Read Hatam NIJAM NIKEI NYA 15 Bible Online

NIJAM NIKEI NYA 15 - Hatam bible

NIJAM NIKEI NYA 15

¹Njap poi ser bu tirigi tto bou dem mem ike gandum nintam ei beisi lene Simson ug ngat sop po noni kan bigya nitnem rin pima hanyen bijem kambir nehen pap ningut gom binoni. Lene pai bak nipmang “Dijoi sut dicoi ug ei ditnem nide nghim nsi mbigom ug e.” Noro nipmang ggai ser Simson.

²Bipai binoni “Dikan bigya angon sibui sut atnem bibor. Gima rino dindo noni bak asut pima tu. Nna ba ayai nikinjoi biluei nikindig nohoti bu lewo nikinjoi ne sop di ubbu ngat ri.”

³Lene Simson buhup “Midibindei ba, mun di buhun bibor micut igkep je di mben Filistin ug ri. Noro midibiang diyai munti dima nibuhunti bi!”

⁴Lene noni ug bikat nsien mbrei ei bigbehei ningut sratus ningai bingot nsien ningut can dima ipu kin yam leu api bingot hyem kin ipu nya.

⁵Leu api tit hum bipindei hyem dima hagom binjeng lene kes nsien dima hagom binang ug ei mben Filistin ide beisi di gandum joti. Tug hon nisinati dima lene noni bindei ba, hum yem gandum di yo dima ike nintam ei su bitut niken di jo bidem beisi nya hagom bingwig. Lene hum dima yem biei zaitun nghousi nya cem hagom bingwig.

⁶Tirigi mben Filistin ihig pus yam tut no di bindei lene imiap tut bipia Simson rino pindei drek dip gi nipmang di mben Timna pima ndo Simson nitnem bak no di ya kui Simson mem pesta niwak yamti pima. Gima rino indig Simson nipmang de ig bitut sop dima cem kep hum bingwig.

⁷Lene Simson pai bak yo dima “We! Jibuhup binye tug hon nisinati dima e? Dipai tug hon neheng bipia midingon jo nyahan bi bibou dibirop hanyen bije tut jiyai munti dima ug e.”

⁸Lene noni ba nide nisindemti di mindur bihwen yok bibui imang bibor bimai. Lene kes yok ei bimbut ug ei hak mihyeti gom ei nungug tig Etam bibong ei sirima.

⁹Mpe di gom bu ne mben Filistin ikwei hok ide prak meng yati ei hanjop Yehuda leu api ihwen mben Lehi.

¹⁰Lene keret Yehuda ihig ser yok “Nggon rino jihwen nye i?” Lene mben Filistin ibuhup “Nibungwam mem gima nikat Simson leu api nibibon noni noyam kin noni bibon nyeni nipou su.”

¹¹Gima rino tentara keret Yehuda ibou sribu ningai induk yam biyuug ei hak mihyeti ei nungug tig Etam pima leu api ipai bak Simson “Andigpoi e, akan tut bipia mben Filistin inyeng tak kep nye bi e? Anggon ndei nye i?” Lene noni buhup “Dibibon yoni noyam kin gi po ibibon dani.”

¹²Lene ipai binoni “Nikwei kat na ba, ningot amig-anda leu binhyepo nikes na ei indati.” Lene Simson buhup “Ma jipreu ei mem da bipia gino jingot dimig-dinda lene mijibui da bidimai bi.”

¹³Lene ibuhup “Dwai! Miningot amig-anda he leu api minikes na ei mben Filistin indati. Noro miniyai nimai bina bi.” Gima rino iba kuk di ngun-ngau bingot noni bibuwak noni hanyen kwei leu hak mihyeti dima.

¹⁴Tirigi yoni ingkwei hanyen ug ei minu mien Lehi tu lene mben Filistin idor kwei ndam Simson bimbos-hi-mbos. Lene TUHAN sindem tut noni lene noni bindei ba, kuk di ngun-ngau pima tun bingwig leu nimig-ninda dem kep nok mong mbrei di hum yem.

¹⁵Lene noni ngat keledai niji njum gom di kroi bigyo ei dihyeisi lene ba ninjum dima bibui mben Filistin ibou sribu gom bimai bingwig.

¹⁶Leu api noni pai doia gom nok gini, “Diba keledai niji njum gom biyai nimai bak tungwatu nya ibou sribu gom. Diba keledai niji njum gom binju ingut keyam bijo-jo yam dip.”

¹⁷Gima ngwig leu lene noni com keledai niji dima ei. Mun dini pek kep mem yok ei Ramat-Lehi.

¹⁸Lo bi lene Simson nggobiau bibor. Gima rino hara TUHAN bipai “Nani abindei mben Filistin imang bibor dini icut bida tu noro nogindini midimai dinggobiau leu api mben Filistin di ikan tut Nani bi nindigsi nya mikwei kat da.”

¹⁹Lene Allah bindei ba, minyei bousi gom biam kwei leu hak mihyeti ei Lehi. Lene noni dut minyei biyai nisindemti hi kin bu. Gima rino tungwatu nya ijem minyei bousi dima ninyeng Minyei Bousi Hakor ba, minyei dima biam kikau kwei bipek ammani kep.

²⁰Simson bie tut mben Israel mem ari bingwam ningot can ei nijam di mben Filistin inyeng tak kep yok.