Read Hatam NIJAM NIKEI NYA 3 Bible Online

NIJAM NIKEI NYA 3 - Hatam bible

NIJAM NIKEI NYA 3

¹TUHAN sindui sut timiei nya ibou poi ba, ibong ei minu Kanaan kikau mem gima ba yok bibingon mben Israel di ikon pran ei nimbie him ei minu Kanaan bigyo sren nya.

²TUHAN ba nisinati dima bingginau mben Israel ide nintun him yamti di bram yam nya tut nikon pranti lewo igikon pran bit ide siceu di nipou nya bi sren.

³Mben di ibong ei minu dima kikau yo ne timiei nya di ibong ei minu ndig muhwi di mben Filistin ide kin timiei minu Kanaan kin mben Sidon kin mben Hewi di ibong ei nungug him Libanon ei Nungug Baal-Hermon binjiriek Nitinggoisi Hamat.

⁴TUHAN sindui sut yok ba, ingat rin ei mpia dima tereu nok mun di bingon mben Israel. Tug hon nisinati dima lene mijo nibreisi mem Noni gino mben Israel mibit nicukti nya po Noni yai bak idigup bat-idigai bat nya tug hon Musa pima e? he bi e?

⁵Gima rino timiei minu Kanaan bitut mben Het kin mben Amori kin mben Feris kin mben Hewi kin mben Yebus ibong kikau ei dihyei hanjop nsi dima bit mben Israel.

⁶Mben Israel isrig mben dima yok ikieti leu api pinai nya iwak ide sop nya lene sop nya iwak ide pinai nya lene ibikuk yonti bak ide kwar nya cem.

⁷Jei bi lene mben Israel ibon sisar tut ide TUHAN Allah. Ibbwe ser Noni apino ikuk yok bak kwar di inyeng Baal kin Asyera.

⁸Apino TUHAN gga yok bisindui sut yok ba, Nibou Ndig Kusyan-Risyataim leu Mesopotamia bindei timek yoni. Nibou ndig dima ninyeng tak kep yok kikau mem nijam ari bingwam muhwindaningai.

⁹Niabiati ne mben Israel yahara TUHAN leu binhyepo kwei mpu yok. Leu api TUHAN dimig Otniel ei nok nibou mem yok leu binhyepo kwek yok leu siceu nya inda nsi. (Otniel ne Kaleb nikinjoi Kenas nipmot ri.)

¹⁰TUHAN Ninnei sindem tut Otniel apino kiju nok nibou di bie tut mben Israel. Leu api TUHAN bindei ba, noni ug kon pran bit nibou ndig Mesopotamia bibindei timek noni ningwig a.

¹¹Apino mben Israel ibong kei igwam kei ei minu dima mem nijam ari bingwam ningot bitai. Leu api Otniel mai ei niabiati.

¹²Jei bi lene mben Israel ibon sisar tut TUHAN hanyen bu. Apino TUHAN bindei di Eglon di nibou ndig mben Moab sindem dor njiriek mben Israel.

¹³Nibou ndig Eglon bicom yam bit mben Amon kin mben Amalek leu api ibindei timek mben Israel. Niabiati bu ne icut igkep minu ndig Yerikho po dui sraba nibousi pima bigyati.

¹⁴Eglon ninyeng tak kep yok kikau mem nijam ari bingwam simnaimuhwidip brimigtehiningai.

¹⁵Noro tirigi mben Israel yahara TUHAN leu binhyepo kwei mpu yok lene Noni dimig Ehud ei mem gima kwek yoni leu siceu nya inda nsi. Ehud ba ninda prak bikrau ndiyok igkei. Noni ne Gera di ntun keret Benyamin nipmot him rin ba, ttei kep mitiei belasten di suar mben Israel igo bak Nibou Ndig Eglon.

¹⁶Mpe di gom ne Ehud bon nide simeda nipup gom di bon nide ninggwenti bei ninghim noho di nijeisi meter niken he. Lene kri simeda dima kin nintig bou bei ninda com bijuk sinsun kep.

