Read Hatam NIJAM NIKEI NYA 8 Bible Online

NIJAM NIKEI NYA 8 - Hatam bible

NIJAM NIKEI NYA 8

¹Lene pinai nya leu keret Efraim ihig ser Gideon “Nggon rino anduk nye kwei ei mpe di po akon pran bit mben Midian bi i? Nggon rino abibon nye nok gima i?” Yoni inso Gideon bibor nok gima.

²Noro Gideon buhup “Mun di niyai bon ninyeng bi gino dibinai hagom kin mun di jeni jiyai su. Mbro nok gino jimpu nye wer nimien lo, hagom bon ninyeng dor njiriek mun di dani kin ditde limwa titut yam niyai su.

³ Jiyai nisindemti leu Allah apino jiyai nimai bak nibou cin Oreb kin Zeeb tu. Gino ibinai hagom kin yam lene jo nibreisi bipia diyaisi nimien bibor.” Gideon pai nok lene yo dima ikes hon ba, ingon sibui sut noni bu bi.

⁴Hon kep jam dima ne Gideon kin nide tentara ibou sratus ningai ikwei krau Minyei Yordan ba, isigon biyuug dihip ei nite hi bu. Noro inghuisi wei nindig bibor lewo yuhuk ide siceu nya kikau.

⁵Tirigi yahagom ikwei krau minu ndig Sukot lene Gideon hara timiei minu dima bipai “Ma jimpu nye ba, jikwas njita poi mien tut ditde tentara lewo yahagom inghuisi wei nindig bibor lo, nuhuk Zebah kin Salmuna di nibou ndig mben Midian ibou can bu.”

⁶Noro nibou Sukot nya ibuhup “We! Jikat Zebah kin Salmuna bigyo lene jahara nye tut njita e? Nggon rima miniyai njita bak ade tentara nya i?”

⁷Gima rino Gideon pai biyok “Nok ug e! Tirigi TUHAN mpu nye binikat yok tu lene midikwei sut cibou ninggwen kin tigau nggwen leu iggum ndigsi ba, midibimbas jahagom ug ri.”

⁸Lene Gideon nya imbut imig kikau ug ei Pnuel bahara yo dima cem noro yoni ibuhup nihyet noyam kin mben Sukot pima.

⁹Gima rino noni buhup “Tirigi dikwei ngat je hanyen lene nyeni mininggek jide ig di jiba tig binut-nut yam bijo-jo yam dip bijo nai bingwig ug ri.”

¹⁰Mpe dima lene nibou cin Zebah kin Salmuna pima kin ide tentara yahagom yuug krau Karkor tu. Ide tentara ne pinai nya leu ngkiai nya di ibong bidem iggum ndigsi pima rin lo, imangti ibou sribu simnaimuhwidip he lewo nindigsi nya ibou sribu sratus gom ba, sribu ningot can imai biwer nimbiam tu.

¹¹Lene Gideon nya ikak puig di sir iggum ndigsi ba, ikriau Nobah kin Yogbeha bei mpia nipriti leu api igya kep bihwen yok kros.

¹²Lo, nibou ndig cin di Zebah kin Salmuna inang leu su noro Gideon nya yuhuk bikat yok kwei hanyen lene gima bindei ba, ide tentara nindigsi nya yahara lewo ingon tai-tai bou nindig bibor.

¹³Niabiati Gideon nya ingkwei hanyen leu gi igya kep bihwen tentara pima yok bimbut hammi nitinggoisi Heres,

¹⁴lene noni kat pinai pilei mben Sukot gom bihig simber noni. Lene noni pas kep mben Sukot di inyeng jei nya ibou ningot muhwindacan ba, muhwindacan inyeng biyai bak Gideon.

¹⁵Lene Gideon nya yuug ngat mben Sukot bipai biyok “Jikan kep gi po jingkek ndok bijimpu da bi pima e? Jikou sut gima jikwas njita hi tut ditde tentara di inghuisi sindem bi bibor pima drek dip gi dikat Zebah kin Salmuna bigyo e? Jingat i! Yo dini ne nibou ndig cin pima ri!”

¹⁶Lene Gideon ug yai cibou nggwen kin tigau nggwen leu iggum ndigsi leu api bimbas pinai Sukot di inyeng jei nya bimos kei.

¹⁷Leu api noni ngkwei ug ei Pnuel binggek ide ig di iba tig binut-nut yam bijo-jo yam dip bijo anai biyai nimai bak pinai minu dima yahagom bingwig.

