Read Hatam NINGAT-HI-NGAT NYA 2 Bible Online

NINGAT-HI-NGAT NYA 2 - Hatam bible

NINGAT-HI-NGAT NYA 2

¹“Apas srat dini bak malaikati di buhup tut mbusyamei ei minu ndig Efesus. Nipas kepti dini kwei leu No di krau ham ningat muhwindacan pima ei ninda com di biya srig mini njeng nidihim ningat muhwindacan di iba mas bibon ri.

²Dikan tut jide midyai di jiyai nya. Dikan tut bipia jita jibou eisi ba, joom jingon bibor. Dikan tut bipia jikou sut yo di isibut nya ba, jimbus yo di ipai sut yonti bipia igya kui Yesus ingonti noro ibitot hagau apino jo nibreisi mem je bipia ibicum.

³Joom jingon bijiyai ninghuisi wei drek dip Da lo, jingon cut leu bi.

⁴Noro diwok je drek dip gi jingon ngakei Da nok gi nipou tirigi jingon ngakei Da ei nimbie him pima bi.

⁵Gima rino ma jibisrip tut notou jingkwei hanyenti ug e! Ma jittin ser jide sisar leu api jiyai bram niyai munti nya di jiyai ei nimbie him. Gi bi ne midihwou pos jide mini njeng nidihim leu nijoti.

⁶Mbro nok gima lo, jiyai munti di kei ninyeng gom no rinaha. Jingon mpo tut nimpung Nikolaus igyai munti nya noyam kin Dani cem dingon mpo tut yok.

⁷ Suar tungwa tou rino nitingou tu bimiap nihyet tu yok ngon kep mun di Allah Ninnei pai bak mbusyamei nya! Disindui sut yo di ibindei cut sisar nisindemti bigyem biei di bindei bigyai niyaijo ningat di hei ei Allah de Miai Biei Ngat Nghousi.”

⁸ “Apas srat dini bak malaikati di buhup tut mbusyamei ei minu ndig Smirna. Nipas kepti dini kwei leu No di nimbie him kin nohon keti ba, No di mai su kin No di kiju hanyen leu nimai eisi.

⁹Dikan tut mun di buhun tak je ba, juhui mbum cem noro jo nibreisi bipia jinyeng bibor! Dikan tut bipia yo di ipai sut yonti bipia yoni ne mben Yahudi rin noro bi dima irom ighyet kui je. Yo dima ne Bilis de limwa nya ri.

¹⁰Ma jittin tut ninghuisi wei di jei bi mijiyai au. Jimiap e, Bilis bingon je bibindei ba, tungwatu nya mikat je bijisima ei ig bui nsi leu api jiyai ninghuisi wei kikau ug ei njap simnai. Mbro nok gino ibindei bijimai lo, suar jingon gom tut Da leu api midiyai niyaijo nijep di jo kikau nok munkwas bije drek dip jide nibindei cut yokti.

¹¹ Suar tungwa tou rino nitingou tu bimiap nihyet tu yok ngon kep mun di Allah Ninnei pai bak mbusyamei nya! Bikwop yo di ibindei cut sisar nisindemti migyai ninghuisi wei tug hon nimai gi nican bi sren.”

¹²“Apas srat dini bak malaikati di buhup tut mbusyamei ei minu ndig Pergamus. Nipas kepti dini kwei leu No di krau singau simeda di bon ninggwenti bei ninghim noho.

¹³Dikan tut bipia mpia di jibongti dima ne mpia di Bilis gwam ei nide banggo mbrei dip ri. Mbro nok gino yo di isibut nya ihwen Antipas di ningon gom di tri tut Nihyet Di Kei ei jide minu di nok Bilis nibousi dima lo, jiba jingon com Da kikau. Jibikep ser Da drek dip bi lewo jingon gom tut Da.

