Read Hatam NINGAT-HI-NGAT NYA 1 Bible Online

NINGAT-HI-NGAT NYA 1 - Hatam bible

NINGAT-HI-NGAT NYA 1

¹Yesus Kristus mbot kep tut mun di mipek kep mem tungwatu nya ei nidipti bu. Allah ndo mun dini yok hagom biNoni leu binhyepo Noni mbot kep tut hagom hanyen bak Nide awak nya. Kristus sok nihyet tut mun di mipek kep ei nidipti bu ei Nide malaikati dip bak Nide awak di Yohanes.

²Leu api Yohanes tri tut mun di noni ngat bou niyai him nya hagom. Nipas kepti dini hagom pai sut Allah nicuk nyeti kin nihyet di nijit di Yesus Kristus mbot kep tut.

³Bikwop no di kwop srat dini ei nuhui him kin yo di imiap tut mun di mipek kep ei nidipti bibit mun di joti nya ingon nggei-hi-nggei. Lewo tto bou tirigi mun dini yok hagom mipek kep mem nye dideu su.

⁴ He disut bat je di jingat rin ei mbusyamei ningat muhwindacan ei hanjop Asia e, dani ne Yohanes ri. Handei kon ba, Allah singat tut je biyai jingon jo nyahan. Nipigo jeti dini leu Allah di ningat rin annani cem ammani cem di mikwei hanyen yo cem kin ninnei muhwindacan di igya ei Allah de banggo mbrei Noho bei,

⁵ kin Yesus Kristus di ba ningon gom bitri tut mun di Noni ngat bou niyai him. Noni ne mot mighumbou di kiju hanyen leu nimai eisi rin ba, ninyeng tak kep nibou ndig nya ei dihyeisi dini hagom. Noni ningon ngakei nye bikwek nye leu ide sisar tug hon nimaisi,

⁶ bibindei ba, inok imam nya di inggre kin ninyeng tak kepti gom bit Noni bigyai midyai mem Nide Allah kin Nicig cem. Yesus Kristus Nongkom kei-kau-kei ba, sindem bibor cem kikau buug hon nohonti bi! Igbit ri.

⁷ Jingat i! Noni mikwei ei bumbuhuiti kwei ri! Tungwatu nya yahagom bitut yo di idat Noni cem ingat Noni ei igyai him. Ba, tungwatu dihyeisi dini hagom iba nicot bipai sut nikweisi. Gini ne mun di mungkun ri! Igbit ri!

⁸ Allah di Sindem Bibor pai “Dani ne nimbie him kin nohon keti rin lewo dingat rin annani kin ammani bidikwei hanyen yo.”

⁹Dani ne Yohanes ba, dinok jisut no di Kresten ri. Dibicom yam bit je mem nijam di iba ibou coi mem ninghuisi wei di cut igkep Nide limwa nya di inok gom kin Kristus. Disima ei Mios Patmos drek dip gi ditri tut Allah nihyet di Yesus ba Nonti nihyet bibindei sindem bibor.

¹⁰Allah Ninnei bie tut da mem njap nigwam ninghuisi. Ba, dimiap nihyet nindig bibor ei dinghim dip di nok pun mbrei nugwei bong di tibim.

¹¹Nihyet dima cuk da “Ma apas kep mun di angat dini hagom ei srat gomti leu api apinak bak mbusyamei ei minu ndig Efesus kin Smirna kin Pergamus kin Tiatira kin Sardis kin Filadelfia kin Laodikia.”

¹²Dikiek da leu binhyepo dingat igbit no di mbrap bit da bidingat mini njeng nidihim ningat muhwindacan di iba mas bibon.

¹³ Ba, dingat tungwagom di ya srigsi bijuk sinsun ndok di nijeisi ug bipek nimig lene ba bang mas bikri kep ninggeda.

¹⁴ Nibou nta tiei-tiau dem kep hayok mien ninta ba, niyai njeng-jau nok hum njeng.

¹⁵ Nimig cem mbom kei dem kep ngkimom-tembaga di indig kep hum bibindei ba, pimbai kei. Nihyet dem kep minyei ninyei ba, nisu bong nindig bibor.

¹⁶Noni krau ham mpia-bbed him ningat muhwindacan ei ninda comti kin singau simeda nipup gom di bon ninggwenti bei ninghim noho ntun nuhui him. Niimaisi piga kei dem kep mpia njap di com mem mpia huk pijum.

¹⁷ Tirigi dingat Noni lene diba dingwak bikik mpia ei nimig him dem kep no di mai su. Noro Noni ba ninda com bitak da bipai bida “Attin tut au! Dani ne nimbie him kin nohon keti,

¹⁸kin No di niyaijo ri. Nipou ne dimai su noro angat i! Nogindini diyaijo kikau buug hon nohonti bi. Dinyeng tak kep yo di imai su kin minu nimai nya ide.[1]

¹⁹Gima rino ma apas kep mun di angat bou ayai him bitut mun di angat mem nijam dini kin mun di mipek kep ei nidipti bu.

²⁰Gini ne mimun tut ham mpia-bbed him ningat muhwindacan di dikrau ei dinda com bou ayai him kin mini njeng nidihim ningat muhwindacan di iba mas bibon ri. Ham ningat muhwindacan dima ne malaikati nya ibou muhwindacan di ibuhup tut mbusyamei ningat muhwindacan ri. Ba, mini njeng nidihim ningat muhwindacan ne mbusyamei ningat muhwindacan ri.”