni yai kep nya lo, yai kep bi lene ningon mui ba, sisar ntun him.