Read Hatam NINGAT-HI-NGAT NYA 6 Bible Online

NINGAT-HI-NGAT NYA 6 - Hatam bible

NINGAT-HI-NGAT NYA 6

¹Leu api dingat lo, Domba Pmot cug biei nggrai gi nigom leu lene dimiap mindhe gi nigom pai “Akwei!” Nihyet dima nindig bibor dem kep kru di nisu bong.

² Dinyohou tou kep bidingat lo, kuda di ninta tiei ningut gom ttau kwei. No di bri bigwam dip krau hampiap biyai topi mas bittin. Noni kinyon ei Nide midyaiti nok no di om kep mun nyeng hagom ba, bindei cut yo di iba nitok bak Noni yahagom.

³Tirigi Domba Pmot cug biei nggrai gi nican leu lene dimiap mindhe gi nican pai “Akwei!”

⁴ Leu api kuda di ninta ngwoi ningut gom ttau kwei. No di bri bigwam dip yai nisindemti mem gima bindei ba, tungwatu dihyeisi dini iba nitok biyam bikon pran bit yam. No dini krau singau simeda di nindig krop.

⁵ Leu api Domba Pmot cug biei nggrai gi niningai leu lene dimiap mindhe gi niningai pai “Akwei!” Dinyohou tou kep bidingat lo, kuda di ninta nimmun ningut gom ttau kwei. No di bri bigwam dip krau kilo ei nindati.

⁶Leu api dimiap tungwagom nihyet di tibim kwei leu mindhe ningut bitai ikieti di pai “Gandum kilo gom nibok noyam kin niyai nimuhup di tungwagom tug ndei mem midyai di yai mem njap gom ngat he. Ba, gandum-barli kilo ningai nibok noyam kin niyai nimuhup di tungwagom tug ndei mem midyai di yai mem njap gom ngat he. Noro ma awim biei zaitun kin miai ba anggur nghousi au.”

⁷Domba Pmot cug biei nggrai gi nibitai leu lene dimiap mindhe gi nibitai pai “Akwei!”

⁸ Dinyohou tou kep bidingat lo, kuda di ninta pimber ningut gom ttau kwei. No di bri bigwam dip ninyeng Nimai ba, no di ninyeng Minu Nimai Nya Ide[5] bri bigwam ninghim dip. Yo dini ikrau nisindemti mem gima ihwen tungwagom leu ibou bitai lene nok ei dihyeisi. Ba, yo cin dini iba nikon pran kin nsuwer ajar kin mindhe-ndhe di niten-pos naham yokti bindei timek yok bingwig.

⁹Domba Pmot cug biei nggrai gi nimuhwi leu lene dingat yo di ingon gom di igyai nimai drek dip gi itri tut Allah nihyet innei a. Ba, dingat ninnei nya di ibicom yam ei nimbar hum ndok nikiou.

¹⁰Iba ighyet nindig bahara “Na di Tuhan di Sindem Bibor cem di kwes-kwau cem di ningon gom cem e, njap pig bu leu api ambus tungwatu dihyeisi ingonti ba, akes hukum ei yok dip drek dip gi ihwen nye i?”

¹¹Leu api Allah yai sinsun ndok di jei di tiei kei ba, bibikwop yahagom leu api kuk yok leu binhyepo ibet ingon mbigom bu bibou isut bat di inok awak mem Allah kin isut bat dima igyai nimai noyam yoni imangti dem ug e.

¹² Leu api dingat lo, Domba Pmot cug biei nggrai gi nimuhwindagom leu. Mpe dima ne dihyei ugwa-kwei bibor ba, mpia njap dindi-kai dem kep kron nimmun ba, bed mmun cem ngwoi dem kep nggrom,

¹³ ham mpia-bbed him nya cut kikau ug ei dihyeisi mu noyam kin biei ara ningat di nggwop bi di llet leu ninda tirigi hou nindig bibor yai ninda tut.

¹⁴ Mpia-bbed him cem pror hak nok srat di ikijum ba, nungug nya kin mios nya hagom son leu nijoti.

¹⁵ Mpe dima ne nibou ndig dihyeisi dini kin yo di inyeng jei nya kin nibou pran nya kin yo di inyeng kin yo di inyeng tak kep ndigban nindig bibor kin awak nya kin yo di igyati kwes nya yahagom iku yok nyahan ei hak mihyeti kin tring behei bidem nungug him nya ba,

¹⁶ yahara nungug kin tring behei nya “Ma jitti bijisu kep nye leu No di gwam banggo mbrei dip niyai him cem leu Domba Pmot di gga nye biborti cem.

¹⁷ Lewo njap di bindei di tungwatu nya ingon digit tut yok ttau kep nye tu ba, tou rima ningwes ngun leu inda nsi i?”