Read Hatam NINGAT-HI-NGAT NYA 13 Bible Online

NINGAT-HI-NGAT NYA 13 - Hatam bible

NINGAT-HI-NGAT NYA 13

¹ Leu api dingat lo, mindhe hiter di niten-pos ningut gom kiju kwei leu muk jou. Noni bon nibou muhwindacan ba, nibou nggai simnai ntun nibou muhwindacan pima him lene ttin topi mas bikwop ei nibou nggaiti. Leu api srat bokti di wer mpiahi tut Allah jo bikwop ei nibou ngwakti nya.

² Dingat mindhe hiter di niimaisi dem kep macan di nillikti niimaisi, nimig dem kep beruang nimig, nuhui dem kep singa nuhuigya. Leu api naga kwas nide nisindemti kin nide banggo mbrei kin nide nisindem biborti ndrim hi tut mindhe dima.

³Dingat lo, mindhe nibou gom leu nibou muhwindacan dima bon nimuhweisi nindig bibor dem kep nok gi hi tot bimai hak noro kei hanyen tu. Ba, tungwatu dihyeisi dini hagom inggap leu tut bibit noni.

⁴Ikuk yok bak naga binggei sut noni drek dip gi noni kwas nisindemti ndrim hi tut mindhe. Ba, yahagom ikuk yok bak mindhe binggei sut cem. Iba nimbos-hi-mbos bipai “Tou rino ninyeng jei nok mindhe dima i? Tou rino sindem mem gima kon pran bit noni i?”

⁵ Leu api hi sindui sut ba, mindhe dima ningon jei bibor tut nonti ba, nihyet wer mpiahi tut Allah cem ninyeng tak kep nide limwa nya kikau mem bed ningot bitai ba, can.

⁶Mindhe sindi kucang Allah ningat kin Allah ninyeng kin Allah de mpia di bong eisi kin yo di ingat rin ei gwamti yahagom.

⁷ Leu api hi sindui sut ba, mindhe njei bikon pran bit Allah de limwa nya bibindei cut yok biyai ninyeng di tak kep keret nya kin mben nya kin nihyet nya kin minu nya hagom.

⁸ Tungwatu dihyeisi dini hagom ikuk yok bak mindhe dima binggei sut. Noro tut yo di inyeng jo ei srat niyaijoti habiei ei nimbie him tirigi Allah pai tes dihyeisi dini bigyo ne ikuk yok bak bi. Srat dima ne Domba Pmot di ibui bimai De srat ri.

⁹Suar no di nitingou tu miap nihyet dini biyok ngon kep!

¹⁰ No di yai hukum nisima ei ig bui nsi misima hak. No di miyai nimai tug hon singau simeda miyai nimai tug hon singau simeda hak. Gima rino suar Allah de limwa nya ingon nddong ba, ingon gom cem.

¹¹Leu api dingat lo, mindhe di niten-pos ningut gom kin bu kiju kwei leu dihyei jou. Noni bon nibou nggai can di noyam kin domba nibou nggai ba, nihyet noyam kin naga nihyet.

¹²Mindhe dini ya ei mindhe gi nigom pima noho bei biyai nisindemti hi leu noni leu api cuk tungwatu dihyeisi yahagom ikuk yok bak mindhe gi nigom di hi tot bimai hak noro kei hanyen tu binggei sut.

¹³Mindhe gi nican dini bibon mindur di mindur bibor nya. Noni bindei ba, hum sror kwei leu mpia-bbed him ug ei dihyeisi mu bou tungwatu yahagom igyai him.

¹⁴Ba, hi sindui sut noni biba mindur di bibon ei mindhe gi nigom noho bei biris tungwatu dihyeisi hagom. Mindhe dini cuk yok leu binhyepo ibon kwar di dat mindhe gi nigom di yai nibok leu singau simeda di hi bitot noni noro kiju hanyen leu nimai eisi tu pima.

¹⁵Hi sindui sut ba, mindhe gi nican krau nisindemti mem gima hi ninnei ei kwar dima ninsi apino kwar mbrap biyai nimai bak yo di ikuk yok binoni bi nya.

¹⁶Mindhe gi nican bindei ba, yo di ibon inyeng bi nya kin yo di inyeng jei nya kin yo di inyeng nya kin yo di yuhui mbum nya kin awak nya kin yo di igyati kwes nya yahagom igyai nitak bukti ei inda com kin ingwak.

¹⁷Gino nitak bukti dima jo ei tungwa hi ningkek dip bi lene bit bon tri mun bibipek mun nyeng hi bi sren. Nitak bukti dima ne mindhe gi nigom ninyeng bitut nomor di ndo tut ninyeng ri.

¹⁸Jisuar ningon di ki gino jiyok jiyai kep nomor di ibitak buk dima. Lewo nomor dima nimangti bindo tut tungwagom ninyenga. Nomor nimangti ug ei sratus muhwindagom ningot muhwindagom ba, muhwindagom.