Read Hatam NINGAT-HI-NGAT NYA 22 Bible Online

NINGAT-HI-NGAT NYA 22 - Hatam bible

NINGAT-HI-NGAT NYA 22

¹ Malaikati dima ndo minyei di biyai niyaijo bida. Minyei dima pimbai kei dem kep kristal di biam kwei leu Allah kin Domba Pmot ide banggo mbrei,

² bibiam kak simpak ninggimau ei minu ndig dima. Biei di biyai niyaijo cem hei ei minyei dima nite hi nite hi ba, ngat ningat bikwop beda. Nok ari bingwam nitindur gom lene biei dima ngat ningat mbisimnaibrimigcan ba, nimeng cem nok obat mem tungwatu dihyeisi dini hagom.

³ Mun di Allah sigion nya hi jo ei minu ndig dima bi sren. Allah kin Domba Pmot ide banggo mbrei jo ei minu ndig dima lene Nide awak nya mikuk yok binggei sut Noni.

⁴Yoni mingat Allah niimaisi brei bou igyai him lene Nonti ninyeng mijo ei Nide awak nya ingwakti.

⁵ Mmun minggai kep yok bu bi ba, isuar mini ninjeng kin mpia njap mem gima piga digai yok bi lewo Allah Nonti piga digai yok. Leu api yoni inok nibou ndig di inyeng tak kep ide limwa nya kikau buug hon nohonti bi.

⁶Lene malaikati dima pai bida “Nihyet dini igbit rin ba, suar ma tungwatu nya ingon jo kep. Allah di kes Nonti Ninnei ei nabi nya ingonti pinak Nide malaikati gom kwei leu binhyepo ndo mun di jei bi mipek kep mem Nide awak nya.”

⁷Yesus pai “Jimiap e, jei bi lene midihwou hanyen! Bikwop yo di ibit nihyet di jo ei srat diniti ingon nggei-hi-nggei!”

⁸Da di Yohanes dimiap mun dini yok hagom bidingat hagom bou diyai him tu. Tirigi dimiap bidingat hagom tu lene dikuk da ei malaikati di ndo mun dima yok hagom bida noho bei ba, dipi bidikuk da bak.

⁹Noro noni srep “Ayai nok au! Akuk na bida au! Ma akuk na bak Allah Nongkom! Dani ne awak rin noyam kin nani kin asut bat nabi nya kin yo di yahagom di ikrau kep nihyet di jo ei srat diniti.”

¹⁰Lene noni sok kep da “Ma aku mimun tut nihyet di jo ei srat bokti dini au. Lewo son dideu tto bou dima hagom pek kep mem nye tu.

¹¹ Nnaba yo di isibut nya ibon kep mun di kinei kikau. Nnaba yo di irom-rau nya ibon kep mun di mpiei kikau. Noro yo di ibit Allah ningon kanti nya igyai igbit ningon kanti dima kikau ba, yo di ingon kwes kei nya inyohou ingon di kwes kei dima kikau.”

¹² Yesus pai “Jimiap e, jei bi lene midihwou hanyen! Midihwou sut Ditde munkwas ba, dibirop hanyen bak tungwagom-gom bit leu igyai munti nya.

¹³ Dani ne nimbie him kin nohon keti cem rin ba, Dingat rin ei nitriti kin ningwigsi.”

¹⁴ Yo di itot ide sinsun bipwoi kei dima ingon nggei-hi-nggei apino icoi kak dimbou hui ug ei minu ndig dima ba, idem mem gima igyem kep biei di bindei bigyai niyaijo ningat a.

¹⁵Noro yo di irom ndok kin yo di inda dut kin yo di icut tut yam kin yo di ihwen mun kin yo di ikuk yok bak kwar nya kin niris kep mun cig nya yahagom ingat rin ei minu ndig nisai.

¹⁶ “Da di Yesus dipinak Ditde malaikati leu binhyepo noni hwou tri tut mun dini yok hagom ei mbusyameisi nya. Dintun Daud de keret him. Dani ne singmur mpia priti di njeng kei ri.”

¹⁷ Allah Ninnei kin no di Sop di miwak Nijjep pima ipai “Jikwei!” Suar yo di imiap nihyet di jo ei srat diniti ibinut bu bipai “Jikwei!” No di nggobiau suar kwei! Ma no di ningon joi sut minyei kwei dut minyei di bindei bigyai niyaijo mikuisi.

¹⁸ Dani ne Yohanes rin bidisok kep yo di imiap nihyet di jo ei srat diniti ngkiem ser. Gino hi bisinggre bikum eisi lene Allah ba nsuwer ajar di ipas kep ei srat diniti bikum ei no dima nide hukumti.

¹⁹Gino hi bisinggre bicut mun nyeng hi leu nihyet di jo ei srat diniti lene Allah micuon ser nipreu ei mem no dimati di jo ei srat diniti. Leu api no dima micoi ug ei minu ndig di kwes dima biyem biei ngat di bindei bigyai niyaijo dima bi sren.

²⁰No di tri tut nihyet di jo ei srat diniti pai “Igbit ri! Jei bi lene midihwou hanyen!” Igbit ri! Tuhan Yesus e, ma akwei!

²¹Handei kon ba, Tuhan Yesus singat tut Allah de limwa nya yahagom.