Read Hatam NIJAM NIKEI NYA 20 Bible Online

NIJAM NIKEI NYA 20 - Hatam bible

NIJAM NIKEI NYA 20

¹Leu api mben Israel di ibong ei Dan nite bei mpia nijjai kikau bipek kin Bersyeba nite bei mpia nibiho kikau bipek kin Gilead nite bei mpia nipriti yahagom idem yam bit leu nijem yok kweisi dima. Yahagom idem yam ba, ibicom yam nok gom ei TUHAN Noho bei ei Mizpa.

²Tentara di imbut imig yahagom sok yam ibou sribu sratus bitai. Bikwop keret mben Israel ide nibou di ibie tut yok nya cem yahagom idem yam ei sirima.

³Keret Benyamin nya cem imiap tut bipia keret mben Israel nindigsi nya yahagom idem yam ei Mizpa tu. Leu api mben Israel ihig ser no di ntun Lewi him di nitnem mien mai dima “Apui sut notou mun di kinei bibor dini nicut igkep jeti binye.” Lene no dima buhup “Dani kin ditnem mien nikriek binigwam ei Gibea ei Benyamin de dihyei hanjop nsi ba, nibong ei sirima.

⁴

⁵Leu api pinai timiei Gibea nya iba mmun bikwei nggok ser da. Ikwei binjei ttai ig di dibong niti ba, ipi bigyai nimai bida. Noro bi leu api ikat ditnem mien bicut tut noni sindam kikau mmun jei dima bimai hak.

⁶Apino diyai ningut di didigo kukiau lene dipinak ninggriet gom-gom bidem ide keret mben Israel simnaibrimigcan bikwop keret gom-gom. Diyai nok gima lewo mben Gibea dima ibon mun nyeng di kinei bibor ei nyeni ikieti ba, ibinim kep nye di mben Israel.

⁷Je di jidem yam ei sirini ne jahagom jinok mben Israel ri. Dahara jahagom ba, jibinai sut gini!”

⁸Lene yo di idem yam ei dima yahagom ikiju bipai “Leu nye di idem yam ei dini hi dima mingkwei hanyen ug ei nide prak meng yati kin nide ig bei cem bi,

⁹bibou nyeni mibuhup bak timiei Gibea nya ug e. Suar iko ba, ibinggok tut tentara nya di mihwen timiei Gibea nipou ngig ngat ug e.

¹⁰Lene ma pinai mben Israel tungwagom leu ibou simnai lene nok mitin ei njita mem yo di ikon pran a. Ma nindigsi nya yahagom yuug kon pran bit mben Gibea ba, ibikes hukum ei yok dip drek dip mun di kinei bibor di ibon ei mben Israel ikieti tu.”

¹¹Tug hon nisinati dima ne mben Israel ibicom yam nok gom ba, ikon pran bit mben Gibea.

¹²Lene mben Israel icuk tungwatu nya bigya bidem keret Benyamin de dihyei hanjop nsi nisurti-nipekti leu binhyepo itri tut “Jibon mun di kinei bibor mindei rino ei jikieti dima tu i?

¹³Ma jikes timiei Gibea di ibon mun di kinei-kinau dima bak nyeni leu binhyepo niyai nimai biyok ba, nibicok tut mun di kinei bibor dima leu nye di mben Israel ikieti.” Yo dima itri tut nok noro keret Benyamin nya iba inghim bak keret mben Israel nindigsi nya ighyet.

¹⁴Lene induk yam kwei leu minu ndig keret Benyamin de nya ba, idem yam ei Gibea mem gima ikon pran bit keret mben Israel nindigsi nya.

¹⁵Njap dima ne tentara ibou sribu ningot can muhwindagom induk yam kwei leu ide minu ndig nya. Ter leu gima lene timiei Gibea nya yonti cem imbus yo di ihwen mun igkei nya ibou sratus muhwindacan cem ba, idem yem ei. Yo dini yahagom iba inda prak bikrau bikumsikik lene iba tig di iba bikumsikik bicom dima bipilei ide siceu nya igkei. Hi di ba bikumsikik bipilei yok tunggwei bi.

