Read Hatam NIJAM NIKEI NYA 21 Bible Online

NIJAM NIKEI NYA 21 - Hatam bible

NIJAM NIKEI NYA 21

¹Mpe di po mben Israel idem yam ei Mizpa pima lene ipreu ei bak TUHAN bipia hi di leu ikieti misindui sut gima ndo nipmisop hi bak pinai Benyamin nok nitnem bi.

²Gima rino yoni ingkwei hanyen ug ei minu ndig Betel ba, iba ingon di ngguk bigwam ei TUHAN Noho bei kikau ug bipek mmun kep. Ipim ba, ibahara Noni,

³“TUHAN Allah mben Israel e, nggon rino mun dini yok hagom cut igkep nye i? Jei bi lene keret Benyamin di inok keret gom di imbier kim nye di mben Israel misar ningwig leu nye!”

⁴Lene njap dihyep bu mben Israel ikiju mem njap tekti biwin nimbar hum dok gom ei sirima. Leu api ibui mindhe ba, ibibon midut nibiyai ningon kwes kin Allahti kin midut nindig mindhe titut kep humti cem eisi bak TUHAN.

⁵Leu api igyok igyai kep yam bihig-hig nyen ser yam “Apo nimpung tou rino kwei dem yam ei TUHAN Noho bei ei Mizpa nipou pima bit nye bi i?” (Mpe di pima yeheng tut bingkiem bipia mikes hukum nimai ei no di bit ighyet bikwei ya ei Mizpa bi dip.)

⁶Mben Israel ingondut isut bat di keret Benyamin nya bipai biyam “Nogindini keret mben Israel gom pror leu mben Israel.

⁷Ba, suar ibon notou leu binhyepo pinai Benyamin nikenti nya ndini iwak itnem bu i? Lewo nyeni yeheng tut bak TUHAN bingkiem tu bipia nyeni misindui sut gima indo ipmisop hi bak pinai Benyamin nok nitnem bi.”

⁸Lene igyok igyai kep keret mben Israel leu binhyepo ibingat bipia keret gom di kwei mpu yok ei Mizpa nipou pima bi. Leu api ingat lo, timiei Yabes ei hanjop Gilead hi di kwei mpu yok ei Mizpa bi.

⁹Lewo tirigi ingat daptar tut yo di inyeng tibim kin tentara nya po idem yam ei Mizpa pima lo, timiei Yabes hi ninyeng jo ei daptar dimati bi.

¹⁰Gima rino mben Israel di idem yam ei minu ndig Betel dima ipinak tentara di mimbri kui ingkek nya ibou sribu simnaibrimigcan leu binhyepo yuug kes hukum nimai ei timiei Yabes nya dip bitut sop nya kin munggwom nya cem.

¹¹Ba, icuk yok leu binhyepo ikes hukum nimai ei pinai nya yahagom kin sop di igwam itta pilei bi nya yahagom dip.

¹²Leu api imbus sop gwam nitta pilei nya ibou sratus bitai leu timiei Yabes ikieti bibuwak yok kwei ei prak meng yati ei Silo ei minu Kanaan.

¹³Leu api mben Israel yahagom isok ighyet bak tentara keret Benyamin nya po iku yok ei ningug tig nya ei Rimon pima leu binhyepo ikwam minggwen bit yam ba, ingon kwes kin yam hanyen.

¹⁴Gima rino tentara keret Benyamin nya ingkwei hanyen leu api mben Israel indo sop gwam nitta pilei nya di leu Yabes po itug ndei nimai bi pima biyok nok itnem. Noro sop gwam nitta pilei dima yok imangti dem tentara keret Benyamin nya imangti pima bi.

¹⁵Mben Israel ingondut keret Benyamin dima lewo TUHAN bindei tek keret mben Israel gom leu ba, inok nimpung gom di ibicom yam bu bi.

¹⁶Gima rino nibou nya di idem yam ei minu ndig Betel dima ipai biyam “Sop timiei keret Benyamin hi bu bi. Noro minggon ndei i? Lene dem tut gima ice tut bindo ide sop gwam nitta pilei nya biyok ba, iwak nok itnem bi lewo nyeni yeheng tut bipia misigion tungwagom leu nyeni ikieti di ndo nipmisop gwam nitta pilei bak no di ntun Benyamin him biwak a. Gima rino mibon mindei mem tentara nikenti nya leu binhyepo yoni cem iwak itnem i? Lewo dem tut gima keret gom di nimbier kim keret mben Israel simnaibrimican titut yam pima sar leu ikieti bi. Ma inggok puig di kei mem keret Benyamin leu binhyepo ibon ide yo di intun yoni him kikau ba, iba yok kep ide dihyei hanjop nsi titut yam nok ide dihyei ninda rom hanyen.”

¹⁹Lene ikan kep “Puig di kei gom rinok gini. Jei bi lene njap dem mem ibon midut di ibon kikep bikwop ari bingwam mem TUHAN ei Silo ri.” (Silo jo ei minu ndig Betel nite bei mpia nijjai kin Lebona nite bei mpia nibiho cem ba, puig Betel di ug ei Sikhem jo Silo nite bei mpia nicutti.)

²⁰Gima rino nibou di ibie tut yo di idem yam ei minu ndig Betel dima ipai bak tentara keret Benyamin nikenti pima “Ma juug ba, jiku je nyahan ei miai ba anggur nghousi nya ei Silo ba,

²¹jiyai ngkiem. Tirigi sop gwam nitta pilei di leu Silo nya itau kwei ba, ibien-bien nyen bingon mingon ei nibon midut kikepti mem TUHAN dima lene suar bikwop jigom-gom jikiju leu jiku je eisi dima bijikat sop gwam nitta pilei gom bijinang tut kikau ug ei keret Benyamin de dihyei hanjop nsi bijijem nok jitnem.

²²Gino icig kin ikijam bat nya ikwei kak tut je lene ma jipai biyok ‘Nahara mem je leu binhyepo jikes yok binye hak ug. Nipos yoni leu je tug hon nikon pranti bi. Gino jiba jinda bikuk yok binye lene mijingwes ngun leu nisigionti po jice tut yam tut pima bi.’ ”

²³Leu api tentara keret Benyamin nikenti dima igyai igbit ipingok yokti dima. Bikwop tungwagom-gom pos sop gwam nitta pilei gom di bien-bien nyen bingon mingon ei Silo binok nitnem. Leu api ingkwei sut yok hanyen ug ei itimieisi. Ba, iwin minu ndig di ide nya hanyen leu api ibong kikau ei sirima.

²⁴Lene mben Israel nindigsi nya cem intek bimbut. Ba, bikwop tungwagom-gom ngkwei hanyen ug ei nide biyati ei nide dihyei hanjop nsi bit leu bikwop nide ninsi de kin nide keret cem.

²⁵ Ei nijam dima ne nibou ndig hi ninyeng tak kep mben Israel bi. Apino bikwop tungwagom-gom bon mun di kan bipia mun di igbit bit leu nonti ningon kanti.