Read Hatam NIJAM NIKEI NYA 18 Bible Online

NIJAM NIKEI NYA 18 - Hatam bible

NIJAM NIKEI NYA 18

¹Ei nijam dima ne nibou ndig hi ninyeng tak kep mben Israel bi. Mpe dima lene keret Dan nya inggok-nggok nyen dihyei hanjop nsi di minok ide minu di yonti inyeng tak kep. Lewo igitug ndei dihyei hanjop nsi hi bit mben Israel ei keret nindigsi nya ikieti bigyo.

²Gima rino keret Dan idimig yo di mimbri ngat nya ibou muhwi leu ide bat nya di ibong ei Zora kin Esytaol. Leu api icuk yok leu binhyepo igyok itta kep minu dima nisurti-nipekti. Yo dima ikiju bimbut leu api yuug krau nungug him ei Efraim de dihyei hanjop nsi bibong bit Mikha ei nide ig bei.

³Tirigi ipi bicoi ug ei ig dima lene imiap pinai pilei di ntun keret Lewi him pima nimbrapti lene ikan tut noni. Gima rino yuug ngat ba, ihig ser “Anggon ei sirini i? Ayai kep mindei ngan i? Tou ribuwak na kwei i?”

⁴Lene noni buhup “Dingat rin ei sirini drek dip Mikha. Noni rino dimig da ei bidinok nide imam lene ditug ndei mitiei mem midyai di diyai dima.”

⁵Leu api ipai binoni “Ginok lene ma ampu nye ba, ahig ser Allah tut nyeni nimbutti dini. Ningon kanti di nimbut tut dini mipek kep mem nye e? he bi e?”

⁶Lene imam dima buhup “Dwai! Jingon ku jenti tut au. TUHAN ce tut jimbutti dini tu.”

⁷Gima leu lene ibou muhwi dima ikiju bimbut ug ei minu ndig Lais. Lene ingig igyai kep timiei di ibong ei minu ndig dima ba, jo nibreisi mem yok bipia timiei Lais igyai kepti noyam kin mben Sidon igyai kepti. Mbro nok gino mben Lais iba ibou coi mem tungwatu nya ba, mun nyeng hi bindin yok bi ba, ibong kei igwam kei cem lo, tungwatu di imbuk tut yok hi bi. Ibongti kin imati kin igyemti dem mem yok ba, mun nyeng hi di nggruk mem yok bi.

⁸Tirigi ibou muhwi dima ingkwei hanyen ndam yo di keret gom nya ei Zora kin Esytaol lene yo dima ibidip huk yok leu binhyepo ipui sut imbutti dima biyok.

⁹Lene ipai biyok “Jikwei ba, injei bihwen timiei Lais nya. Nuug ngig niyai kep yok tu ba, ningat lo, dihyei dima nnum kei ba, bres cem ngat ningat mang bibor cem ba, mun nyeng hagom ei sirima nok gi dem. Ma jibong kikau ei sirini bijibon mun nyeng hi bi au. Jikiju ba, juug ei minu dima haninyai bijihwen minu ndig dima lene jiyai bijiyati. Lene mijingat bipia timiei minu ndig dima iba ingon bikan tut gima hiter mihwen yok cem bi sren. Nyeni niba ningon com bipia Allah yai minu ndig dima binye tu.”

¹¹Gima rino tentara Dan ibou sratus muhwindagom ikiju bimbut leu Zora kin Esytaol tut ide minggwen bidem yok kei.

¹²Yoni imbut ndam Kiryat-Yearim ei keret Yehuda de dihyei hanjop nsi nite bei mpia nicutti leu api yohok ide prak meng yati bibong ei sirima. Gima rino tungwatu nya ijem mpia dima ninyeng Dan De Prak Meng Yati.

¹³Lene ikiju bimbut leu mpia dima biyuug kikau ug ei nungug him ei Efraim de dihyei hanjop nsi bibong bit Mikha.

¹⁴Lene ibou muhwi po yuug yok itta kep minu ndig Lais pima ipai bak isut bat nya “Jikan tut bipia kwar di iba perak binggai kin kwar hiter nya kin Efod gom no jo ei ig dini. Ma jikan-kan nyen tut leu api mibon ndei notou i?”

