Read Hatam NIJAM NIKEI NYA 11 Bible Online

NIJAM NIKEI NYA 11 - Hatam bible

NIJAM NIKEI NYA 11

¹Yefta ne tentara di mimbri kui ningkek ri. Noni bong ei Gilead ba, nicig ninyeng Gilead noro nipmem ne sop sundal.

²Gilead nitnem yai nipmot bat hi kin bu bak noni. Tirigi nipmot bat dima yok imahan tu lene ijji Yefta leu ig bei ba, ipai bak “Nani mporo aba nakep mun ninda rom hi leu arig bi. Lewo sop hiter srek tut nani bak arigya.”

³Gima rino Yefta mbres nonti leu nikindig bat-nikinjoi bat nya ba, ug bong ei hanjop Tob. Lene yo di isibut nya nimpung gom ibicom yam bit noni ei sirima. Leu api iba isibut bipos ndigban leu tungwatu nya ninyen.

⁴Njap poi ser lene mben Amon injei siceu ba, ihwen mben Israel.

⁵Mpe di mun dima cut igkep yok lene nibou mben Israel di ibong ei Gilead nya yuug ei minu mien Tob binggok Yefta lene ibidip huk noni leu binhyepo ngkwei hanyen,

⁶bipai bak “Akwei bie tut nye ba, ihwen bit mben Amon.”

⁷Noro Yefta buhup “Apo jahagom jingon kinei sut da bijijji da cem leu dicig de ig bei tu pima bi e? Leu api nggon rino nogindini tirigi juum mun di buhun tak je leu api jikwei hara da i?”

⁸Lene ibuhup “Nyeni nikwei ngat na nogindini lewo nikos tut bipia suar abie tut nye di limwa Gilead nahagom ba, ikon pran bit mben Amon.”

⁹Lene Yefta buhup “Gino jibidip huk da leu binhyepo dingkwei hanyen ug ei Gilead ba, ikon pran bit mben Amon leu api TUHAN bindei ba, ibindei timek yok lene dani rima dinyeng tak kep jahagom.”

¹⁰Lene ibuhup hanyen “Nice tut angon kanti dima. TUHAN ngat gima bou niyai him tu.”

¹¹Lene Yefta kiju bibit nibou Gilead nya leu api limwa Gilead nya ikon noni nok no di ninyeng tak kep yok lene nok nibou pran di bie tut yok cem. Lene Yefta ndat kep nikos tutti nya poi bak nide limwa Gilead nya ei TUHAN Noho bei ei minu mien Mizpa.

¹²Gima leu lene noni sok nihyet bak nibou ndig mben Amon leu binhyepo ihig ser noni “Nitunggwei sut mindei apino jikon pran bit nye ei nyende minu dini i?”

¹³Lene nibou ndig mben Amon buhup bak yo di Yefta pinak yok kwei pima “Tirigi po mben Israel ikwei leu minu Mesir pima lene ipos nyende dihyei hanjop nsi leu nye bigyati. Ba, ipos hanjop nsi ei Minyei Arnon nyai kikau ug bipek kin Minyei Yabok nyai kin Minyei Yordan nyai. Nogindini ma jiba jingon di kwes kin nye bitug dihyei hanjop nsi dima hagom hanyen binye bihigom.”

¹⁴Yefta miap nihyet dima tu lene cuk tungwatu nya ibou poi hanyen biyuug ngat nibou ndig mben Amon ba,

¹⁵ibuhup bak “Nye di mben Israel nigipos mben Moab kin mben Amon ide dihyei hanjop nsi leu yok bi sren.

¹⁶Mpe di po mben Israel ikiju leu minu Mesir pima lene imbut ba, injiriek iggum ndigsi ba, yuug ei Muk Nuhuisi Akaba kikau biyuug krau Kades.

¹⁷ Leu api isok ighyet bak nibou ndig mben Edom biyahara mem noni leu binhyepo gino noni ce tut lene ma mben Israel ibikwam binjiriek nide minu kwei ndam minu dini. Noro noni ce tut bi. Leu api yahara nibou ndig mben Moab cem bu noyam kin gi pima noro noni cem ce tut bi. Gima rino mben Israel ibong ei Kades.

¹⁸ Leu api ibinut nimbut bu ba, ikes yok kak iggum ndigsi lo, imbut bijiriek minu Edom kin Moab bi. Noro imbut ba, isir kikau biyuug krau minu Moab nite bei mpia nipriti ei Minyei Arnon nite dima ug. Lene yohok ide prak meng yati ei sirima noro igisigon minyei Arnon biyuug dihip ei nite dima ug bi. Lewo minyei dima ne minu niya kwas yamti mem minu Moab ninyeng tak kepti ri.

¹⁹ Gima leu lene mben Israel isok ighyet bak Sihon di nibou ndig Amori ei Hesybon ba, yahara noni bipia gino ce tut lene mben Israel ibikwam hanjop Amori biyuug kikau ug ei yonti ide minu nijep di isuar nuug ei.

²⁰Noro Sihon ce tut bi. Lewo giba ningon com yok tut gi ipai bipia ibikwam nide hanjop nsi he dima bi. Leu api Sihon ya tut nide tentara nya yahagom ba, ibicom yam ei Yahas leu api ikon pran bit mben Israel.

²¹Noro TUHAN Allah di mben Israel ide bindei ba, tentara Israel ibindei timek Sihon kin nide tentara nya. Lene icoi bigyai mben Amori ide minu hagom bigyati.

