Read Hatam NINGAT-HI-NGAT NYA 16 Bible Online

NINGAT-HI-NGAT NYA 16 - Hatam bible

NINGAT-HI-NGAT NYA 16

¹Lene dimiap nihyet ndig bibor di tibim kwei leu Allah De Ig di cuk malaikati ibou muhwindacan dima “Jug ba, jisiber Allah nigga biborti leu bokorti ug ei dihyeisi mu.”

² Malaikati gi nigom ug siber mun di jo ei nide bokorti ug ei dihyeisi mu apino buhwei nindig bibor ba, dut bibor cem com yo di igyai mindhe gi nigom de nitak bukti ei ingkek dip kin yo di ikuk yok bak nide kwar.

³Malaikati gi nican ug siber mun di jo ei nide bokorti ug ei muk ngeisi mu apino muk ngei hagom dem kep nimai nggrom ba, mindhe-ndhe kin wau nya hagom ei muk jou imai bingwig.

⁴ Malaikati gi niningai ug siber mun di jo ei nide bokorti ug ei minyei nibiamti nya kin minyei yaisi nya apino hagom dem kep nggrom.

⁵Leu api dimiap malaikati di ninyeng tak kep minyei nya hagom pai “Allah di kwes-kwau e, angat rin annani cem ammani cem ba, hukum dino akes ei tungwatu nya dip dini hagom igbit ri!

⁶Lewo yo dima isiber Ade limwa nya bitut Ade nabi nya inggrom. Gima rino abindei ba, idut ninggrom nok minyei. Ibiang igyai munti dima nibuhunti bitug ndei imuhup sur igyai munti.”

⁷Leu api dimiap nihyet gom kin bu di tibim kwei leu nimbar hum ndok bipai “Allah Di Sindem Bibor e, hukum dino akes ei yok dip ne igbit ba, sren-srau cem ri.”

⁸Malaikati gi nibitai ug siber mun di jo ei nide bokorti ug ei mpia njapti apino mpia njap wam bibor bitigut tungwatu nya.

⁹Mpia wam bibor bitigut yok apino ikucang Allah lewo Noni sindem ba, bindei nsuwer ajar dima yok hagom cut igkep yok. Noro ikou sut gi ittin ser ide sisar kin gi ikiek yok ndam Allah kin gi inggei sut Nide nisindem biborti.

¹⁰ Malaikati gi nimuhwi ug siber mun di jo ei nide bokorti ug ei mindhe di niten-pos nide banggo mbreiti. Apino nidinditi nggai kep mindhe dima ninyeng tak kepti. Ba, yo dima yaham idweb drek dip buhwei di dut bibor di com yok.

¹¹Ikucang Allah ei gwamti drek dip buhwei di dut bibor di com yok. Noro ittin ser ide sisar bikiek ndam Allah cem bi.

¹² Malaikati gi nimuhwindagom ug siber mun di jo ei nide bokorti ug ei minyei ndig Efratti apino minyei dima hagom pingge leu lene bon ninggati mem nibou ndig nya di mikwei leu mpia nipriti imbut kak.

¹³Dingat ninnei rom di noyam kin ugwaham ningut ningai di ittau kwei leu naga kin mindhe di niten-pos kin nabi nitrowai nya yuhui.

¹⁴Mun dima ne ninnei rom nya di ibon mindur nya ri. Ninnei dini yuug ngat nibou ndig nya ei dihyei nisurti-nipekti binduk yok kwei mem nikon pranti ei Allah Di Sindem Bibor De Njap Nindig.

¹⁵ “Jimiap e! Midihwou timon je dem kep ninggimang kep mun cig. Bikwop no di niyai ngkiem binyohou nide sinsun ne no dima ningon nggei-hi-nggei lewo ba ningat ngu bimbut bi. Leu gi bi ne mimmai sut nonti ei tungwatu nya igyai him.”

¹⁶ Lo bi lene ninnei rom nya induk nibou ndig nya yahagom kwei bidem yam ei mpia di mben Ibrani ijem ninyeng Harmagedon.

¹⁷Malaikati gi nimuhwindacan ug siber mun di jo ei nide bokorti ug ei mpia-bbed him apino nihyet nindig bibor tibim kwei leu banggo mbrei ei Tuhan De Ig bipai “Put tu!”

¹⁸ Leu api kigyei srei kin kru cut ba, nisu bong nindig bibor lene dihyei ugwa-kwei bibor. Ba, nuugwa-kweisi di nok gima hi bigyo habiei leu nimbie him tirigi Allah pai tes tungwatu nya kwei bipek ammani kep. Nuugwa-kweisi dima nindig bibor dor njiriek nindigsi nya hagom!

¹⁹ Minu nindig bibor dima kki ningaisi ba, minu ndig nindigsi nya bidem dihyei nisurti-nipekti hagom lus bingwig. Allah kan kep minu ndig Babel lene bindei ba, dut ba anggur ngei leu Nide mok ba, ningei dima ne Allah nigga biborti ri.

²⁰ Mios nya kin nungug nya cem hagom pror hak.

²¹ Biget di nok tig njep es mbras ba, tig njep es gom nibuhunti kilo ningot muhwi. Es dini cut kwei leu mpia-bbed him ug ei tungwatu nya dip bibindei ba, yo dima ikucang Allah drek dip biget di mbras nok nsuwer ajar dima lewo buhun bibor dor njiriek nindigsi nya.