¹⁶

¹⁷Lene tentara Israel nindigsi nya imangti ibou sribu sratus bitai idem yam ei su ba, yahagom ikon pran igkei.

¹⁸Lene tentara Israel yuug ei minu ndig Betel gumihyep di ikuk yok bak Allah eisi dima ba, ihig ser Allah “TUHAN e, keret di tou leu nyeni nikieti rima suar ug kon pran bit tentara keret Benyamin nya bibie i?” Lene TUHAN buhup “Tentara keret Yehuda.”

¹⁹Gima rino njap tekti di hyep bu ikiju bimbut ba, yohok ide prak meng yati dideu minu ndig Gibea.

²⁰Lene ikes nimpung tentara nya di iba yoho rok minu ndig dima leu api ihwen siceu ei Gibea.

²¹Apino tentara keret Benyamin nya cem yehei ba, ihwen yok lene ibiyai nimai bak tentara Israel ibou sribu ningot can can ei njap dima.

²²Tentara keret Benyamin ibindei timek yok ei njap dima apino mben Israel ingkwei hanyen ug ei mpia po ikuk yok bak Allah eisi pima leu api ipim ei TUHAN Noho bei kikau bimmun kep. Lene ihig ser Noni “TUHAN e, ma ningkwei binikon pran bit nide bat di keret Benyamin nya hanyen e?” Lene TUHAN buhup “I, ma juug ba, jingkwei hanyen.” Nibuhupti dima biwin tentara Israel ingonti. Gima rino inyohou dimig ide tentara nya hanyen bu dem kep nok idimig yok ei mem njap gi nigom pima.

²³

²⁴Yoni injei nimbican ba, ikon pran hanyen bit tentara keret Benyamin nya.

²⁵Apino tentara keret Benyamin nya cem yehei ba, ikon pran bit yok nimbican bigyai nimai bak tentara Israel di ikon pran igkei nya ibou sribu simnaimuhwidip brimigtehiningai.

²⁶Apino mben Israel ingkwei hanyen ug ei minu ndig Betel ba, ipim ei TUHAN Noho bei. Yoni igyem njita bi kikau bimmun kep. Lene ibon midut nibiyai ningon kwes kin Allahti cem midut nindig mindhe titut kep humti cem bak TUHAN ei mpia dima.

²⁷Ei nijam dima ne Allah De Brua Gi Preu jo nijoti ei minu ndig Betel ba, Pinehas di Eleazar nipmot ba, Harun nignyon yai midyai nok imam. Leu api mben Israel ihig ser TUHAN “TUHAN e, suar nuug hanyen bu binikon pran bit nisut bat tentara keret Benyamin nya e? he nikes hon ba, nikon pran dini bu bi e?” Lene TUHAN buhup “Ma juug ba, jikon pran bit yok hanyen bu lewo njap di hyep bu lene midibindei ba, jibindei timek yok ug ri.”

²⁸

²⁹Mben Israel imiap TUHAN nibuhupti dima lene ibuwak ide tentara nya biku yok nyahan ei mpia di bikrop ttai Gibea.

³⁰Leu api njap niningai icut igkep yok bikon pran bit tentara keret Benyamin nya tug hon nimpung di inyohou dimig pima ba, iba yoho rok Gibea noyam kin igyai kepti di nipou pima.

³¹Lene tentara keret Benyamin nya cem yehei ba, ikon pran bit yok noro tentara Israel ibiris yok biyehei leu ide minu ndig ninsi kwei ug. Tentara keret Benyamin nya sindi igyai nimai bak mben Israel noyam kin gi nipou ei briep bou him di jo minu ndig Gibea nisai kak puig di mbut leu Gibea ug ei minu ndig Betel. Noro igyai nimai bak mben Israel ibou ningot ningai he.

³²Gima rino ikan bigya yoni mibindei timek mben Israel hanyen noyam kin gi nipou pima ug ri. Noro tentara Israel gi nahacan itin ei ingonti mem gima isujou pip yok leu binhyepo ibibrim tentara keret Benyamin nya ug ei puig ndigsi nya di jo ting leu ide minu ndig di Gibea.

³³Tirigi tentara Israel gi nahacan isujou lene inyohou dimig ide tentara nya bu ei Baal-Tamar lene yo po iku yok bikrop ttai Gibea pima yehei haninyai leu mpia di iku yok eisi nya ei nisai ma kwei.

