Read Hatam NIJAM NIKEI NYA 6 Bible Online

NIJAM NIKEI NYA 6 - Hatam bible

NIJAM NIKEI NYA 6

¹Ei niabiati bu lene mben Israel ibon sisar nindig bibor tut TUHAN hanyen bu. Gima rino Noni sindui sut mben Midian ico kep yok mem ari bingwam muhwindacan.

²Mben Midian isindem bibor dor njiriek mben Israel. Gima rino mben Israel iku yok nyahan ei hak mihyeti nya kin nungug him.

³Tirigi igyai miai lene mben Midian kin Amalek kin ngkiai nya di ibong bidem iggum ndigsi yahagom ikwei hwen bit yok.

⁴Ba, yohok ide prak meng yati ei mben Israel ide hanjop nsi bibindei njita beisi nya hagom kinei bibor kikau ug bipek kin Gaza. Yoni imbrai mben Israel ide mindhe di nok domba nya kin sapi nya kin keledai nya hagom bimbut tut ningwig leu api mben Israel yahagom yuhui mbum.

⁵Yo dima ijem ide mindhe-ndhe nya kwei ba, yohok ide prak meng nya mang bibor bingwig kep mben Israel ide hanjop nsi dem kep nok hai ceng nya di ingwig kep dihyei nisurti-nipekti hagom. Bit bon hi kwop tungwatu nya kin ide unta nya imangti kan bi. Lene ibindei ba, mben Israel ide hanjop dima hagom kinei bibor.

⁶Noro mben Israel isindem mem ibon mun nyeng hi biyok bi.

⁷Mpe dima lene yahara TUHAN leu binhyepo Noni mimpu yok bitti kin yok tirigi ikon pran bit mben Midian.

⁸Lene TUHAN cuk nabi gom ndam yok bisok nihyet ei nabi dima dip bak mben Israel bipai “Dani ne TUHAN bidinok jide Allah rin ba, diteu je bijingwes ngun leu mben Mesir po yuubon je nok awak pima tu.

⁹Diteu je bijingwes ngun leu minu Mesir kin jide siceu nya di ibong ser jide minu dini hagom tu cem. Dijji yok sindam tirigi jihwen yok leu api dikwas ide hanjop nsi dini tut je tu.

¹⁰Dani ne TUHAN bidinok jide Allah rin bit leu nok dipai bije tu. Mpe dima lene disok kep je ser nhyema jikuk je bak mben Amori po ibong ser minu dini ide kwar nya au. Noro jibit disok kep jeti dima bi.”

¹¹Lo bi lene mpe dima TUHAN de malaikati gom tau kwei ei Ofra bigwam nyahan ei biei ndig gom nitriti. Biei dima ne niceu ninyeng Yoas ba, nide mbier kim Abiezer. Noni yai nipmot Gideon lo, Gideon sindi ku no nyahan leu mben Midian igyai him ei bak nindig di ipot ba anggur ningat eisi biyai gandum nicap leu.

¹²Lene TUHAN de malaikati dima tau kep Gideon ei sirima bipai bak “Acem! Nani ne pinai pilei di mimbri kui angkek bibor tug hon TUHAN di ningat rin bit na.”

¹³Lene Gideon buhup “Andigpoi e, dahara ser na. Gino TUHAN ningat rin bit nye lene nggon rino mun di buhun bibor dini yok hagom cut igkep nye i? Mindur di nyeni nidigup bat-nidigai bat nya ipui sut po TUHAN bibon mem yok nipou su tirigi po Noni buwak yok kwei leu minu Mesir pima hagom pror bingwig leu nye tu e? Jo nibreisi bipia Noni kes nye ei mben Midian indati lene ningat rin bit nye bu bi.”

¹⁴Lene TUHAN cuk noni bipai “Ma aug ba, aba ade nisindemti titut yam biteu mben Israel bingwes ngun leu mben Midian inda nsi a. Dani ne No di cuk na ri.”

¹⁵Lene Gideon buhup “TUHAN e, notou miditeu mben Israel bingwes ngun i? Dimbier kim pung di bon ninyeng bi ei keret Manasye ikieti. Lene dide bat nya yahagom ibon inyeng dor njiriek da.”

¹⁶Lene TUHAN pai binoni “Nani adem mem midyai dima lewo midimpu na. Jei bi lene mporo aco kep mben Midian ba, atam yok bingwig dem kep nok ahwen tungwagom ngat he.”

¹⁷Lene Gideon pai biNoni “Gino ajoi sut da lene ma ando bindo bida leu binhyepo dikan tut bipia Nani ne TUHAN nijit ri.

¹⁸Gino ace tut lene agwam mbigom bibou duug ngei njita hi kwei bina ug e.” Lene no dima buhup “Dwai. Midigwam mem na bibou angei njita hi kwei bida ug e.”

¹⁹Gima rino Gideon ngkwei hanyen ug ei nide ig bei bibui kambir di nehen pap ningut gom bibam lene ba tepun naham gom bikang roti di dwoi bi. Lene noni kes mikwau dima ei bansiti ba, hug ningei cem ei yeng gomti bikwei sut. Lene yai hagom bak TUHAN de malaikati di gwam mem noni ei biei ndig pima nitriti.

²⁰Lene malaikati dima cuk noni “Ma akes mikwau kin roti ei tig mma dini dip leu api aba ningei biprok hagom.” Lene Gideon yai igbit malaikati nicuk noti.