¹⁷Leu api noni ug sut mitiei belasten di mben Israel igo bak Nibou Ndig Eglon di ningut dwoi mai bibor.

¹⁸Tirigi kes mitiei belasten di igo bak nibou ndig leu su lene Ehud cuk yo di impu noni di ittei mitiei dima kwei ba, ingkwei hanyen.

¹⁹Noro tirigi yuug krau tig di ikilis gom di jo dideu Gilgal lene Ehud nongkom ngkwei hon tig dima ba, ug ngat Nibou Ndig Eglon hanyen bu. Mpe dima lene Eglon ningat rin ei nide ig bei ei ninsi di nok hou nijoti di jo nai ei ig bou ninjek dip. Lene Ehud pai nyahan bak Eglon “Andigpoi di ninyeng jei e, dinok ade awak ba, dikwei sut nihyet mimun mem na di Andigpoi.” Leu api nibou ndig pai bak “Aom angon mbigom.” Lene cuk awak nide nya yahagom ba, yehei ug ei nisai leu api ibikes noni kin Ehud yongkom ngat ei ninsi dima. Lene Ehud dideu nibou ndig ei nigwamti lene pai bak “Dikwei sut nihyet leu Allah mem na di Andigpoi.” Tirigi nibou ndig miap lene kiju biya.

²¹Lene Ehud ninda prak bibit nide simeda bikus haninyai leu nintig bou nite ninda com bibidat nibou ndig ninghopti bitibim ninghopti ba, simeda ug niti. Simeda ninggwenti titut yam ug kikau ba, nibuau cem kimbas ug ei nibou ndig dima nimmau ninghopti buug kus ninghim nu kwei. Lene Ehud sindui sut simeda dima bijo niti ei sirima,

²³leu api hei leu lene nggam dimbou nya bei ninghim bisibui kusin dimbou di ninsi nya ser lene hei bimbut leu. Tirigi awak pima yok ikwei ngat lo, dimbou di ninsi dima yok hagom kusin mai ser tu lene ikan bigya nibou ndig no ninsi yo buug ei gimuhukti.

²⁵Igya-ya nyen ninno tu lo, nibou ndig kau dimbou bi lene ingon tai-tai bou. Gima rino ibakusin leu dimbou bingat lo, nibou ndig di ide rino tti bibong nimai ei ansan dip ei a.

²⁶Tirigi igya-ya nyen siri lene Ehud nonti nang binongkom njiriek tig di ikilis pima ba, ningwes ngun ug ei Seira leu su.

²⁷Haninyai tirigi ug krau nungug him Efraim lene noni miep pun mbrei gom bibijem mben Israel kwei mem gima ikon pran. Tirigi yahagom idem yam tu lene Ehud bie tut yok ba, ijuk kwei leu nungug him dima.

²⁸Lene noni pai biyok “Jibit da, TUHAN bindei timek jide siceu di mben Moab ei joho bei tu.” Leu api ibit Ehud di nok nibou di bie tut mben Israel ba, ijuk leu nungug him. Lene igyai mpia di mben Moab isigon Minyei Yordan kikep eisi ba, yuug dihip ei nite dini kwei bigyati. Lene igisindui sut siceu dima yok ba, tungwagom ngat cem sigon minyei buug dihip ei nite hi binang biningwes ngun bi.

²⁹Ei nikon pranti ei njap dima lene igyai nimai bak tentara Moab di isindem bibor nya imangti ibou sribu simnai lo, hi di kwat ug bi.

³⁰Njap dima lene Moab cut bak mben Israel apino mben Israel ibong kei igwam kei kikau mem nijam ari bingwam ningot muhwindaningai.

³¹Nibou di bie tut mben Israel gi bram bu rino Samgar di Anat nipmot. Noni cem brim ningkek bihwen siceu nya. Noni ba tom di biya ser sapi nya biyai nimai bak mben Filistin ibou sratus muhwindagom apino kwek mben Israel leu ide siceu inda nsi.