Read Hatam NIJAM NIKEI NYA 2 Bible Online

NIJAM NIKEI NYA 2 - Hatam bible

NIJAM NIKEI NYA 2

¹Lene TUHAN de malaikati gom jo leu Gilgal buug kikau ug ei Bokhim leu api pai bak mben Israel “Diteu je bijingwes ngun leu minu Mesir lene dibuwak je kwei ei minu po dipreu ei mem jidigup bat-jidigai bat nya pima tu. Mpe dima lene disimbot dat bipia midiluei dingonti tut mun di dipreu ei mem je bi sren.

² Gima rino ma jeni kin timiei nya ei minu dini jipreu sut mun biyam au. Ma jinggek ide nimbar hum dok nya hagom bingwig. Dipai nok noro jiyai mun bit leu nok dicuk jeti pima bi. Lewo ningat lene jinyohou ide nimbar hum dok nya nok gi kei tu.

³Gima rino ma jingig jitingou mem dihyet dini. Midijji yo dini leu itimieisi sindam leu joho bei tirigi jicoi ei minu dini bi. Timiei minu dini minok jide siceu nya apino mijibiam bon tirigi jikuk je bak ide kwar nya.”

⁴Niabiati malaikati dima pai biyok ne mben Israel yahagom ipim kui jei sut nihyet.

⁵Leu gima rino tungwatu nya ijem mpia dima ninyeng Bokhim. Lene mben Israel ibui mindhe-ndhe nya bindig kep hum ei nimbar hum dokti bak TUHAN ei sirima.

⁶Lene Yosua kes tungwatu nya bimbut leu api yahagom intek gimahap leu binhyepo bikwop keret hagom igya bidem ide hanjop nsi nya.

⁷Mben Israel ikuk yok bak TUHAN bibit nihyet kikau mem nijam di Yosua niyaijo. Niabiati bu lene igyai nok gima bu kikau mem nijam nibou nindigsi nya igyaijo lewo nibou nindigsi nya cem ingat mindur po TUHAN bibon mem mben Israel pima bou igyai him tu.

⁸TUHAN de awak di Yosua po nicig ninyeng Nun pima nide njap ug ei ari bingwam sratus gom ba, simnai leu api mai.

⁹ Lene itig ei nide hanjop nsi ei Timnat-Serah ei nungug him dideu Nungug Gaas bei mpia nijjai ba, gini ne hanjop nsi di keret Efraim ide ri.

¹⁰Lene andigpoi nya di igyaijo mem nijam pima cem yahagom ide njap ningwig honti leu api imai. Noro tirigi imunggwom bat nya indig su lene ikiek yoho ter leu TUHAN bibit nihyet bi lewo ingat mindur di Noni bibon mem mben Israel pima bou igyai him ba, hagom pek kep mem yok bi.

¹¹Mpe dima lene mben Israel ibon sisar tut TUHAN tirigi sindi ikuk yok bak kwar Baal nya.

¹²Mbro nok gino TUHAN di nok idigup bat-idigai bat nya ide Allah teu yok bingwes ngun leu minu Mesir lo, tini bu ne ikes hon ba, ikuk yok bak Noni bu bi. Leu api ikuk yok bak ngkiai di ibong ttai yok ide kwar nya bibindei ba, TUHAN ningon sibui sut yok.

¹³Lewo ikuk yok biNoni bu bi lo, ikuk yok bak Baal kin Asytoret kin kwar nindigsi nya.

¹⁴Gima rino TUHAN ningon sibui sut yok nindig bibor ba, sindui sut ngkiai di imbuk bibor nya bihwen yok bipos ndigban nya bingwig leu yok. Noni sindui sut mben Israel ide siceu di ibong ttai yok igya kep bihwen yok bijo ninno apino bit bon mben Israel ikon pran bigya ngkiem kan bi.

¹⁵Bikwop mpe dino injei siceu ba, ikon pran lene TUHAN tti kin ide siceu nya bit leu nok Noni sok kep Nide limwa nya nipou su. Gima rino mben Israel ingon buhun bibor.

¹⁶Lo bi lene TUHAN sindi dimig ide nibou nya di isindem mem gima ikwek yok leu ide siceu nya di ico kep yok inda nsi.

¹⁷Noro mben Israel iba inghim bak ide nibou dima yok ighyet lewo ingon gom tut TUHAN bu bi ba, ikuk yok bak nung nya tu. Idigup bat-idigai bat nya ibit TUHAN nicuk yokti nipou su noro tini bu ne yo dini ikiek yoho ter leu Noni ba, ingkek ndok.

¹⁸Tirigino TUHAN dimig mben Israel ide nibou gom ei bimpu noni leu binhyepo bie tut yok biteu yok bingwes ngun leu ide siceu nya lene yahagom ibong kei igwam kei kikau bibou nibou dima mai leu yok ug e. Ei nijam dima ne TUHAN ngondut mben Israel lewo ingon buhun tut ide siceu di imbuk tut yok bico kep yok.

¹⁹Noro niabiati nibou pima mai leu yok tu lene yo dima ingkwei hanyen ndam igyai kepti di kinei nya lene ikou sut gi inggek tut igyai munti nya. Lewo ikuk yok bak nung nya kindi-kindok hanyen bu ba, ingkek ndok bibor.

²⁰Mpe dima lene TUHAN ningon sibui sut yok ba, simbot dat bipai “Dicuk yo dini idigup bat-idigai bat nya nipou su leu binhyepo igyok ngon kep mun di dipreu ei mem yok. Noro yo dini ingkwei leu nipreu eisi pima leu api ibit dihyet bu bi.

²¹Gima rino midijji ngkiai nya nikenti di ibong ser minu dini tirigi po Yosua nimai leusi pima sindam leu mben Israel yoho bei bu bi.

²²Midiba ngkiai nya dima yok bibingon mben Israel leu binhyepo dinggok tut gino yoni mibit dicuk yokti nya noyam kin idigup bat-idigai bat nya e, he bi e?”

²³Gima rino TUHAN sindui sut ngkiai nya dima yok bibong ei itimieisi dima. Noni sindem tut Yosua nya mem gima ijji yahagom bingwig ei nimbie him pima bi. Nok gima cem Noni jji yok sindam niabiati Yosua mai leu su cem bi.