Read Hatam NINGAT-HI-NGAT NYA 18 Bible Online

NINGAT-HI-NGAT NYA 18 - Hatam bible

NINGAT-HI-NGAT NYA 18

¹Gima ngwig leu lene dingat malaikati gom kin bu di srek kwei leu gwamti. Ninyeng jei bibor ba, ninjeng piga digai dihyeisi dini hagom.

² Noni ba nihyet nindig bibor bahara “Noni cut tu! Minu ndig Babel di ninyeng jei cut tu! Ninnei rom nya kin ha di kinei-kinau di tungwatu nya ingon mpo tut nya hagom iteu ei nigkumti.

³ Lewo minu nya hagom idut kep nide ba anggur ngei di ndo tut nide sisar nicut tut yamti. Nibou ndig dihyeisi dini nya icut tut noni ba, nitri-nipek mun cig di inyeng bibor tug hon nide niba noho rok sisarti di bit bon om kep kan bi.”

⁴ Leu api dimiap nihyet gom kin bu di tibim kwei leu gwamti bipai “Ditde limwa jen, ma jehei kwei o! Ma jehei kwei leu minu ndig dima o! Ma jipriet kin nide sisar bijitug ndei hukum bit noni au o!

⁵ Lewo noni kum ei nide sisarti bikui sur mpia-bbed him. Allah kan kep nide sisar di nindig bibor.

⁶ Ma jibibon noni bit leu nok noni bibon je ba, jibirop binoni hanyen mbican bram yam tut niyai munti nya hagom. Ma juhug ningei di mpo-mpam ei nide mokti ba, nimpo-mpamti dor tunggwei ningei di noni hug ei jide mokti.

⁷ Ma jibindei ba, ninghuisi wei nindig bibor ba, ningon ngguk bibor cem sur nide ningon jei sut nonti kin ndigban nindig bibor di noni mbus keyam ei mem nonti. Lewo noni kan a ‘Sani ne sop nibou ndig rin ba, sinyeng tak kep mun nyeng hagom. Sani ne sop kibom rin bi ba, misingon ngguk bi sren.’

⁸Pai nok noro nsuwer ajar mihwen noni drek dip nipaisi dima. Noni minggwen cem ningon mingguk bibor cem ninggum bibor mihwen noni cem ba, hagom micut igkep noni mem njap gom ngat he. Hum miyem noni bingkiong lewo Allah Di Sindem Bibor rino kes hukum ei noni dip a.”

⁹ Nibou ndig dihyeisi dini di icut tut noni bimbus ndigban nindig bibor keyam ei bit noni cem yahagom mipim bigyai nggwei kibor tut minu ndig dima tirigi ingat hum mmup di brou leu hum di yem noni bingkiong dima.

¹⁰Igya igyati ei minu ting lewo idigit tut bipia mpaba yoni cem mitug ndei hukum bit noni. Ba, yahara “Ayo! Ayo! Notou mem na di minu ndig Babel di anyeng jei ba, asindem bibor i? Atug ndei hukum ei jam gom ngat he!”

¹¹ Nitri-nibipek kep mun cig nya cem ipim bigyai nggwei kibor lewo hi dima pek mun di itri nya bu bi.

¹² Hi dima pek ide mas kin perak kin tig permata kin sriou tiei njep kin minyahas ninyeng biei ngei kin ban ndur kin bicut kin ban cun nya kin mun di iba biei mbrei kin gaja nikwai kin ngkimom-tembaga kin ngkimom nitu kin biei di nibok kui kin tig pualam bibon bou inda him,

¹³kin biei ngkek di nyop kin mun di ui-gwang kei nya kin mini ibou kin mur[8] kin biei nggrai di ui-gwang kei kin ba anggur ngei kin mini dui kin tepun kin gandum kin sapi nya kin domba nya kin kuda bitut kroba nya kin awak nya bitut tungwatu igyaijoti nya.

¹⁴Nitri-nibipek kep mun cig nya ipai binoni “Ade ndigban nindig bibor di ambus keyam mem nanti kin mun di anyeng tut kin ade sinsun di sieng-siau nya hagom sar bingwig ba, bit bon angat mun dima yok hanyen kan bi.”

¹⁵ Nitri-nibipek kep mun cig nya di igyai mitiei nindig bibor ei minu ndig Babel igya igyati ei minu ting lewo idigit tut bipia mpaba yoni cem mitug ndei hukum bit noni. Yoni mipim bigyai nggwei kibor drek dip.

¹⁶Ba, yahara “Ayo! Ayo! Notou mem minu ndig di ninyeng jei dima i? Nipou lene noni juk sinsun di iba linen bibon kin sinsun nghei nta kin sinsun ningwoi lene bindei mas kin tig permata kin sriou tiei njep.

¹⁷ Noro ndigban di nindig bibor di noni nyeng tut dima hagom sar mem jam gom ngat he!” Kiten kibar nya kin yo di ibri kibar nya kin timiei kibar nsi nya kin yo di iba kibar biyai midyai ei minyei ngwa dip nya yahagom igya igyati ei minu ting.

¹⁸ Tirigi ingat hum di yem minu ndig dima nimmup di brou lene iba ighyet nindig bibor bahara “Minu ndig hiter nok Babel di ninyeng jei dima bi sren o!”

¹⁹ Ikam dihyei ndung ba, ibigimahap ei ibousi cem ipim cem ingon ngguk bibor cem ba, yahara “Ayo! Ayo! Notou mem minu ndig di ninyeng jei dima i? Kiten kibar nya yahagom igyai mitiei nindig bibor tug hon ndig ban di nibok kui di itri bibipek mun ei minu ndig dima. Noro ndigban di minu ndig dima nyeng tut nya hagom sar mem jam gom ngat he!”

²⁰ Timiei gwamti jen, ma jingon llei bibor tut minu ndig dima nicutti! Allah de limwa kin je di jiya kui Yesus kin je di nabi e, ma jingon llei bibor! Lewo Allah kes hukum ei minu ndig dima dip drek dip niyai munti di kinei bibor di bibon bije tu.

²¹ Leu api malaikati di sindem bibor gom kon tig mma di nindig bibor dem kep tig gilingan bicom ug ei muk ngeisi bipai “Allah ba nigga biborti bicom minu ndig Babel di ninyeng jei nok tig dima bibindei ba, sar bihigom.

²² Nggong mbrei nibimbiti kin yo di ipai doia kin yo di imiep suling kin pun mbrei mitibim kwei leu minu ndig dima bu bi. Nibon kep mun bou ninda him cig nya yahagom inang leu su. Tig gilingan nibimbi mitibim ei minu ndig dima bu bi.

²³Tungwatu nya ingat mini ninjeng di piga digai minu ndig dima bu bi. Ibon pesta niwak yamti ei minu ndig dima bu bi. Nipou ne nitri-nibipek kep mun cig ei minu ndig dima inyeng jei dor njiriek nitri-nibipek kep mun cig nya ei dihyeisi dini hagom. Nipou ne minu ndig dima ba ninda dut biris tungwatu dihyeisi dini hagom.”

²⁴ Minu ndig Babel tug ndei hukum drek dip nabi nya kin Allah de limwa nindigsi nya kin hiter di igyai nimai nya yahagom inggrom di biam ei minu ndig dima.