Read Hatam PETRUS GI NICAN 3 Bible Online

PETRUS GI NICAN 3 - Hatam bible

PETRUS GI NICAN 3

¹He disut bat di dingon kieti jen, gini ne srat gi nican di dipas bak jeni ri. Dibingon mem gima dibiwin kep jide nikan-kan nyenti di pimbai kei tug hon srat ningat can dini.

²Ditigtai je leu binhyepo jiyok ngon kep nihyet di tibim ei Allah de nabi nya yuhui him mimbrek ngan tu. Ma jiyok ngon kep Tuhan di teu nye leu sisar biyai niyaijo nijep binye nicuk jeti di tibim ei yo di igya kui Noni yuhui him.

³ Mun dima jiyok ngon kep nimbie ngat hak rino son dideu njap ningwig honti lene tungwatu nya di ingut kanti kinei om kep yok nya ibou poi mittau kwei. Yo dini miba ighyet bicig je,

⁴tirigi ihig ser je “Tuhan preu ei sut nikwei hanyenti tu e? No hantou i? Idigup bat-idigai bat nya imai bingwig leu su noro mun nyeng hagom jo nijoti habiei ei nimbie him tirigi Allah pai tes dihyeisi kikau kwei bipek ammani kep!”

⁵ Yo dini ibisinggre bipai jit tut Allah di ba nicukti bipai tes mpia-bbed him kin dihyeisi dini mimbrek ngan tu dima bi. Noni bindei ba, dihyeisi ttau hak leu minyei jou lo, ba minyei bipai tes dihyeisi.

⁶ Leu api Noni ba minyei di su bibor bihwen dihyeisi di Noni pai tes tug hon minyei dima ba, sar bingwig.

⁷Noro Noni ba nicukti dima bibet mpia-bbed him kin dihyeisi dini ei mem hum di miyem bitimek bingwig ei njap ningwig honti. Mpe dima lene Noni mikes hukum ei yo di isibut nya dip ba, bindei sar yok bingwig hak ug.

⁸ Noro disut bat jen, ma jingon prion ser mun nyeng gom dini au. Njap gom ngat kin ari bingwam nitindur sribu gom ter leu yam ba, hi cun hi jei ei Allah niyai him bi.

⁹Mbro nok gino tungwatu nya ikan bipia Tuhan binyen tut mun di Noni preu ei mem nye biyai binye bi lo, Noni om ningon tut je lewo joi sut tungwatu nya isar bi. Noni joi sut yahagom ittin ser ide sisar bikiek ndam Allah.

¹⁰ Noro Tuhan De Njap di nikwei hanyenti dima mittau kep nye kros dem kep nok ninggimang kep mun cig nitausi tirigi tungwatu nya itin ei mem bi. Njap dima ne nibimbi di nok hum di sror mitibim mpe dino mpia-bbed him sar hak bingwig ba, hum miyem ham kin mun nindigsi nya bidem mpia-bbed him hagom bitimek bingwig ba, dihyeisi dini bitut mun di joti nya cem hagom mipror hak.[2]

¹¹Gino mun dima yok hagom misar bitimek bingwig tug hon nisinati dima ne notou mem je di jiyaijo mem nijam dini i? Suar jiyaijo mem Allah kin jingon di kwes ba, jikuk je bijinok awak mem Allah cem,

¹²mem nijam dini lewo jiyok jingon mem Njap di Allah gwam nok Nikei mem tungwatu nya. Tirigi Njap dima ttau ne hum miyem mpia-bbed him bitimek bingwig ba, ham kin mun nindigsi nya ei mpia-bbed him hagom mijet bingwig tug hon hum.

¹³ Noro ibet ingon mem mun di Allah preu ei mem nye tu. Gima ne mpia-bbed him kin dihyei di nijep bu ri. Mpe dima lene tungwatu nya yahagom igyaijo bit leu Allah ningon kanti mem yok.

¹⁴Gima rino disut bat di dingon kieti jen, tirigi sisip jibet jingon mem Njap dima nittausi lene ma jimbres jenti leu sisar kin mun di kinei di sigi ser jingonti nya hagom ei Allah niyai him leu binhyepo jingon kwes kin Noni.

¹⁵Ma jiba jingon srip huk bipia ide Tuhan om ningon tut je leu binhyepo bon nituti mem gima Noni teu je leu sisar biyai niyaijo nijep bije bit leu nok isut Paulus di ingon kieti nide nipas ei sratti di kes bije tu. Noni pas srat dima tug hon ningon di ki di Allah yai binoni.

¹⁶Paulus pas kep tut mun dini yok ei nide srat nyati. Ba, mun nyeng gom-gom di jo ei nide srat nyati wer nggruk bibor apino yo di ingon mbum nya kin yo di ingon nddong bi nya ikiek-kiek nyen nihyet bit leu ingon kanti. Dinga leu tut gini bi. Lewo yo dima ikiek-kiek nyen Allah nihyet nindigsi nya cem bit leu ingon kanti. Igyai munti dima mibindei sar yok.

¹⁷Disut bat di dingon kieti jen, jikan tut mun dini yok hagom tu. Gima rino ma jitindei ser yo di ingkek ndok tut Allah nicuk yokti leu binhyepo iris je bijicut leu jiya nddongti au.

¹⁸Ma jibikum ei gi jimahanti tug hon ide Tuhan Yesus Kristus di teu nye leu sisar biyai niyaijo nijep binye nisingat tut nyeti. Ma jingon dorti tut Noni dor njiriek bu. Jikwei ba, inggei sut Noni bikon ninyeng mem nijam dini kin nijam di jo ninno bijo kikau! Igbit ri. Nipigo leu dani, Petrus