Read Hatam NIJAM NIKEI NYA 4 Bible Online

NIJAM NIKEI NYA 4 - Hatam bible

NIJAM NIKEI NYA 4

¹Niabiati Ehud niyaijo ngwig hon tu lene mben Israel ingkwei hanyen bibon sisar tut TUHAN hanyen bu.

²Gima rino Noni sindui sut yok leu api icut bak Yabin di nibou ndig minu Kanaan di ninyeng tak kep ei Hazor. Nide nibou tentara ninyeng Sisera di bong ei Haroset-Hagoyim.

³Yabin nyeng tut kroba pran di iba ngkimom nitu bibon ningat sratus muhwindatai. Noni ba nimbuk bico kep mben Israel kikau mem ari bingwam ningot can tu. Leu gima rino mben Israel yahara TUHAN kwei mpu yok.

⁴Mpe dima lene Debora ne nikei mem mben Israel rin ba, noni cem nok nabi sop. Nijjep ninyeng Lapidot.

⁵Debora gwam nok nikei ei dui ninjem gom nitriti bit leu nok niyai kepti. Dui ninjem gom dima jo ei minu ndig Rama kin minu ndig Betel nikieti ei keret Efraim de hanjop nsi ei nungug him. Lene mben Israel yuug cem kikep Debora leu binhyepo mpu yok tut ide munhyet ba, kos tut hagom nok gi igbit.

⁶Mpe di gom ne Debora sok nihyet bak Barak di Abinoam nipmot di bong ei Kedes ei keret Naftali de hanjop bikwei ngat noni. Lene Debora pai binoni “TUHAN di nok mben Israel ide Allah sok nihyet kwei ei da dip bak nani bipai ‘Ma adimig pinjoi ndig nya leu keret Naftali kin Zebulon ibou sribu simnai leu api abie tut yok ug ei Nungug Tabor.

⁷Lene midibindei ba, Sisera po nok nibou pran mem Yabin pima kin nide tentara nya miyuug um je bikon pran bit je ei Minyei Kisyon nyai. Noni minjei sut nide kroba pran kin nide tentara nya. Noro midibindei ba, noni kin nide tentara yahagom micut bak jeni.’ ”

⁸Lene Barak buhup “Gino abit da lene midiyai igbit TUHAN nicuk dati. Ne gino abit da bi lene nna ug ba, midimbut bi.”

⁹Lene Debora pai binoni “Nna ba dibit na hak ug. Noro ma ayongon kep bipia tungwatu nya minggei sut na tut gi ide siceu nya micut bak nye bi. Lewo TUHAN mibindei ba, Sisera micut bak no di sop.” Lene Debora bit Barak ba, imbut ug ei Kedes.

¹⁰Lene Barak nduk keret Zebulon kin Naftali kwei ba, ingat noni apino pinjoi ndig nya di injei bit noni kin Debora ne ibou sribu simnai ri.

¹¹Lo bi lene mpe dima lene Heber di mben Keni gom hok nide prak meng dideu Kedes ei biei ndig nghousi ei Zaanaim. Noni mbres nonti leu nide mben nindigsi nya tu. (Hobab ne Musa nidohoi rin ba, nide nintun him yamti di bram yam nya ne mben Keni ri.)

¹²Tirigi Barak nya ikui ug ei Nungug Tabor tu lene ninghapti tibim ei Sisera nitingou nsi.

¹³Noni mbus nide kroba pran ngkimom nitu ningat sratus muhwindatai pima kin nide tentara yahagom ei Haroset-Hagoyim lene hei sut yahagom biyuug ei Minyei Kisyon nyai.

¹⁴Lene Debora cuk Barak bipai “Yo jimbut ug! TUHAN mibie tut je! Njap di ammani ne Sisera nya micut bak jeni ug ri.” Lene Barak kin nide tentara ibou sribu simnai yahagom ijuk kwei leu Nungug Tabor.

¹⁵Tirigi Barak kin nide tentara icut igkep yok lene TUHAN bindei ba, Sisera kin yo di ibri kroba pran pima yahagom ingon tai-tai bou nindig bibor. Gima rino noni kinyon leu nide kroba pran binang leu yok.

¹⁶Lene Barak kin nide tentara yuhuk kroba pran nindigsi nya kin tentara yahagom kikau ug ei Haroset-Hagoyim bigyai nimai bak yahagom. Hi di niyaijo ei nimai nya ikieti bi.

¹⁷Lene Sisera nang kikau bicoi ug ei prak meng nsi gom lo, prak meng dima ne Heber di mben Keni pima nitnem Yael de ri. Noni nang ug ei sirima lewo nibou ndig Yabin leu Hazor hig nisut bit yo di imbier kim Heber.

¹⁸Lene Yael hei leu prak meng biya um Sisera lene cigit noni bipai “Acoi kwei ei ditde prak mengti lene ma attin bu au.” Gima rino Sisera coi ug ei prak meng dimati leu api Yael ku noni nyahan nding minyahas di ndok.

¹⁹Lene Sisera pai binoni “Ma ahug minyei hi bida lewo dinggobiau.” Gima rino Yael hug sapi do ngei leu aigmui mindhe ngkek bak bidut leu api ku noni hanyen nding minyahas pima.

²⁰Lene Sisera cuk noni bipai “Aya ser dimbou huigya. Gino hi kwei nggok no di bong ser ade prak meng lene ma aom ser bipia hi bongti bi.”

²¹Sisera ninghuisi wei nindig bibor apino bong mai hak. Mpe dima lene Yael ug nggok apak kin paku nindig di ibohok prak meng nya ningat gom bimbris nyahan kwei bipek paku kin Sisera nijap kikau bikimbas ug ei dihyeiti apino noni mai.

²²Tirigi Barak tau kwei binggok ser Sisera lene Yael hei leu prak meng buug um noni lene pai bak “Akwei bidindo no di anggok ser dima bina.” Gima rino Barak coi bit noni ug ei prak meng nsi bingat lo, Sisera mai ei nibongti ba, paku pima tibim nimbiam bouti kikau bindei dihyei.

²³Njap dima lene Tuhan bindei ba, Yabin di nibou ndig mben Kanaan cut bak mben Israel.

²⁴Lewo mben Israel ibrim ingkek bihwen noni kin nide tentara sindam bibor ba, yahagom imai bingwig.