Read Hatam NIJAM NIKEI NYA 7 Bible Online

NIJAM NIKEI NYA 7 - Hatam bible

NIJAM NIKEI NYA 7

¹Njap poi ser lene Gideon kin nide limwa nya ikiju mem ha yausi ba, yuug hok ide prak meng yati dideu minyei bousi Harod. Lene mben Midian yohok ide prak meng yati ei mbang briep gom bei mpia nijjai di birok kik Nungug More nimigya.

²Lene TUHAN pai bak Gideon “Ade limwa nya imang ndig njiriek dingon kanti. Midibindei ba, mben Midian micut bak je bi lewo jei bi ne ade limwa nya mikan bipia yonti igya kep bihwen ide siceu nya tug hon ide nisindemti apino minggei sut Da di TUHAN bi.

³ Gima rino ma atri tut biyok ‘Tungwa tou rino ttin mben Midian lene ma no dima ngkwei hanyen leu Nungug Gilead dini buug ei nide hanjop nsi.’ ” Lene ibou sribu ningot can can intek gimahap bingkwei hanyen lo, ibou sribu simnai igwam.

⁴Lene TUHAN pai bak Gideon bu “Jimangti nindig bibor njiriek dingon kanti. Ma abuwak yok ba, juug ei minyei nyai leu api mididimig yok leu yam ei mpia dima. Gino dindo bina bipia bihi idem mem gima ibit na lene ma yo dima ibit na. Gino dindo bina bipia bihi idem mem gima ibit na bi lene ma yo dima ibit nani au.”

⁵Lene Gideon buwak nide limwa nya ug ei minyei nyai leu api TUHAN pingok ningonti bipai “Ma akwas yo di ipiei minyei he nok nsien nya bigya ter leu yo di iba ibiau bicom mpia leu api idut minyei ei ugyousi.”

⁶Lene ibou sratus ningai he iba inda bitau minyei ei inda bia bei leu api ipiei. Nindigsi nya yahagom iba ibiau bicom mpia leu api idut minyei ei ugyousi.

⁷Lene TUHAN pai bak Gideon “Miditeu je di mben Israel bijingwes ngun tirigi dibindei ba, mben Midian micut bak ibou sratus ningai di ipiei minyei he pima. Ma akes nindigsi nya yahagom ba, ingkwei hanyen ug ei ide minu.”

⁸Gima rino Gideon kes nindigsi nya yahagom bingkwei hanyen. Noro ibou sratus ningai igwam. Lene yo dini igyai nimbumbati mem ibikon pran kin pun mbrei nya hagom leu nindigsi di ingkwei hanyen ug ei ide minu. Mpe dima lene mben Midian yohok ide prak meng yati bijehei ei mbang briep mu.

⁹Himmun dima lene TUHAN cuk Gideon bipai “Ma nani kin ade tentara jikiju ba, jihwen mben Midian lewo midibindei ba, icut bak jeni ug ri.

¹⁰Ne gino attin tut lene ma ade awak Pura jeni juug yok jitta kep mben Midian ei ide prak meng yati.

¹¹Apino mun di isimbot kep biyam di mitibim ei jitingou nsi mibindei ba, mimbri mikui jingkek mem gima jihwen yok hak ug.” Gima rino Gideon kin nide awak Pura ijuk kwei ei mben Midian ide prak meng yati ninghas him bigyok itta kep yok.

¹²Lo bi lene mben Midian kin Amalek kin ngkiai nya di ibong bidem iggum ndigsi yahagom ikieng kep mbang briep dima dem kep nok hai ceng nya di igyem mpia ei dihyei ninjek dip. Ide unta nya cem imangti noyam kin iggum ei muk nipimat nimangti.

¹³Tirigi Gideon ug krau lene noni ntu kep timiei Midian gom di pui sut nide mun di mumpriem bak nisut timiei Midian gom bu. Bipai binoni “Dimumpriem bidingat lo, roti nindak gom rim-rim nyen kwei ei ide prak meng nikieti dini bitot prak meng gom. Lene prak meng dima yok hagom tti ug ei dihyeisi.”

