Read Hatam NIJAM NIKEI NYA 5 Bible Online

NIJAM NIKEI NYA 5 - Hatam bible

NIJAM NIKEI NYA 5

¹Njap dima ne Debora kin Barak di Abinoam nipmot ipai doia gom,

²bipia jikwei ba, inggei sut TUHAN! Lewo mben Israel ibungwam mem gima ikon pran ba, TUHAN de limwa nya iba ingon di llei bibor binjei siceu.

³Je di nibou ndig nya e, ma jingig jitingou! Je di nibou mien nya e, ma jimiap! Midahap diji tut doia gom. Midibinggei sut TUHAN di nok mben Israel ide Allah.

⁴TUHAN e, tirigi po akwei leu nungug him ei Seir ba, akes minu Edom bijo ei lene dihyei ugwa-kwei ba, dimbou ei mpia-bbed him kau apino mpia but nindig bibor cem tu.

⁵ Nungug nya ugwa-kwei ei No di ninyeng tak kep Nungug Sinai Noho bei ba, ei TUHAN di nok mben Israel ide Allah Noho bei cem.

⁶Nipou ne ei nijam Samgar di nicig ninyeng Anat kin nijam Yael lene yo di itri-ibipek mun ingkwei-ngkwei nyen ei minu dini bi. Lewo yahagom ikriau bimbut ter.

⁷Debora e, nipou tirigi akwei bigyo lene mben Israel ide minu nya dem kep nok ha he bong. Noro akweisi dini noyam kin sop di ngondut nimunggwom bat nya nikwei hanyenti.

⁸Nipou tirigi mben Israel sindi ikuk yok bak kwar nya lene ide siceu nya ihwen yok. Mbro nok gino mben Israel ide tentara imangti ibou sribu ningot bitai lo, hi krau simeda kin mun di ibipukep ser tibor ninggwenti ei nindati bi.

⁹Doom da ei mben Israel ide nibou pran nya di iba ingon di llei bibor binjei siceu yahagom yoho bei bidikon inyenga. Jikwei ba, inggei sut TUHAN!

¹⁰Je di jibri keledai di nitiei kin je di jigwam kep mun di ingig ei kuda ninghim dip kin je di jimbut jimig ei dihyeiti jahagom e, ma jitri tut notou ide siceu nya icut bak nyeni tu.

¹¹Ma jingig jitingou mem yo di induk yam di ingwig ttai minyei bousi ighyet di imbos-hi-mbos tirigi ipui sut notou ide siceu nya icut bak TUHAN ba, icut bak mben Israel cem ug e. Yahagom injei bram yam ba, yehei kak dimbou hui ei ngug tig di bikrop ttai ide minu nya.

¹²Debora e, ma akiju ba, apai doia. Barak di Abinoam nipmot e, ma akiju ba, attei yo di apos yok tu nya ba, ambut tut.

¹³Mpe dima lene yo di ingon gom nya induk yam kwei bigya kui ide nibou nya. TUHAN de limwa nya idem yam ei mem gima ikon pran.

¹⁴Yoni ikwei leu hanjop keret Efraim ndam mbang briep gom ba, ibit keret Benyamin de tentara di injei bram yam bibie yoho. Nibou pran nya ikwei leu Makhir lene yo di igya kui yok ikwei leu Zebulon.

¹⁵Nibou keret Isakhar nya ibit Debora kwei. I, keret Isakhar nya ikwei ba, Barak bit yoni. Yo dini ibit Barak ba, ijuk ug ei mbang briep. Noro keret Ruben ingon can ba, bit bon iba ingon gom bicom ighyet kan bi.

¹⁶Nggon rino ikuk yonti ei ide hanjop nsi bigwam ser ide domba nya i? Leu binhyepo ingig itingou mem gembala nya di ijem ide domba nya ighyet e? Jit, keret Ruben ingon can lewo bit bon iba ingon gom bicom ighyet kan bi.

¹⁷Keret Gad ikuk yonti bigwam ei Minyei Yordan nite bei mpia nipriti. Keret Dan ikuk yonti bigwam ei ide kibar minyeisi nya. Keret Asyer ikuk yonti bigwam ei muk nintig dip.

¹⁸Noro keret Zebulon kin Naftali inggok imai eisi tirigi ikon pran bihwen ide siceu nya.

¹⁹Nibou mben Kanaan nya injei siceu ba, ikon pran ei Taanakh dideu minyei yaisi ei Megido noro ipos ndigban perak bingkwei hanyen tut kan bi.

²⁰Lewo ham mpia-bbed him nya di jimjit cem ikon pran tirigi ibrim ingkek bihwen bit Sisera kwei leu imbut-mbut nyen eisi di mpia-bbed him.

²¹Minyei Kisyon su nindig bibor bikot nyende siceu nya yahagom bimai bingwig. Sinnei e, kei mem sibrim singkek ba, simbut sindem.

²²Mpe dima lene kuda pran nya idor kwei sut yo di ibri bigwam inghim dip di ibindei ba, kuda nya imbut sindem.

²³TUHAN de malaikati pai “Midisigion timiei Meros nya kin ide minu lewo ikwei mpu nye ba, ibrim ingkek mem gima ikon pran mem TUHAN bit nye bi.”

²⁴Yael di nijjep ninyeng Heber di mben Keni pima ninyeng jei ba, yai mun di kei nindig bibor dor njiriek sop nindigsi di yohok prak meng nya yahagom.

²⁵Mpe di po Sisera nggobiau ba, hara minyei pima lene Yael hug sapi do ngei ei mok di nibok kak biborti bak noni bidut.

²⁶Lene noni krau paku nibohok prak meng nindig ningat gom ei ninda nite hi ba, krau apak gom ei ninda nite hi bu. Noni ba apak bibui Sisera nijap ba, nem-nnai leu api ba paku pima bipek nimbiam bou.

²⁷Lene Sisera tti ug ei dihyeisi ei Yael nimig him ba, tug ndei njap nimai.

²⁸Mpe dima lene Sisera nipmem cem kep kendera mihyeti ser nikwei hanyenti bikan ei ningonti “Nggon rino Sisera de kroba pran tau kwei bigyo i? Nggon rino nide kuda pran nimig buhun ba, simiap nibimbi bigyo i?”

²⁹Nide awak sop di ingon ki nya ibuhup nihyet noyam kin nonti ningon kan-kan nyenti bipai,

³⁰“Dwai! Sisera nya ikwas ndigban di ipos tu nya tut yam ba, imbus sop gwam nitta pilei gom can ba, ikwas bibikwop tentara yahagom ba, noni ma minghas di nibok kak bibor mem nonti lene nide nibou ndig sop ma sre di ibien nok gi kei bibor mem nonti.”

³¹TUHAN e, dingat nadi leu binhyepo Ade siceu nya yahagom itug ndei nimai noyam kin Sisera. Dingat nadi leu binhyepo asut bat nya yahagom igyai inyeng jei ba, sieng-siau kei dem kep nok mpia njap nipriti! Gima hagom ngwig lene mben Israel ibong kei igwam kei kikau mem ari bingwam ningot bitai bu.