Read Hatam NIJAM NIKEI NYA 14 Bible Online

NIJAM NIKEI NYA 14 - Hatam bible

NIJAM NIKEI NYA 14

¹Mpe di gom bu ne Simson ug ei Timna lene ngat sop gwam nitta pilei mben Filistin gom ei sirima.

²Tirigi noni ngkwei hanyen ug ei nide ig bei lene pai bak nicig nipmem nya “Dijoi sut sop gwam nitta pilei mben Filistin gom ei Timna. Juug hig yok tut noni lewo dikos tut bipia midiwak noni nok ditnem.”

³Noro Simson nicig nipmem nya ihig pus noni “Nggon rino aug nggok atnem ei mben Filistin di icoi nibon midut sunat bi nya ikieti i? Ajoi sut sop di mben Israel di tig mbier tut nye bi e?” Noro Simson brim ningkek kep nicig bidip huk noni “Dikos tut bipia midiwak sop gom ngat dima nok ditnem. Gima rino suar juug hig ser yok tut noni lewo dijoi sut noni bibor.”

⁴TUHAN bie tut Simson niyai munti dima noro nicig-nipmem nya ikan tut bi. Lewo TUHAN sindi nggok nituti mem gima Noni hwen mben Filistin. Mpe dima lene mben Filistin inyeng tak kep mben Israel.

⁵Gima rino Simson kin nicig-nipmem yoni yuug ei Timna. Tirigi imbut ug ei puig sinon ei ba anggur nghousi gom lene Simson miap mindhe singa di nehen pap yau nindig bibor.

⁶Lene TUHAN sindem tut noni kros leu api noni ug kat singa dima leu api ba ninda bibrim bitun hak tereu nok gi po brim kambir nimien bitun kukiau. Tirigi noni kwei ngat nicig-nipmem nya hanyen lene pai sut niyai munti dima biyok bi.

⁷Lene Simson ug um sop pima ba, imbrap bit yam apino Simson joi sut noni bibor bu.

⁸Njap poi ser lene Simson ngkwei ug ei Timna mbigom kin bu leu binhyepo wak sop dima nok nitnem. Tirigi noni mbut ei puig sinon lene noni kriau ug ei susti binggok ser singa po noni bui pima bingat lo, ahwei lon mang bibor bimbu kep ninjum binju ahwei lon ningei eisi.

⁹Gima rino noni kam ahwei lon ningei pima ba, yem kak nimbutti. Lene noni ug ngat nicig nipmem nya ba, yai hi bak yoni cem bigyem. Noro noni mbot kep tut ahwei lon ningei di noni kam leu singa ninjum dima biyok bi.

¹⁰Tirigi Simson nicig ug cem kep sop dima ei nide ig bei leu su lene Simson bon pesta mem yok ei sirima bit leu nok pinai pilei di mben Filistin igyai kepti.

¹¹Tirigi mben Filistin nindigsi ikan tut gini tu lene ipinak pinai pilei ibou ningot ningai ug ei ig bei dima leu binhyepo igwam bit Simson.

¹²Lene Simson pai biyok “Gino jibuhup nihyet nibiti ninda dini igbit mem njap muhwindacan nipou tirigi igyem pesta bingwig bigyo lene midiyai minyahas linen di dia-diau kei gom kin sinsun nimig-ninda gom ba, dibikwop jahagom.

¹³Gino bit bon jibuhup nihyet nibiti nindati dima kan bi lene suar jiyai minyahas kin sinsun noyam kin gima yok hagom bida.” Gima rino pinai pilei pima yok ibuhup “Nice tut ba, apai nihyet nibiti ninda dima binye hak ug.”

¹⁴Gima rino Simson pai nihyet nibiti ninda, “Njita di tungwatu nya igyem hei leu mun di yem njita ninsi. Mun di nyop hei leu mun di sindem bibor.” Lene ug ei njap ningai bu noro bit bon hi buhup Simson nihyet nibiti nindati dima kan bi.

¹⁵Ug ei njap nibitai lene pinai pilei pima yok ibidip huk Simson nitnem bipai “Aba ahyet mmau biris ajjep leu binhyepo noni mimbot kep tut nihyet nibiti nindati pima binye. Gi bi lene minindig acig de ig bitut nani cem. Jo nibreisi bipia anduk nye kwei mem pesta dini leu binhyepo bon nituti mem gima jipos nyende ndigban bingwig leu nye ri.”

¹⁶Lene Simson nitnem ba niyai nggwei di kibor bilua binoni bipai “Angon ngakei da bi! Angkek ndok tut da lewo apai nihyet nibiti nindati dima bak disut bat nya tu noro ambot kep tut ningat bida bigyo!” Lene Simson buhup “Abet angon mbigom ug e lewo dimbot kep tut nihyet nibiti nindati dima bak dicig dipmem nya cem bigyo. Nggon rino midimbot kep tut bina i?”

¹⁷Lene nitnem niyai nggwei kibor drek dip kikau mem nijam di ibon pesta mem mmun-njap muhwindacan dima. Hon kep njap gi nimuhwindacan lene Simson mbot kep tut nihyet nibiti nindati dima ningat bak nitnem lewo noni bidip huk noni bijo ninno tu. Lene nitnem ug mbot kep tut nihyet nibiti nindati dima ningat hanyen bu bak nide bat mben Filistin nya.

¹⁸Gima rino hon kep njap gi nimuhwindacan nipou tirigi mpia kimbas bigyo lene tungwatu nya ei minu dima ikwei simbot dat bak Simson bipai, “Mindei rinyop kei dor njiriek ahwei lon ningei i? Mindei risindem bibor dor njiriek mindhe singa i?” Lene Simson buhup “Gino jibidip huk da tug hon ditnem bi lene bit bon jibuhup nihyet nibiti nindati dima ningat cem bida kan bi.”

¹⁹Lene TUHAN sindem tut Simson kros leu api noni dor ug ei minu ndig Askelon lene bui timiei minu dima ibou ningot ningai bimai. Lene noni juk ide sinsun di nibok kak bibor leu ingut bipwoi kwei lene yai bak yo po imbot kep nihyet nibiti ninda ningat bak tu pima. Niabiati bu lene noni ba ningon di sibui bibor bingkwei hanyen ug ei nitimieisi.

²⁰Lene Simson nipmang ndo nipmisop pima bak no di ya kui Simson mpe di po ibon pesta niwak yamti pima binok nitnem bu.