³⁴Yo dima ne tentara di ikon pran igkei nya di mben Israel imbus ei su rin ba, imangti ibou sribu simnai. Tirigi ibou sribu simnai dima ihwen tentara Gibea lene tentara yahacem ikon pran bit yam sindem bibor. Noro tentara keret Benyamin nya igikan bigya jei bi lene yoni micut ug rin bi sren.

³⁵Lene TUHAN bindei ba, tentara Israel ibindei timek tentara keret Benyamin. Apino mben Israel igyai nimai bak tentara keret Benyamin ibou sribu ningot can muhwi ba, sratus gom ei njap gom dima.

³⁶Lene jo nibreisi mem tentara keret Benyamin bipia icut tu. Tentara Israel di igya nibieti nya ibisinggre ba, inang leu tentara keret Benyamin lewo iba ingon com ide nimpung tentara di ingat rin ei mpia di iku yo eisi bikrop ttai Gibea.

³⁷Yo di iku yo pima icut igkep minu ndig dima haninyai bihwen mben Gibea bidem minu ndig ninsi ba, igyai nimai bak yo di ingat rin ei sirima yahagom.

³⁸Noro tentara Israel gi nahacan kin nimpung di iku yok nyahan pima igyok ingon gom nipou su bipia gino tentara gi nahacan ingat hum di nimmup brou kui leu minu ndig ninggimau yon,

³⁹lene suar tentara gi nahacan dima ikiek yok kep siceu nya ba, ihwen yok. Ei nituti dima lene tentara keret Benyamin nya igyai nimai bak tentara Israel ibou ningot ningai leu su lo, ikan bigya ibindei timek mben Israel titut yam noyam kin nipou pima ri.

⁴⁰Noro ingat lo, hum mmup brou bikui leu minu ndig Gibea ninggimau yon tu. Tirigi ikiek yok bingat lo, hum yem ide minu ndig titut yam tu lene idigit tut.

⁴¹Ei nituti dima cem tentara gi nahacan ikiek yok kep yok bikon pran bit yok. Apino tentara keret Benyamin nya ingon tai-tai bou lewo ikan tut bipia yoni micut ug ri.

⁴²Gima rino isujou binang leu tentara Israel ug ei iggum ndigsi noro bit bon inang bingwes ngun kan bi. Tentara Israel gi nahacan kin tentara di ikwei leu minu ndig ninsi pima ihwen yok ba, ittem yok ndam yam apino tentara keret Benyamin nya icut bibor.

⁴³Mben Israel igyon ser yok lene yuhuk yok bijo kikau ug bipek mpia ttou nsi gom ei Gibea nite bei mpia nipriti. Yuhuk yok lene ibiyai nimai,

⁴⁴bak tentara keret Benyamin di ikon pran igkei nya ibou sribu simnaimuhwidip brimigtehiningai.

⁴⁵Lene tentara keret Benyamin nindigsi nya ikiek yok ba, inang binjiriek iggum ndigsi ndam bor ngug Rimon. Noro tentara Israel igyai nimai bak yo dima ibou sribu muhwi kak puig sinon. Lene yuhuk bram nindigsi nya kikau ug ei Gideom.[7] Ba, igyai nimai bak ibou sribu can bu kak puig sinon.

⁴⁶Lene tentara keret Benyamin nya di itug ndei nimai ei njap dima imangti ibou sribu ningot can muhwi. Tentara dima yok yahagom ne pinjoi ndig di mimbri kui ingkek nongkom ri.

⁴⁷Noro tentara po inang injiriek iggum ndigsi ba, illu ug ei bor ngug Rimon pima ibou sratus muhwindagom ingwes ngun. Ba, ibong ei bor ngug Rimon mem ninsi bed nitindur bitai.

⁴⁸Leu api tentara Israel ingkwei hanyen bigyai nimai bak timiei keret Benyamin niken di igyaijo nya nok pinai nya kin sop nya kin munggwom nya kin mindhe-ndhe cem. Lene ibindig minu ndig di jo dihyei hanjop nsi dima hagom ningwig a.