²²Leu api itug ndei dihyei di mben Amori inyeng tak kep dima ba, ikieng kep. Minyei Arnon nyai di minu niya kwas yamti nite bei mpia nibiho lene Minyei Yabok nyai bon minu niya kwas yamti nite bei mpia nijjai. Lene ninyanti bon nohon keti ei iggum ndigsi nite bei mpia nipriti ba, kikau kwei bipek Minyei Yordan nite bei mpia nicutti.

²³Ba, TUHAN Allah mben Israel rino jji mben Amori leu minu dima biyai hagom bak Nide limwa di mben Israel.

²⁴Leu api nogindini abingon ei mem gima abrim dihyei dima hanyen bu e? Suar jima dihyei di jide kwar Kamos yai bije bou je nok jide hak. Noro nyeni miniya ngkiem ser dihyei di nyende TUHAN Allah yai binye tu.

²⁵ Akan bipia anyeng jei dor njiriek Balak di nibou ndig mben Moab di Zipor nipmot e? Noni gikon pran bit nye bihwen nye bi sren.

²⁶Nye di mben Israel nihwen biniyai minu ndig Hesybon kin Aroer kin minu mien di jo ttai nya kin minu ndig hagom ei Minyei Arnon nyai ba, niyati kikau mem nijam ari bingwam sratus ningai su. Leu api nggon rino abrim minu ndig nya kin dihyei hanjop nsi dima titut yam hanyen mem nijam ari bingwam sratus ningai dima bi i?

²⁷Nyeni nibon mun tunggwei sut nani bi. Gino ahwen nyeni lene ayai mun tunggwei sut nyeni tu. TUHAN rino nikei di njap di ammani mikos tut munhyet dini ei nye di mben Israel kin je di mben Amon ikieti.”

²⁸Lene nibou ndig minu Amon nihyet sem tut Yefta nihyet di sok ei yo dima dip kwei bak dima.

²⁹Gima leu lene TUHAN Ninnei sindem tut Yefta leu api noni ug cem timiei hanjop Gilead kin Manasye nya. Leu api ngkwei hanyen ug ei Mizpa ei Gilead. Lene mbut nut bu leu sirima buug ei mben Amon ide dihyei hanjop nsi.

³⁰Yefta preu ei bak TUHAN “Gino asindem tut da ba, dibindei timek mben Amon leu ba,

³¹dingwes ngun bidikwei hanyen lene tungwa tou rino hei nimbie him ngat leu ditde ig nuhui bikwei ya um da lene midikwas gima pijum bak TUHAN bihigom.”[2]

³²Leu api Yefta nya isigon Minyei Yordan biyuug dihip ei nite hi bikon pran bit mben Amon. Lene TUHAN bindei ba, noni kin nide tentara nya ibindei timek mben Amon ba, isar ningwig a.

³³Yefta hwen yok ba, imai ningwig ei Aroer kikau bipek kin hanjop di jo ttai Minit ba, bitut minu ndig ningat nyatungwagom kikau bipek kin Abel-Keramin. Tentara Israel ibindei timek mben Amon bigyai nimai bak imang bibor.

³⁴Tirigi Yefta ngkwei hanyen kwei ei Mizpa lene nipmisop misop gwam nitta pilei kwei ya um noni bingon-mingon ba, bibui mun di nggileng cem. Noni ne Yefta nipmisop di nimig gom ngat ri.

³⁵ Tirigi Yefta niyai ttem nipmisop dip lene ba ningon di ngguk bibor bibindei rik nide sinsun rok him bipai “Ayo, dipmisop ndia ug o! Abindei bidingon ngguk bibor. Nggon rima abindei bidingon ngguk bibor i? Dipreu ei bak TUHAN tug hon neheng ba, bit bon dinggek dingon tut gi preu dima kan bi.”

³⁶Leu api nipmisop pai bak nicig “Arig e, gino apreu mun nyeng hi ei bak TUHAN tug hon neheng apino TUHAN mibindei di Arig bindei timek Arig de siceu di mben Amon di isibut bibor tu lene ma Arig yai igbit Arig de nipreu bak TUHANti pima hak ug.”

³⁷Lene nipmisop binut nihyet hi kin bu “Noro dahara nani mem mun nyeng gom ngat. Ma ayai nitutti bed can bida ba, dimbut-mbut nyen bit disut bat nya ei nungug him ug e. Ba, midipim tut dipileisi bit disut bat nya kak dimbutti. Lewo ningat lene mporo dimai dipilei leu ba, diwak dijjep bidiyai dimunggwom bat nya bi.”

³⁸Lene nicig ce tut ningon kanti bikes nipmisop ba, mbut ug. Gima rino noni ya tut nisut bat sop gwam nitta pilei nya ba, imbut-mbut nyen ug ei nungug him bipim tut nipileisi kak nimbutti mem ninsi bed can. Lewo noni mimai leu ba, wak nijjep biyai nimunggwom hi ei bi.

³⁹Tirigi bed can pima ngwig leu su lene nipmisop ngkwei hanyen leu api nicig yai igbit mun di preu ei bak TUHAN pima. Gima rino misop dima mai tirigi gwam nitta pilei. Niyai munti dima ne midut di mben Israel ibon kikep ngan-ngan nimbie him rin apino,

⁴⁰sop gwam nitta pilei mben Israel induk yam ei mem njap bitai bikwop ari bingwam hagom bimbut-mbut nyen ba, yuhuk ingon di ngguk leu binhyepo ibigyok ngon kep Yefta po mben Gilead pima nipmisop.