¹⁴ Noro diwok je tut mun nyeng poi. Ibou poi di ibit Bileam ningginausi isrig jikieti. No dima ngginau Balak biris mben Israel apino ingkwei hanyen kep sisar di ibon nya. Sisar dima ne niyem njita di tungwatu nya ipigig ser mem mun di ikuk yok bak kin nicut tut yamti ri.

¹⁵Nok gima cem ibou poi di isrig jikieti itti kin nimpung Nikolaus ide ningginausi.

¹⁶Gima rino suar jittin ser jide sisar bijikiek ndam Allah. Gi bi lene jei bi midihwou ba singau simeda di ntun duhui him bikon pran bit yo dima.

¹⁷ Suar tungwa tou rino nitingou tu bimiap nihyet tu yok ngon kep mun di Allah Ninnei pai bak mbusyamei nya! Disindui sut yo di ibindei cut sisar nisindemti nya bigyem kep manna di jo nding pima poi mien. Midiyai tig tiei bitut ninyeng nijep di joti bibikwop yo dima yahagom lo, ninyeng dima jo nibreisi mem nindigsi nya bi noro mem no di ma nide tig he.”

¹⁸“Apas srat dini bak malaikati di buhup tut mbusyamei ei minu ndig Tiatira. Nipas kepti dini kwei leu Allah Nipmot di niyai njeng-jau nok hum njeng ba, nimig mbom kei dem kep ngkimom-tembaga di indig kep hum di bindei ba, pimbai kei.

¹⁹Dikan tut jiyai munti nya. Dikan tut bipia jingon ngakei yam cem jingon gom cem jijoi bibor cem jiba jibou coi mem ninghuisi wei di cut igkep je cem. Dikan tut bipia jijoi bibor bidor njiriek gi jijoi bibor ei nipou pini jug.

²⁰ Noro diwok je tut mun nyeng gom. Jisindui sut sop di ninyeng Izebel di pai sut nonti bipia tri tut Allah nihyet. Noni ba ningginausi dima biris bak Ditde awak nya imang bibor. Noni bindei ba, icut ug ei sisar nicut tut yamti bigyem njita di tungwatu nya ipigig ser mem kwar nya cem.

²¹Dibon nituti mem gima noni ttin ser nide sisar bikiek ndam Allah noro noni kou sut. Noni kes hon bi noro bon sisar nicut tut yamti kikau.

²²Jimiap e! Dibindei ba, noni bong ei nghim nsi gom lo, nggwen nindig bibor. Noni kin nicut tut yam cig nya yahagom migyai ninghuisi wei nindig bibor ei nghim nsi dima. Mun dini hagom micut igkep yok nogindini gino ittin ser sisar nicut tut noti bikiek ndam Allah leu bi.

²³ Leu api midihwen nide limwa nya cem leu binhyepo mbusyamei nya yahagom ikan tut bipia Dani ne No di yok niyai kep tungwatu nya yahagom ikan-kan nyenti kin ingonti ri. Dibirop hanyen bije bit leu nok jiyai munti nya.

²⁴Noro tut je di nindigsi ei minu ndig Tiatira e, jibit nihyet di kinei dima bijingon ki tut Bilis de mimun di jo nding nya bi. Dipai bijengkom bipia diba mun di buhun hi kin bu bikum bibuhun tak je bi.

²⁵Noro suar jikrau kep mun di jinyeng tut kikau bipek dingkwei hanyenti.

²⁶ Mem yo di ibindei cut sisar nisindemti bigyai midyai bit leu dingon kanti kikau ug bipek ningwig honti ne midiyai nisindemti biyok leu binhyepo inyeng tak kep mben nya hagom.

²⁷Yoni iba tom ngkimom nitu binyeng tak kep yok leu api idram yok kukiau bit leu nok idram dibijigya. Diyai nisindemti di Dicig yai bida biyok.

²⁸Midiyai singmur mpia priti biyok.

²⁹Suar tungwa tou rino nitingou tu bimiap nihyet tu yok ngon kep mun di Allah Ninnei pai bak mbusyamei nya!”