Read Hatam NINGAT-HI-NGAT NYA 14 Bible Online

NINGAT-HI-NGAT NYA 14 - Hatam bible

NINGAT-HI-NGAT NYA 14

¹ Gima ngwig leu lene dingat lo, Domba Pmot ug ya ei nungug Sion ba, Nide limwa nya ibou sribu sratus gom ningot bitai ba, bitai di igya bit Noni igyai Domba Pmot ninyeng kin Nicig ninyeng ei ingwakti tu.

²Dimiap nihyet gom di dem kep minyei ninyei di nisu bong nindig bibor kin kru di cut nibimbiti nindig bibor di tibim kwei leu gwamti ba, nihyet dima noyam kin doia di tungwatu nya iba nggong mbrei bipai.

³Tungwatu nya ibou sribu sratus gom ningot bitai ba, bitai pima igya ei banggo mbrei nuhui kin mindhe ningut bitai pima yoho bei kin nibou nya yoho bei bipai doia di nijep-jau di bit bon hiter ingon dorti tut kan bi. Noro yongkom he ingon dorti tut lewo igyai niteu leu dihyeisi tu.

⁴Yo dini ne pinai nya di igyem njita tut sop nya bi sren rin ba, ingon kwes kei. Ibit-bit nyen Domba Pmot ug ei tirima-tirima. Ba, inok mighumbou di igyati kwes bibie leu tungwatu nindigsi nya mem Allah kin Domba Pmot.

⁵ Yo dini iris mun bi sren ba, ingon kwes-kwau.

⁶Leu api dingat lo, malaikati gom kin bu di mba anai mpia-bbed him bikwei sut nihyet di bit bon pror hanyen kan bi. Noni tri tut nihyet dima bak tungwatu dihyeisi bikwop mben nya kin keret nya kin nihyet nya kin minu nya hagom.

⁷Noni ba nihyet nindig bipai “Ma jikuk je bak Allah bijinggei sut ninyeng di jei bibor. Lewo tto bou dem mem Noni mbus tungwatu nya ingonti. Ma jikuk je bak No di pai tes mpia-bbed him kin dihyeisi kin muk ngeisi kin minyei yaisi nya!”

⁸ Leu api malaikati gi nican bram malaikati gi nigom bipai “Cut tu! Minu ndig Babel di sindem bibor cut tu! Minu ndig dima bindei dino tungwatu nya yahagom idut ba anggur ngei ba, gima ne nide niba noho rok sisar nicut tut yamti ri.”

⁹Leu api malaikati gi niningai bram malaikati cin dima lene ba nihyet nindig bibor bipai “No di kuk no binggei sut mindhe gi nigom bitut nide kwar leu api sindui sut nide nitak bukti ei ningwakti kin ninda,

¹⁰ midut Allah de ba anggur ngei. Gima ne ba anggur ngei nigga biborti rin lewo Noni hug ba anggur ngei dima ei Nide mokti di bindo tut nigga biborti tu ba, minyei srigsi bi. Apino yo dima yahagom mitug ndei inghuisi wei ei humti kin belerang ngeisi ei malaikati di kwes-kwau nya kin Domba Pmot yoho bei.

¹¹ Hum di bindei dino igyai inghuisi wei dima nimmup brou kikau buug hon nohonti bi. Yo di ikuk yo bak mindhe kin nide kwar di igyai nitak buk di bindo tut mindhe ninyeng kin yok cem mitug ndei inghuisi wei bikwop mmun-njap ba, bit bon ingwes ngun kan bi.”

¹²Gima rino ma Allah de limwa di ibit nicuk yokti nya di ingon gom tut Yesus cem ma ingon nddong.

¹³Leu api dimiap nihyet gom di tibim kwei leu gwamti bipai “Apas kep gini. Hon kep nogondini ne yo di inda jo kep midyai di igyai mem Allah di igyai nimai hon kep ammani kui drek dip midyai dima ingon nggei-hi-nggei.” Allah Ninnei buhup “Igbit ri! Yo dima miba ingon di llei bibor bikes inda tut ide midyai di buhun bibor lene ningat di kei di ntun yok him bram yok.”

¹⁴ Leu api dingat bumbuhui ttou di tiei ba, no di dem kep tungwatu gwam dip bittin topi mas lene krau singau koi di nggwen bibor ei nindati.

¹⁵ Malaikati gom kin bu hei kwei leu Allah De Ig lene ba nihyet di nindig bibor bipai bak no di gwam ei bumbuhuiti “Aba ade singau koi bikos njita kwei lewo tto bou dem tu. Dihyeisi len tu!”

¹⁶Leu api no di gwam ei bumbuhuiti mem ninghat tut singau koi ug ei dihyeisi mu bikos njita di len hagom.

¹⁷Lene dingat lo, malaikati gom kin bu hei kwei leu Allah De Ig ei gwamti ba, noni cem krau singau koi di nggwen bibor.

¹⁸Ba, malaikati hi kin bu di ninyeng tak kep hum hei kwei leu nimbar hum ndok. Noni ba nihyet nindig bibor bipai bak malaikati di krau singau koi di nggwen bibor “Amem anghat tut ade singau koi ba, akos ba anggur ngat leu dihyeisi lewo hagom nggwop tu.”

¹⁹Gima rino malaikati dima mem ninghat tut singau koi ug ei dihyeisi mu bikos ba anggur ngat leu api com hagom ug ei bak di nindig bibor di ikimut ba anggur ngei eisi di bindo tut Allah nigga biborti.

²⁰ Bak di ikimut ba anggur ngat eisi dima jo ei minu ndig dima nisai. Ba anggur ngei dima dem kep nggrom bibiam sindem bibor kikau ug ei minu ting bibor bidem kilometer sratus ningai lene nijutti dem meter gom biniken.