Read Hatam NINGAT-HI-NGAT NYA 3 Bible Online

NINGAT-HI-NGAT NYA 3 - Hatam bible

NINGAT-HI-NGAT NYA 3

¹“Apas srat dini bak malaikati di buhup tut mbusyamei ei minu ndig Sardis. Nipas kepti dini kwei leu No di nyeng tut Allah ninnei muhwindacan kin ham ningat muhwindacan. Dikan tut jiyai munti nya. Mbro nok gino tungwatu nya ipai sut je bipia jiyaijo yo lo, ningat ne jimai yo!

²Gima rino suar jikiju ba, jibindei sindem nikenti di jo bije nipou tirigi hagom mai bihigom bigyo. Lewo dikan tut bipia jiyai munti nya hi kei-kau ei Allah niyai him bigyo.

³ Gima rino suar jiyok ngon kep nipingok jeti kin mun di tibim ei jitingou nsi tu. Suar jibit mun dima yok hagom leu api jittin ser jide sisar bijikiek ndam Allah. Gino jida jiyai bijikiju bi ne dihwou timon je dem kep ninggimang kep mun cig noro jikan tut nicunti mem dihwousi dima bi.

⁴Noro je di jinggre kin mbusyamei minu ndig Sardis jibou poi jinyohou jide sinsun ba, map kuisi bi. Yo dima idem mem ijuk sinsun di tiei kei bimbut bit Da.

⁵ Yo di ibindei cut sisar nisindemti nya igyai sinsun di tiei kei bijuk. Didip tut inyeng leu Srat Yo Di Igyaijo Nya bi sren. Midipai brei ei Dicig kin Nide malaikati nya yoho bei bipia yo dini ne Ditde limwa nya ri.

⁶Suar tungwa tou rino nitingou tu bimiap nihyet tu yok ngon kep mun di Allah Ninnei pai bak mbusyamei nya!”

⁷ “Apas srat dini bak malaikati di buhup tut mbusyamei ei minu ndig Filadelfia. Nipas kepti dini kwei leu No di kwes-kwau di ningon gom. Noni krau kusin di Daud krau. Gino Noni kau dimbou ne bit bon hi nggam mbou hanyen kan bi. Gino Noni nggam mbou ne bit bon hi kau dimbou dima hanyen kan bi.

⁸Dikan tut jiyai munti nya. Dikan tut bipia jiyai nisindemti poi mien ba, jibit dingginau jeti bijingon gom tut Da. Dikau dimbou leu je ba, bit bon hi nggam mbou dima hanyen kan bi.

⁹ Jimiap e, midibindei nimpung Bilis de limwa nya di iris-ris nyen di ipai sut yonti bipia yoni ne mben Yahudi rin dima yok bikwei kuk yok ei jimig him. Mijo nibreisi mem yok bipia dingon ngakei je.

¹⁰Midinyohou je leu nijam di buhun bibor di mikieng kep dihyeisi dini hagom lewo jibit dicuk jeti nya bijiba jibou coi mem ninghuisi wei di cut igkep je. Nijam di buhun bibor dima mibingon tungwatu dihyeisi dini yahagom.

¹¹Jei bi ne dihwou! Suar jinyohou mun di jinyeng tut leu binhyepo hi ris jide munkwas di jiyai tug hon jide nibindei cut sisar nisindemti leu je bi.

¹² Dita no di bindei cut sisar nisindemti nok cou nipmem ei Allah De Ig leu api noni mibong kep Ig dima kikau buug hon nohonti bi. Midipas kep Ditde Allah ninyeng kin Nide minu ndig Yerusalem di nijep ninyeng ei no dima dip. Ba, minu ndig Yerusalem di nijep misrek kwei leu Allah ei gwamti. Midipas kep dinyeng di nijep bu ei no dima dip.

¹³Suar tungwa tou rino nitingou tu bimiap nihyet tu yok ngon kep mun di Allah Ninnei pai bak mbusyamei nya!”

¹⁴ “Apas srat dini bak malaikati di buhup tut mbusyamei ei minu ndig Laodikia. Nipas kepti dini kwei leu No di ninyeng No Di Igbit di ba ningon gom kin ningon sren bitri tut mun di ngat bou niyai him. Noni ne nibousi mem[2] Allah De nipai testi hagom ri.

¹⁵Dikan tut jiyai munti nya. Dikan tut bipia jingkwei hanyen leu Da bi lo, jibrim jingkek mem Da cem bi. Mei! Dijoi sut gino jingon can bi.

¹⁶Noro jingon mbroi he lewo jingkwei hanyen leu Da ba, jibrim jingkek mem Da bi. Gima rino midipio je leu dinsi hak ug!

¹⁷Jipai sut jenti bipia jinyeng cem jibong kei jigwam kei cem ba, jisuar mun nyeng hi bi. Noro jingon ngat gi jikinei-kinau ba, jindwau cem bi. Ningat ne juhui mbum ba, jingat ngu bijiyai tu tu.

¹⁸Gima rino dipingok jingonti leu binhyema jipek mas di pimbai kei di bindei bijinyeng leu Da. Ma jipek sinsun di tiei kei mem jijuk ser jingat nguti di bindei mmai je. Ma jipek obat mem jibidip jiyai njep leu binhyepo piga hanyen bu.

¹⁹ Disok kep yo di dingon ngakei yok ngkiem ba, dittem yok cem. Gima rino suar jibrim jingkek bijittin ser jide sisar lene jikiek ndam Allah.

²⁰Jimiap e, diya kui dimbou heisi bidipuk dimbou ba, no di miap dihyet bikau dimbou leu Da lene midicoi ug ei nide ig bei nsi leu binhyepo niyem njita bit yam.

²¹Midisindui sut yo di ibindei cut sisar nisindemti bigwam kui Da ei Ditde banggo mbrei bit leu nok Dani cem dibindei cut sisar nisindemti ba, nogindini digwam kui Dicig ei Nide banggo mbrei.

²²Suar tungwa tou rino nitingou tu bimiap nihyet tu yok ngon kep mun di Allah Ninnei pai bak mbusyamei nya!”