²¹Lene malaikati dima su nide tom bingget mikwau kin roti dima. Nok rino hum di cig-cai sror kros kwei leu tig mma dima ninsi ba, yem mikwau kin roti hagom bingwig. Lene malaikati nonti cem pror hak.

²²Lene jo nibreisi mem Gideon bipia no di noni ngat pima ne TUHAN de malaikati ri. Gima rino noni ba ningon di digit bingat nadi bipai “TUHAN Di Ninyeng Jei Bibor e, notou mem da i? Lewo dingat Ade malaikati niimaisi bou diyai him tu!”

²³Lene TUHAN buhup “Nok ug e. Ma attin tut au. Mporo ma atug ndei nimai drek dip bi.”

²⁴Lene Gideon ba tig bidingug nimbar hum dok gom mem TUHAN ei sirima lene jem ninyeng “TUHAN Nok Nibousi Mem Nibong Kei Nigwam Keisi.” (Nimbar hum dok dima no jo ei Abiezer nide bat nya ide minu Ofra kikau kwei bipek ammani kep.)

²⁵Mmun tu lene TUHAN cuk Gideon “Ma ajem acig de sapi nikre di nide njap dem ari bingwam muhwindacan kwei lene ma anggek acig de nimbar hum dok di noni pigig sut ei mem Baal leu api awim cou biei di noni pigig sut ei mem kwar sop di kuk no bak Asyera di jo simiak nimbar hum dok dima cem.

²⁶Lene ma adingug tig binok nimbar hum dok di ngkiem-kiau di nijep bu hammi mpia di anggek nitimiei leusi. Lene ma abui sapi dima ba, arop biei di acig pigig sut ei mem Asyera dima ba, abindig sapi titut kep hum mem TUHAN.”

²⁷Lene Gideon nduk nide awak nya ibou simnai biyai hagom bit leu nok TUHAN nicuk noti. Noro noni yai gima mem njap bi lewo ttin tut nide bat nya kin timiei minu dima. Gima rino noni yai gima mem mmun mau.

²⁸Tirigi timiei minu dima ikiju mem njap bigyokti lene ingat lo, tungwahi nggek Baal de nimbar hum dok bikinei su lene birop Asyera de cou biei bindig kep hum ba, bibon nimbar hum dok nijep ei sirima bibui sapi nikre nok nibon midut nindig mindhe titut kep humti eisi tu.

²⁹Lene ihig yam nyen ser no di yai mun dini yok hagom apino ikan tut bipia Gideon di Yoas nipmot rino bindei a.

³⁰Lene icuk Yoas bipai “Apmot nggek Baal de nimbar hum dok ba, rop kwar nisop Asyera di ikuk nye bak de cou biei di jo simiak nimbar hum dok bingwig su. Leu gima rino ma abuwak noni kwei ei nisai dini leu binhyepo niyai nimai binoni drek dip niyai munti dima.”

³¹Noro Yoas buhup yo di icug titip noni dima ighyet “Je jitti kin Baal bijahati tut noni e? Tungwa tou rino tti kin Baal mitug midut nipou tirigi mpia com mem njap di hyep bigyo. Gino Baal ne Allah nijit rin lene ma noni yai nibou tut bikes hukum ei nyeni dip lewo nimbar hum dok di kinei su dima ne nide ri.”

³²Hon kep njap dima kui lene tungwatu nya ijem Gideon ninyeng hi Yerubaal[1] lewo Yoas simbot dat bipai “Jisindui sut Baal nonti yai nibou tut bikes hukum ei Gideon dip lewo nimbar hum dok di kinei su dima ne Baal de ri.”

³³Lene mben Midian kin Amalek kin ngkiai nya di ibong bidem iggum ndigsi yahagom isigon Minyei Yordan ba, yohok ide prak meng yati ei mbang briep Yizreel.

³⁴Mpe dima lene Gideon yai nisindemti leu TUHAN Ninnei. Noni miep pun mbrei gom binduk yo di imbier kim Abiezer yahagom kwei bingwig kep noni.

³⁵Lene noni sok nihyet bak keret Asyer kin Zebulon kin Naftali kin Manasye gi hi di ibong ei Minyei Yordan nite dima ug kin gi hi di ibong ei nite dini kwei leu binhyepo induk yam kwei ba, injei siceu bit noni.

³⁶Lene noni pai bak Allah “TUHAN e, ma ando angon kanti bida gino ajoi sut mem ateu mben Israel bingwes ngun tug hon dani.

³⁷Gino ajoi sut da lene midingig domba nta ninghas gom ei dihyeisi ei mpia di nittei gandum ngan eisi. Gino dingig diyai kep domba nta dima mem njap bigyokti bidingat lo, nggou kui domba nta he lene dihyei ngga kei lene midikan tut bipia mporo ma ateu mben Israel bingwes ngun tug hon dani.”

³⁸Lene hagom pek kep mem noni dem igbit nipaisi. Tirigi noni kiju mem njap bigyokti lene ug yai domba nta leu api kimut ningei kui bokor nuut gom.

³⁹Lene noni pai bak Allah “Ma angon pus tut da au. Midindo dingon kanti gom kin bu biNa. Midiba domba nta bibingon Na mbigom kin bu. Noro gini bu ne ma domba nta ngga kei mem njap bigyokti lo, nggou kui dihyeiti ba, ndot ttai nijoti.”

⁴⁰Lene Allah yai igbit Gideon ningon kanti. Njap bigyokti lene noni ngat lo, domba nta ngga kei noro nggou kui dihyeiti ba, ndot ttai nijoti.