¹⁸Lene noni hig ser Zebah kin Salmuna “Yo po jiyai nimai biyok ei Tabor idat touti i?” Lene ibuhup “Yahagom idat naniti ba, inoyam kin yo di intun nibou ndig him.”

¹⁹Lene Gideon pai biyok “Yo dima ne dikindig bat-dikinjoi bat nya rin ba, nahagom nibon nipmem gom ngat. Gino jiyai nimai biyok bi lene midiyai nimai bije cem bi.”

²⁰Lene noni cuk nipmot mighumbou Yeter bipai “Ma ayai nimai biyok hak ug!” Noro nipmot hig ningon eisi bihit nide simeda bi lewo noni pinai pilei he.

²¹Lene Zebah kin Salmuna ipai bak Gideon “Gino nani pinai rin ne nnaba nanti ayai nimai binye hak ug.” Gima rino Gideon yai nimai bak yahacem leu api cug mun di ibimau unta nya leu ide unta nya inggibi dip.

²²Jei bi lene mben Israel ibidip huk Gideon bipai “Akwek nye leu mben Midian ide nisindemti tu. Gima rino ma anyeng tak kep nye nok nibou ndig. Lene ma ade nintun him yamti di bram yam nya cem igya luei ahoti bu sindam.”

²³Lene Gideon buhup “Dice tut gima dinyeng tak kep je ba, dipmot cem ninyeng tak kep je nok nibou ndig bi. TUHAN Nongkom ninyeng tak kep je nok nibou ndig.”

²⁴Lene noni pai ningon kanti gom kin bu “Dahara je tut mun nyeng gom he. Ma jahagom bikwop tungwagom-gom jiyai mitingouhim di jiyai leu nimbiam mben Midian hagom bida.” (Pai nok lewo mben Midian indei mitingouhim mas noyam kin yo di ibong bidem iggum ndigsi nindigsi nya.)

²⁵Lene yahagom ibuhup “Kei! Nijoi sut gima niyai hagom bina hak ug.” Lene ingig sre gom ei dihyeisi leu api bikwop yoni yahagom ikes mitingouhim po igyai leu nimbiam ngut pima eisi.

²⁶Mitingouhim mas di nide limwa nya igyai binoni hagom sok yam nibuhunti kilo ningot can. Lene ikwop ndigban nindigsi di nok srak mas kin miep kin minghas nghei nta di nibok kui di nibou ndig Midian nya ibimau yonti kin mun di ibimau ide unta nya bisrou ei ninggibi dip cem nimangti coi bi.

²⁷Lene Gideon ba mitingouhim mas pima titut yam bibon kwar bitas pijum ei Ofra di nitimieisi pima. Apino mben Israel yahagom ikes hon ba, ikuk yok bak Allah bu bi noro ikuk yok bak Gideon de kwar dima. Niyai munti di kinei dima srou Gideon kin nide bat nya yahagom.

²⁸Lo bi lene bit bon mben Midian ikon pran bu kan bi lewo yahagom icut bak mben Israel tu. Gima rino mben Israel ibong kei igwam kei ei ide minu kikau mem ari bingwam ningot bitai bibou Gideon mai leu ug e.

²⁹Niabiati Gideon kon pran bingwig leu su lene noni ngkwei hanyen ug ei nitimieisi bibong ser nide ig bei.

³⁰Noni yai nipmot bat nya ibou ningot muhwindacan lewo wak nitnem bat nya imang bibor.

³¹Lene noni yai nipmot tirimpoi tirigi cut tut sop di mben Sikhem gom bijem ninyeng Abimelekh.

³²Lene Gideon po nicig ninyeng Yoas pima nide njap ngwig hon leu api itig bit nicig ningut ei hak mihyeti gom ei Ofra lewo gini ne yo di imbier kim Abiezer ide minu ri.

³³Niabiati Gideon mai leu yok tu lene mben Israel ingon gom tut Allah bu bi lewo ikuk yok bak Baal nya hanyen bu. Yoni idimig Baal-Berit nok ide kwar di ikuk yok bak.

³⁴Leu api ibit TUHAN di nok ide Allah po teu yok bingwes ngun leu ide siceu nya di ibong ttai yok pima bu bi.

³⁵Lene inggei sut yo di intun Gideon him drek dip mun di kei bibor hagom di noni bibon mem mben Israel bu bi.