Read Hatam NIJAM NIKEI NYA 17 Bible Online

NIJAM NIKEI NYA 17 - Hatam bible

NIJAM NIKEI NYA 17

¹Mpe dima lene pinai gom di ninyeng Mikha ningat rin ba, bong ei nungug him ei keret Efraim ide dihyei hanjop nsi.

²Mpe di gom ne pai bak nipmem “Amei e, tirigi po amei de mitiei perak nitig sribu gom ba, sratus gom pror pima lene dimiap ade nisigion no di nggimang mitiei dimati. Amei e, angat i! Ade mitiei pima rini. Dani rino dinggimang mitiei dima.” Lene nipmem buhup “Dipmot na e, nnaba, TUHAN ma njei mun di kei bak nani!”

³Mikha tug mitiei dima hanyen bak nipmem leu api nipmem pai “Dipmot na e, kei mem dikwas perak dini tut TUHAN leu binhyepo aba biei bibon kwar lene aba mitiei perak binggai kwar dima titut yam bingkiem. Tug hon nisinati dima lene angwes ngun leu nisigionti po dindat pima. Gima rino diyai mitiei dima hanyen bina.”

⁴Noro Mikha yai mitiei dima hanyen bak nipmem leu api nipmem kwas mitiei perak dima nitig sratus can buug sut bak tukan diba perak bibon mun. Leu api cuk tukan dima leu binhyepo noni ba biei ttou gom bibon kwar leu api ba mitiei perak binggai kwar dima titut yam bingkiem. Kwar dima put leu api itas pijum ei Mikha de ig bei.

⁵Mikha nonti tin ei nide mpia di kuk no bak Allah eisi gom mem nonti tu. Noni bon kwar nya poi kin efod gom cem.[4] Leu api dimig nipmot gom ei nok imam.

⁶ Ei nijam dima ne nibou ndig hi ninyeng tak kep mben Israel bi. Apino bikwop tungwagom-gom bon mun di kan bipia mun di igbit bit leu nonti ningon kanti.

⁷Mpe dima lene pinai pilei gom di ntun keret Lewi him cem no rinaha. Nipou yo lene noni bong ei Betlehem ei keret Yehuda de dihyei hanjop nsi.

⁸Noro tini bu ne noni jo leu minu ndig dima ba, mbut-mbut nyen binggok mpia hiter bu mem gima bong niti. Mbut lene kwei krau Mikha de ig ei nungug him keret Efraim de dihyei hanjop nsi.

⁹Lene Mikha hig ser noni “Disut na e, akwei leu hantou i?” Lene no dima buhup “Dintun keret Lewi him bidikwei leu Betlehem ei keret Yehuda ide dihyei hanjop nsi. Ba, dinggok-nggok nyen mpia dima dibong niti yo.”

¹⁰Lene Mikha buhup “Ma akwei bong bit da hak ei sirini leu binhyepo apingok kep dingonti ba, abinok nyende imam cem. Lene midikwas kep mitiei perak nitig simnai tut na bikwop ari bingwam ba, midiyai sinsun kin njita cem bina.”

¹¹Lene pinai pilei di ntun keret Lewi him dima ce tut Mikha nihyet leu api Mikha kon binok nide imam. Lene Mikha ubon noni tereu nok nipmot ningat bibong bit noni.

¹³Leu api Mikha pai “Nogindini dikan tut bipia TUHAN minjei mun di kei bak dani drek dip no di ntun keret Lewi him di nok imam mem da.”