¹⁴Leu api nisut buhup “Mbenjen! Roti dima ndo tut Gideon di Yoas nipmot leu mben Israel nide simeda ri! Mumpriem dima ndo binye bipia Allah mibindei ba, nye di mben Midian bitut ide tentara yahagom micut bak noni ug ri!”

¹⁵Hammi tirigi Gideon miap tut mumpriem dima kin mun di bindo rino noni ba nibiau bicom mpia bikuk no bak Allah. Lene ngkwei hanyen ug ei mben Israel ide prak meng yati bipai biyok “Jikiju! TUHAN mibindei ba, tentara Midian yahagom micut bak nyeni ug ri!”

¹⁶Lene noni kwas nide limwa nya ei nimpung ningai leu api yai pun mbrei gom kin dibijig gom kin hyem njeng gom bibikwop yahagom lo, iku hyem di njeng ei ide dibijigti.

¹⁷Lene pai biyok “Tirigi duug krau mben Midian ide prak meng yati ninghas him lene ma jitou kep da leu api jiyai igbit diyaisi.

¹⁸Tirigi nyende nimpung nimiep pun mbrei nya lene je di nindigsi jahagom jimiep pun mbrei nya tirigi jiyon ttai yo dima ide prak meng yati. Lene ma jahagom jimbos bijipai ‘Mem TUHAN kin Gideon cem!’ ”

¹⁹Lene Gideon kin nide limwa nya ibou sratus gom imbris nyahan bijuk ug ei prak meng pima ninghas him mem mmun mau niabiati yo di igya ser nya iluei yamti. Lene Gideon nya yahagom imiep pun mbrei kros ba, ibindei ki ide dibijig binnir-wap.

²⁰Lene nimpung nindigsi can cem igyai bit leu nok Gideon niyaisi dima. Gima rino yahagom ikrau ide hyem di njeng ei inda prak bisu kui lene ikrau ide pun mbrei ei inda com leu api yahagom imbos bipai “Simeda hi mem TUHAN lene hi mem Gideon!”

²¹Yo dini yahagom igya igyati binddong bigyon ttai mben Midian ide prak meng yati apino ide siceu nya yahagom inang bingwig lene ibahara tignam bibor.

²²Tirigi Gideon de limwa nya imiep ide pun mbrei kikau lene TUHAN bindei ba, ide siceu nya iba ide simeda bitot yam ariwace. Lene inang ug ei Zerera kikau ug bipek kin Bet-Sita kin Abel-Mehola dideu Tabat.

²³Lene Gideon sok nihyet bak keret Naftali kin Asyer kin Manasye po ikwas yam pima ide tentara ba, yoni cem ikwei huk mben Midian nya.

²⁴Lene noni sok nihyet bu ei tungwatu nya dip ug ei nungug him bak Efraim nya bahara yok “Jikwei bijimpu nye ba, ihwen mben Midian. Ma jiya ser Minyei Yordan nyai kin minyei nggram nindigsi nya kikau ug ei Bet-Bara leu binhyepo tentara Midian isigon minyei bi.” Gima rino tentara Efraim induk yam ba, ikwei ya ser Minyei Yordan nyai kin minyei nggram nindigsi nya kikau ug bipek kin Bet-Bara.

²⁵Yo dini ikat mben Midian ide nibou ndig ibou can di inyeng Oreb kin Zeeb. Lene igyai nimai bak Oreb ei tig nindig Oreb dip leu api igyai nimai bak Zeeb ei bak gom di ipot ba anggur ningat eisi ba, ijem mpia dima cem ninyeng Zeeb. Lene yuhuk tentara Midian kikau leu api ipwoi Oreb kin Zeeb itibou kwei bigyai bak Gideon tirigi noni sigon Minyei Yordan buug dihip ei nite bei mpia nipriti.