Read Hatam NINGAT-HI-NGAT NYA 7 Bible Online

NINGAT-HI-NGAT NYA 7 - Hatam bible

NINGAT-HI-NGAT NYA 7

¹ Gima ngwig leu lene dingat lo, malaikati nya ibou bitai igya hammi dihyei nuhuisi bitaisi bikrau ser hou nimig bitaisi leu binhyepo hou miep dihyeisi kin muk ngeisi kin bieisi nya bi.

²Dingat malaikati gom kin bu di ttau kwei leu mpia nipriti bikwei sut Allah di Niyaijo de mun di bitak buk. Noni ba nihyet nindig bimbrua ser malaikati ibou bitai di ikrau nisindemti leu Allah mem gima inggek tut mam bei kin muk ngeisi

³ bipai biyok “Ma jinggek tut mam bei kin muk ngeisi kin biei nya au e bibou nitak buk ei ide Allah de awak nya ingwak ug e.”

⁴Leu api dimiap tut bipia yo di igyai Allah de nitak buk ei ingwakti nya imangti ibou sribu sratus gom ningot bitai ba, bitai yahagom intun mben Israel ide keret simnaibrimigcan him.

⁵Ibou sribu simnaibrimigcan di intun keret Yehuda him igyai nitak buk kin yok leu api ibou sribu simnaibrimigcan di intun keret Ruben him kin ibou sribu simnaibrimigcan di intun keret Gad him,

⁶kin ibou sribu simnaibrimigcan di intun keret Asyer him kin ibou sribu simnaibrimigcan di intun keret Naftali him kin ibou sribu simnaibrimigcan di intun keret Manasye him,

⁷kin ibou sribu simnaibrimigcan di intun keret Simeon him kin ibou sribu simnaibrimigcan di intun keret Lewi him kin ibou sribu simnaibrimigcan di intun keret Isakhar him,

⁸kin ibou sribu simnaibrimigcan di intun keret Zebulon him kin ibou sribu simnaibrimigcan di intun keret Yusuf him kin ibou sribu simnaibrimigcan di intun keret Benyamin him.

⁹Gima ngwig leu lene dingat tungwatu ningot ndig krop di idem yam ei ba, bit bon hi kwop imangti kan bi. Yo dini ikwei leu keret nya kin minu nya kin nihyet nya kin mben nya hagom. Ijuk sinsun ndok di jei di tiei kei bikrau dui meng ei indati ba, yahagom igya keyam ei banggo mbrei nuhui bitou kep Domba Pmot Noho bei nggilun.

¹⁰Yo dini iba ighyet nindig bibor bahara “Niteu leu sisarti kin niyaijo nijep tug hon ide Allah di gwam banggo mbrei dip kin Domba Pmot cem.”

¹¹Leu api malaikati nya yahagom igya bikrop ttai banggo mbrei kin nibou nya kin mindhe nya ningut bitai leu api iba ingwak bikik mpia ei banggo mbrei nuhui binggei sut Allah,

¹²bipai “Igbit ri! Jikwei ba, inggei sut ide Allah lewo ninyeng jei ba, ningon ki cem. Ma ipai sigyo bikuk nye bak Noni lewo Nongkom sindem bibor kikau buug hon nohonti bi! Igbit ri.”

¹³Leu api igom leu nibou pima yok ikieti hig ser da “Yo di ijuk sinsun di tiei kei dima ne tou yo i? Ikwei leu hantou i?”

¹⁴ Dibuhup “Andigpoi e, dikan tut bi. Lewo na di andigpoi nangkom akan tut.” Noni pai bida “Yo dini ne yo di igyai inghuisi wei bingwes ngun leu nijam nihwen bit tungwatu nyati rin ba, itot ide sinsun tu lene ibindei bitiei kei ei Domba Pmot ninggromti.

¹⁵Gima rino idem yam bigya ei Allah de banggo mbrei nuhui bikuk yok bak Noni bikwop mmun-njap ei Nide Ig. No di gwam banggo mbrei dip ningat rin bit yok binyohou yok.

¹⁶ Bit bon inggum ba, inggobiau cem bu bi sren. Mpia njap di wam bibor mitigut yok bu bi sren.

¹⁷ Lewo Domba Pmot di ya niyati ei banggo mbrei ninggimau minyohou yok nok gembala di bie tut yok ug ei minyei yaisi di bindei niyaijo. Allah midip tut igyai nggwei hagom bingwig leu igyai njep.”