Read Hatam YOHANES GI NIGOM 2 Bible Online

YOHANES GI NIGOM 2 - Hatam bible

YOHANES GI NIGOM 2

¹Dimunggwom bat jen, dipas kep srat dini bije ser nhyema jibon sisar au. Gino hi bon sisar ne Yesus Kristus di ningon sren-srau ningat rin biya hacan ba, mbrap gau nye ei Allah Noho bei.

²Allah kos ser ide sisar tug hon Kristus Nonti di bindei dino ide sisar pror hak ba, gini mem nyengkom ide sisar he bi noro mem tungwatu nya yahagom ide sisar.

³Gino igyai igbit Allah nicuk nyeti nya ne gini bindo bipia ingon dorti tut Noni mungkun tu.

⁴Gino hi pai “Dingon dorti tut Allah mungkun tu” lo, yai igbit Allah nicuk noti nya bi lene no dima ne niris kep mun cig rin ba, Allah coi ei ningonti bi.

⁵Noro no di yai igbit Allah nicuk noti nya ningon ngakei Allah mungkun tu. Gima bindo bipia igyaijo nok gom kin Allah.

⁶No di pai sut nonti bipia niyaijo nok gom kin Allah lene ma noni yai bram Yesus Kristus niyai kepti.

⁷ Disut bat di dingon kieti jen, srat di dipas kep bak jeni dini ne nicuk nyeti di nijep rin bi. Gini ne nicuk nyeti timiei di itri tut bak jeni habiei ei nimbie him di tibim ei jitingou nsi rin tirigi sindi jingon jo kep Kristus.

⁸Mbro nok gima lo, gini ne nicukti di nijep ri. Kristus niyaijoti kin jeni jiyaijoti hacem ndo brei binye bipia gini ne nicukti di nijit ri. Nidinditi sindi pren sindam ba, nipigati di ningat-ngat sindi com nimig bu.

⁹Ba, no di pai sut nonti bipia mbut mem nipigati lo, ba nitok bak nisut no di Kresten lene no dima mbut mem nidinditi kikau kwei bipek ammani kep yo.

¹⁰No di ningon ngakei nisut no di Kresten no mbut mem nipigati leu api bindei ba, hiter[1] cut ei sisarti bi.

¹¹Noro no di ba nitok bak nisut no di Kresten ningat rin ei nidinditi. Noni mbut mem nidinditi leu api srawir lewo nidinditi bindei ba, niyai tu.

¹²Dimunggwom bat jen, dipas kep srat dini bije lewo Allah kos ser jide sisar drek dip Kristus tu.

¹³Je di andigpoi di jibon jimunggwom bat nya e, dipas kep srat dini bije lewo jingon dorti tut No di ningat rin habiei ei nimbie him kikau kwei bipek ammani kep mungkun tu. Pinjoi pilei jen, dipas kep srat dini bije lewo jibindei cut No Di Sibut tu.

¹⁴Dimunggwom bat jen, dipas kep srat dini bije lewo jingon dorti tut Icig Allah mungkun. Je di andigpoi di jibon jimunggwom bat nya e, dipas kep srat dini bije lewo jingon dorti tut No di ningat rin habiei ei nimbie him kikau kwei bipek ammani kep mungkun tu. Pinjoi pilei jen, dipas kep srat dini bije lewo jisindem cem jipwoi Allah nihyet ei jingonti cem jibindei cut No Di Sibut cem tu.

¹⁵Ma jiba joho rok dihyeisi dini tut mun di joti nya au. No di ba noho rok dihyeisi dini ningon ngakei Allah bi.

¹⁶Lewo mun nyeng hagom di ntun dihyeisi dini him kwei leu Icig Allah bi. Mun dima ne ningut kanti di kinei kin mun di kinei di tungwatu nya ingat ingwes eisi kin ingon jei sut mun di mipror yon hagom ri.

¹⁷Dihyeisi dini bitut mun di tungwatu nya ingat ingwes eisi nya hagom sindi pror. Noro no di yai igbit Allah ningon kanti krau kep niyaijo nijep di jo kikau.

¹⁸Dimunggwom bat jen, nijam dini son dideu njap ningwig honti tu! Jimiap tut No Di Ba Nitok Bak Kristus ninghapti tu. Noni mittau kep nye lo, yo di iba nitok bak Kristus imang bibor ittau kwei su. Gima rino ikan tut bipia nijam dini son dideu njap ningwig honti tu.

¹⁹Yo dini inok gom kin nye di mbusyamei bi. Gima rino ikes nye ei bimbut leu nye tu. Gino inok gom kin nye di mbusyamei ne igwam bit nye kikau kwei bipek ammani kep. Noro ikes nye bimbut leu nye tu ba, gini bindo bipia inok gom kin nye bi.

²⁰Noro jiyai Allah Ninnei di Yesus Kristus kes nyahan ei jingonti tu gima rino jahagom jingon dorti tut nihyet di nijit.

²¹Gima rino dipas kep srat dini bije drek dip jide ningon di mbum tut nihyet di nijitti bi. Noro dipas kep srat dini bije lewo jingon dorti tut nihyet di nijit. Ba, jikan tut bipia niris srig nihyet di nijitti bi.

²²Niris kep mun cig ne no di tri tut bipia Yesus ne Nibou Ndig di teu tungwatu nya biyai niyaijo nijep biyok rin bi. No dini ne No di Ba Nitok Bak Kristus rin lewo noni rok Icig Allah kin Nipmot yahacem.

²³No di rok Nipmot rok Nicig cem. No di cigit Nipmot ei ningonti cigit nicig cem.

²⁴Gima rino ma jinyohou nihyet di jimiap habiei tirigi sindi jingon jo kep Yesus ei jingonti. Gino jinyohou nihyet dima ei jingonti ne jiyaijo nok gom kin Nipmot kin Nicig yahacem kikau.

²⁵Kristus nonti preu ei mem nye tut niyaijo nijep di jo kikau.

²⁶Dipas kep srat dini tut yo di ibrim ingkek mem gima iris je nya.

²⁷Noro tut jenti ne Kristus kes Allah Ninnei nyahan ei jingonti tu ba, jisuar hiter mem gima pingok jingonti tut mun nyeng hi kin bi. Allah Ninnei ne nijit rin bipingok jingonti tut mun nyeng hagom. Nibicumti srig Nide nipingokti dima bi sren. Gima rino ma jibit Allah Ninnei nipingok jeti ba, jiyaijo nok gom kin Kristus.

²⁸He dimunggwom bat jen, ma jiyaijo nok gom kin Kristus leu binhyepo tirigi ttou bou dem mem Noni ttau hanyen kwei lo, no sisip ibrim ingkek yo ba, immai sut nyenti ei Noho bei bi.

²⁹Jikan tut bipia Kristus yai mun bibit leu Allah ningon kanti mem Noni. Gima rino ma jiyok ngon kep bipia bikwop no di yai mun bibit leu Allah ningon kanti ne Allah nimunggwom ri.