Read Hatam NIJAM NIKEI NYA 12 Bible Online

NIJAM NIKEI NYA 12 - Hatam bible

NIJAM NIKEI NYA 12

¹Mpe dima lene tentara Efraim injei siceu mem gima ikon pran bit mben Israel ba, isigon Minyei Yordan biyuug dihip ei nite hi. Lene yuug kikau ei Zafon bipai bak Yefta “Nggon rino aug kon pran bit mben Amon leu api agijem nyeni cem kwei binibit na bi i? Nogindini nyeni minindig nani bitut ade ig bei nsi nya jahagom ningwig a.”

²Noro Yefta pai biyok “Pran ndig di buhun bibor dini ngot mben Amon kin nye di timiei Gilead. Leu api dijem je leu binhyepo jikwei mpu da bijiteu da leu mben Amon inda nsi lo, jigikwei mpu nye bi.

³Gima rino tirigi dingat lo, jikwei mpu nye bi lene dikos tut bipia nyengkom nuug kon pran bit mben Amon. Gino dimai drek dip lo, nna ug. Leu api TUHAN bindei ba, dibindei timek yok. Nggon rino jikwei hwen da nogindini i?”

⁴Leu api Yefta nduk tentara Gilead nya ba, ikon pran bit tentara Efraim bibindei timek yoni. (Keret Efraim ipai kep yok nipou su “Je di mben Gilead kin Manasye jikes nye ei ba, jimbres jenti leu nye di keret Efraim di jintun him!”)

⁵Tentara Gilead di ikon pran dima ijuk bigya ser mpia di isigon kep Minyei Yordanti nya ei nite dini kwei. Igya ser nok gima leu binhyepo ikat tentara timiei Efraim di inang bisigon nya. Mpe di tentara timiei Efraim gom kwei hara yok mem gima isindui sut ba, sigon minyei buug dihip ei nite dima ug biningwes ngun lene tentara Gilead ihig ser noni “Apo atimiei leu Efraim e?” Lene gino buhup biyok “Dintun keret Efraim him bi,”

⁶lene icuk noni bindat kep “Syibolet”. Noro niji kipa tut kata dima bindat mungkun bi bindat “Sibolet.” Lene tentara Gilead ikat noni bigyai nimai bak ei mpia ttou nsi gom di tungwatu isigon Minyei Yordan kikepti dima. Apino tug hon nisinati dima ne igyai nimai bak tentara timiei Efraim ibou sribu ningot bitai can.

⁷Yefta nok nibou di bie tut mben Israel mem nijam ari bingwam muhwindagom. Leu api noni mai lene itig ei nitimieisi minu ndig Mizpa ei hanjop Gilead.

⁸Tirigi Yefta mai leu lene Ebzan leu Betlehem nok nibou ba, bie tut mben Israel bu.

⁹Ebzan yai nipmot bat nya ibou ningot ningai. Lene bon nipmisop bat nya cem ibou ningot ningai. Noni ndo nipmisop bat dima yok bak yo di intun keret hiter him nya. Lene buwak sop gwam nitta pilei ibou ningot ningai leu yo di intun keret hiter him nya bindo yo bak nipmot bat nya. Ebzan bie tut mben Israel mem nijam ari bingwam muhwindacan,

¹⁰leu api mai ba, itig ei Betlehem.

¹¹Tirigi Ebzan mai leu su lene Elon di ntun keret Zebulon him nok nibou di bie tut mben Israel mem nijam ari bingwam simnai bu.

¹²Leu api noni cem mai ba, itig ei Ayalon ei keret Zebulon de dihyei hanjop nsi.

¹³Tirigi Elon mai leu su lene Abdon di Hilel leu Piraton nipmot nok nibou di bie tut mben Israel bu.

¹⁴Noni yai nipmot bat nya ibou ningot bitai kin nignyon bat nipinai nya cem ibou ningot ningai. Yo dini inyeng tut ide keledai di ibri kep bigwam dip gom-gom bidem yok. Abdon bie tut mben Israel mem nijam ari bingwam muhwindaningai.

¹⁵Leu api Abdon cem mai lene itig ei Piraton ei keret Efraim de dihyei hanjop nsi ei nungug him di mben Amalek ide.