Read Hatam PETRUS GI NIGOM 2 Bible Online

PETRUS GI NIGOM 2 - Hatam bible

PETRUS GI NIGOM 2

¹Gima rino ma jicom sisar hagom leu je hak ug. Ma jiris yam cem jingon can cem jingon kinei sut yam cem jipai yam kinei cem bu au.

²Ma jibingon nok munggwom ngwoi di sindi srek ba, jingon rai Allah nihyet di nok do ngei di pimbai kei. Tug hon nisinati dima rino jimahan bijiyai niteu leu sisarti kin niyaijo nijep.

³ Bit leu nok gi ipas ei Allah nihyetti “Jingat Kristus nisingat tut jeti di pek kep mem je tu.”

⁴Gima rino ma jikwei tti kin Noni lewo Noni ne tig di niyaijo ri. Ningot kep ig cig nya ikou sut tig dima noro Allah dimig tig dima ei lewo kan tut bipia bon ninyeng mem ig nikiou.

⁵Jinok tig di Allah bindei ba, niyaijo. Gima rino ma jisindui sut Allah ba je di jinok tig bingot Nide Ig di bit bon tungwatu nya ingat bou igyai him kan bi. Jinok imam di igyaijo mem Allah Nongkom ei Ig dimati ba, jibon midut di Noni joi sut ei nimbar hum dokti tug hon Yesus Kristus.

⁶ Bit leu nok gi ipas ei Allah nihyetti “Didimig tig mma di bon ninyeng bidiprion tig nipmem dima ei ig nuhuisi ei Sion. Tungwa tou rino ba ningon com Noni ningon pus tut bi.”

⁷ Tig dima bon ninyeng mem je dino jingon jo kep Kristus. Noro mem yo di ingon jo kep bi nya ne inok yo di ipas kep tut ei Allah nihyetti “Tig mma di ningot kep ig cig nya ikou sut dima ne tig di bon ninyeng dor njiriek tig mma nindigsi nya hagom ri.”

⁸ Lene Allah nihyet hi bu pai “Tig mma dima mibindei bitungwatu nya indrat bicut.” Indrat lewo ingon jo kep nihyet bi. Lo, gima bit leu Allah ningon kanti mem yok.

⁹ Noro Allah dimig je nok Nide mben nya kin Nide imam nya di igyai midyai mem ide Nibou Ndig di Allah kin Nide mben di ingon kwes nya kin Nide limwa nya cem. Allah dimig je bihig je kwei leu nidinditi bijicoi ei Nide nipigati di sieng-siau kei leu binhyepo jitri tut Nide midyai di mindur nya.

¹⁰ Nipou ne jeni cem Allah de limwa nya rin bi. Noro tini bu ne jeni cem Nide limwa nya ri. Nipou ne jingon mbum tut Allah nisingat tut jeti noro tini bu ne jiyai Nide nisingat tut jeti ei jingonti tu.

¹¹Disut bat di dingon kieti jen, jinok ngkiai nya cem yo di ibong bas cem ei dihyeisi dini. Gima rino dicuk je sindem bipia ma jisindui sut jide ningut kanti nya om kep je au. Lewo jingut kanti dima kon pran bit jingonti kikau.

¹²Suar jiyai mun di kei bibor ei yo di ingon tindur nya igyai him. Gima mibindei ba, mpe dino ipai kep je bipia jisibut bibor ne ighyet micut hanyen ei ingonti drek dip jiyai munti di kei bibor nya. Leu api yoni minggei sut Allah mem njap di Noni mikwei hanyen.

¹³Ma jiba jibou coi mem nibou dihyeisi dini yahagom. Tug hon nisinati dima ne jibinggei sut Allah. Jiba jibou coi mem Kaisar di nibou ndig bibor,

¹⁴kin nibou hanjop nya di igya kui nibou ndig. Lewo noni ta yok mem gima ikes hukum ei yo di isibut nya dip bikon yo di ingon sren nya inyenga.

¹⁵Allah joi sut gino jiba jiyai munti di kei bibor nya binim kep yo di ingon mbum nya leu binhyepo yuhui buwei kep je bu bi.

¹⁶Ma jiyaijo tereu nok yo di igyati kwes lewo jingwes ngun leu sisar tu. Noro ma jiba jiyati di kwes binyohou sisar nyahan ei jingonti au. Ma jiyaijo dem kep nok Allah de awak nya.

¹⁷Ma jibou cut bak tungwatu nya yahagom. Ma jingon ngakei jisut bat yo di ingon jo kep nya bijittin tut Allah. Ma jibou cut bak nibou ndig Kaisar.

¹⁸Disut bat je di jinok awak e, suar jiba jibou coi mem jiceu bat nya ba, jibou cut bak yok. Gi dipai dini tut jiceu bat di isingat tut je bijoi sut je he bi noro tut jiceu bat di ingwak mbriu sut je cem.

¹⁹Gino jiba jibou coi mem jiceu bat nya di ihwen bit je mikui-kausi ba, jibikan bipia gini Allah ningon kanti mem je rin lene Noni minjei mun di kei bak jeni drek dip.

²⁰Gino jiba jibou coi mem yok tirigi ibui je drek dip mun di jiyai tunggwei ne mun di kei nyeng hi ntun him bi. Noro gino jiba jibou coi mem yok tirigi ibui je drek dip jiyai munti di kei bibor nya ne Allah minjei mun di kei bak jeni.

²¹Noni dimig je ei mem gima jiyai ninghuisi di wei. Lewo Kristus Nonti yai ninghuisi wei drek dip je ba, ndo bindo bije leu binhyepo jiyai bram niyaisi.

²² Noni bon sisar bi sren biris bak tungwatu nya bi sren.

²³ Tirigi ikucang Noni ne buhup bikucang yok hanyen bi sren. Tirigi ihwen bit Noni ne cug yok bi lene ba nihwen bit yokti birop hanyen bi sren. Noro kes munhyet dima ei Allah di nok Nikei di ningon sren-srau nindati.

²⁴ Kristus biang ide sisar ei Nonti dip tirigi mai ei biei salibti leu binhyepo bikwek nye leu sisar de nisindemti leu api igyaijo bit leu Allah ningon kanti mem nye. Kristus nibok nya ribindei dino jikei hanyen.

²⁵Nipou ne jinok domba di israwir nya. Noro tini bu ne Allah buwak je hanyen kwei leu binhyepo jibit No Di Gembala di nyohou jingonti.