¹⁵Leu api yuug ei Mikha de ig po pinai pilei di ntun keret Lewi him pima nibongti ba, ihig ser tut niyaijoti ei sirima.

¹⁶Mpe dima lene tentara Dan ibou sratus muhwindagom di ide minggwen jo indati no igya kui dimbou pmem nuhuigya.

¹⁷Lene ibou muhwi po igyok itta kep minu ndig pima icoi hak ug ei ig bei bipos kwar di iba perak binggai kin kwar nindigsi nya bitut Efod cem. Noro pinai pilei di ntun keret Lewi him no ya bit tentara nya ibou sratus muhwindagom pima kui dimbou pmem nuhuigya.

¹⁸Tirigi ibou muhwi pima icoi ug ei Mikha de ig bei bipos Efod kin kwar nya dima lene pinai pilei dima hig yok “Jibon mun notou rigini i?”

¹⁹Lene ibuhup “Akimut ahuigya! Ahig nye tut gini au. Ma abit nyeni hak leu binhyepo anok imam mem nyeni ba, apingok nyeni ningonti cem. Gi kei rino anok imam mem keret titut yam gom leu gi anok imam mem ig bei nsi gom ngat he a.”

²⁰Lene pinai pilei dima joi sut ingon kanti dima. Gima rino noni kon efod kin kwar nya dima bibit yok.

²¹Leu api nimpung tentara dima imbut nut bu ba, ikes imunggwom bat nya kin ide mindhe-ndhe nihyen kep nya kin ide ndigban di bon ninyeng nya ba, bie yoho lo, tentara nya igya abia kep.

²²Tirigi yuug krau minu ting leu su lene Mikha kin nisut bat nya di ibong dideu noni yuhuk bram keret Dan pima yok. Tirigi idideu yok tu,

²³lene Mikha kin nisut bat nya isrep huk yok. Noro keret Dan dima yok ikiek yok bihig ser Mikha “Mindei i? Nggon rino akwei sut yo di imang bibor dima kwei i?”

²⁴Lene Mikha buhup “Jipos ditde kwar nya kin ditde imam cem bijinang tut apino dinyeng tut mun nyeng hi bu bi leu api jibisinggre bijihig ser da bu ‘Mindei i?’ ”

²⁵Noro keret Dan dima yok ipai “Nnaba akimut ahui hak ug leu ma tentara dini yok mingon sibui leu api ihwen na bigyai nimai binani kin ade bat nya.”

²⁶Tirigi ipai bak nok rino keret Dan dima yok imbut nut kikau. Mikha ngat lo, yo dima ide nisindemti dor njiriek nide nisindemti. Gima rino tti kep ninghim dip bingkwei hanyen.

²⁷Tirigi keret Dan dima yok inang tut imam kin ndigban nikuk no bak di Mikha bon pima leu su lene yuug kon pran bit timiei minu ndig Lais. Yo di ibong minu ndig dima ibong kei igwam kei. (Minu ndig dima kin minu ndig Bet-Rehob hacem jo ei mbang briep gom). Tentara keret Dan dima yok igyai nimai bak yo di ibong ei minu ndig dima yahagom leu api indig ide minu ndig. Hi di kwei mpu mben Lais dima bi. Lewo mpia dima jo binongkom ei ting bibor leu minu ndig Sidon. Gima leu lene keret Dan iwin minu ndig dima hanyen bibong ei sirima ba,

²⁹ijem minu ndig dima ninyeng Dan ba, noyam kin idigup idigai di Yakub nipmot Dan ninyenga.

³⁰Lene itas kwar di ipos dima ei minu ndig dima. Leu api ikon Yonatan di Gersom nipmot kin Musa nignyon cem binok ide imam. Lene Gersom de nintun him di bram yam dini inok imam mem keret Dan kikau bipek nijam di ngkiai nya ihwen mben Israel ba, icom yok ug ei ingkiaisi.

³¹Kwar di Mikha bon bou ninda him dima jo kikau ei Lais sur nijam di TUHAN De Prak Meng jo ei Silo.