Read Hatam NIJAM NIKEI NYA 13 Bible Online

NIJAM NIKEI NYA 13 - Hatam bible

NIJAM NIKEI NYA 13

¹Mpe dima lene mben Israel ibon sisar tut TUHAN hanyen bu apino Noni sindui sut mben Filistin inyeng tak kep yok mem nijam ari bingwam ningot bitai.

²Lo bi lene Manoah di ntun keret Dan him bong ei Zora. Noni wak nitnem lo, nitnem pijet kikau kwei bipek njap dima kep.

³Mpe di gom ne TUHAN de malaikati tau kep Manoah nitnem bipai bak “Ningat ne kwei bipek njap di ammani kep lene apijet yo. Noro jei bi lene ma anghop tut munggwom nipinai.

⁴Noro hon kep ammani kui ma asok kep ser nanti lene ma adut ba anggur ningei kin pes au. Nok gima cem ma ayem njita di tungwatu nya ipigig ser au.

⁵ Niabiati asrek tut apmot lene ma akos nibou nta au. Lewo TUHAN dimig apmot ei mem Nonti ba, noni micoi bit nimpung nazir[3] habiei leu nipmem ninghopti. Noni mikinyon ei midyai dino teu mben Israel bingwes ngun leu mben Filistin indati.”

⁶Lene sop dima ug pai bak nijjep “Allah pinak tungwagom bikwei ngat da bidingat lo, niimaisi dem kep nok malaikati leu gwamti apino dittin nindig bibor. Dihig ser noni tut nikwei leusi bi lene noni ndat kep ninyeng bida cem bi.

⁷Noro pai bida bipia jei bi lene midisrek tut munggwom nipinai. Lene pai ser da bipia mididut ba anggur ningei kin pes au. Lene ma diyem njita di tungwatu nya ipigig ser au. Lewo Allah dimig dipmot ei mem Nonti nok no di coi bit nimpung nazir kikau bipek niyaijo ningwig honti.”

⁸Lene Manoah ngat nadi bak TUHAN bipai “TUHAN e, gino ajoi sut lene ma asindui sut Ade awak pima kwei hanyen bipingok nyeni ningonti tut notou nibibon nyeni nipmot tirigi ditnem srek tut noni ug e.”

⁹Lene Allah buhup igbit Manoah de nadi leu api Nide malaikati tau hanyen kep Manoah nitnem tirigi noni gwam nyahan ei beisi noro nijjep ningat rin bit noni bi.

¹⁰Gima rino noni dor buug ngat nijjep bipai bak “Akwei ngat i! No po tau kep da acan pini tau hanyen kwei su.”

¹¹Manoah kiju bibit nitnem lene um no dima bihig ser “Na po ambrap bit ditnem pima rin e?” Lene no dima buhup “I, igbit ri.”

¹²Lene Manoah hig ser noni “Tirigi tto bou dem mem apaisi dima lene mininggon ndei nyeni nipmot i? Ando igbit angon kanti tut niyai munti nya bi nye.”

¹³Lene TUHAN de malaikati buhup “Suar atnem yai bit leu nok dipingok noti hagom.

¹⁴Ma noni dut ba anggur ningei kin pes au. Lene biyem njita di tungwatu nya ipigig ser cem au. Suar noni yai bit leu nok dipingok noti hagom.”

¹⁵Manoah kan tut no dima ne TUHAN de malaikati rin bi. Gima rino pai binoni “Gino ajoi sut nye lene ma agwam mbigom kin bu leu api nuug bui kambir nehen pap ningut gom binibam mem nani ug e.”

¹⁶Lene malaikati dima buhup “Mbro nok gino digwam mbigom ei mpia dini lo, midiyem kep mikwau dima bi. Nna ba gino ajoi sut abui mikwau lene kei noro ma jindig hagom ei nimbar hum dokti nok mun di jikwas tut TUHAN.” Mpe dima Manoah ningon hukti tut gi mbrap bit noni ne TUHAN de malaikati rin bi.

¹⁷Gima rino Manoah hig pus noni “Ma andat kep anyeng brei binye leu binhyepo tirigi mun dini yok dem igbit apaisi lene mininggei sut na.”

¹⁸Lene TUHAN de malaikati buhup “Nggon rino jihig ser da tut dinyeng i? Lewo dinyeng mindur.”

¹⁹Gima rino Manoah ug bui kambir nehen pap ningut gom biyai gandum poi kwei leu api kes hagom bijo ei tig ninjek dip nok mun di noni pigig sut ei mem TUHAN. Lene TUHAN bon mindur bou Manoah kin nitnem igyai him.

²⁰Hum di cig-cai sror kui leu tig di nok nimbar hum dok dima lene TUHAN de malaikati cem kui ug ei gwamti srig hum njeng dimati. Tirigi Manoah nya ingat gima tu lene iba ingwak bikik dihyei.

²¹Malaikati dima tau kep yok hanyen bu bi lene jo nibreisi mem yok bipia noni ne TUHAN de malaikati ri.

²²Gima rino Manoah pai bak nitnem “Ayo! Misitug ndei nimai lewo singat Allah bou siyai him tu!”

²³Noro nitnem buhup “Gino TUHAN miyai nimai bisa lene noni mice tut mun po sikwas tut noni ei nimbar hum dokti pima ba, mindo mindur dini kin ningon kanti brei bisa nogindi pa bi.”

²⁴Lene sop dima srek tut nipmot bijem ninyeng Simson. Tirigi munggwom dima ndig su lene Allah njei mun di kei bak.

²⁵Mpe di gom tirigi Simson ningat rin ei keret Dan ide prak meng yati ei Zora kin Esytaol nikieti lene noni sindi yai nisindemti leu TUHAN Ninnei.